Selung Tangthu

La thu mah houlim nawn ni. Tahan Melody-te la, a music video a aphuaktu “The Rengs” kichi, Selung Tangthu chih ahi a, a phuahna  pau i siam in daihkei mahleh theih dandan in hiai la tungtang gen sin ni. Adiklou a om leh a theizawte’n hon kum in hon gen le uh chih i ngen bok hi. Hiai i gelh na zenzen ziak ahihleh, tuailai laphuah, lavui phuah lam khong a lunglutte’n hihdan tuamtuam omthei ahi ngut e ana chih theih ua, lungsim zang a omnailou a hon omsak na ding ua lamlaktu ahih khak leh thu-leh-la lam a khanna, phattuamna hiam om kha thei ding chihman ahi.

 

Selung Tangthu

 1. Hiai ka selung

Ana ngai khat vangin

Aw.. ka lungsim

Mangbangin kap sek

Nang hon itna hangin

Noplai niteng in

Aw.. zamual hon liamsanta

Melma lauhhuai pen a na hi

Hiai ka selung hi

2. Hiai ka selung

Ana ngai khat vangin

Aw.. ka laukha

Bah in a ngui sek

Nang hon itna hangin

Senlai naubang kahlai

Ban haksa lua e

Melma tatse pen a na hi

Hiai ka selung hi

 Chorus

Anglai a inten sak

Melma din ka phal diam

Namsau hiam in aw

Huai ka melma

Kha ka phamsak a

Haksa chiteng thuaksak in

Hanmial sung a zal ding in

Ka sawn tumta

Melma nokpen pen ana hi 

Hiai ka selung hi

3. Huai ka selung

Phamkhua lawikhinsa pen

Thohkik sak din melin a lawmlou

Nang hon itna hangin

Thohkik sawm, na khepek

Mai ah a kun maw

Melma ninhuai pen a na hi

Hiai ka selung hi.

A tung a kigelh pen ka siam bangbang a Lusei pau apan ka lehkhiak ahi a, 100% in a dik kim kei ding chih ka gingta. Pau siamzaw leh a kiphuahna pau a hiai la velchian nuamte a ding in a phuaktu phuahdan a nuai ah i taklang nawn ding.

Thinlung Thawnthu

 1.He ka thinlung

 Hmangaihtu che vang hian

 Aw.. ka rilru

 Mangang a rum thin

 Nang hmangaih che vang in

 Hlimlaini zawngten

 Aw,,zamual min liansanta

 Hmelma hlauhawm ber a lo ni

 He ka thinlung hi

 2.He ka thinlung

 Hmangaihtu che vang hian

 Aw ka thlarau

 Chau in a ngui thin

 Nang hmangaih che vang in

 Senlai nau ang tahlai 

Ban  zai rel a har ngei e

 Hmelma nunrawng ber a lo ni

 He ka thinlung hi

 Chorus

 Tlang lai ah runrem tir

 Ka phal nem aw hmelma tan

 Khandaih hriam in aw

 Ka hmelma chu

 Fam ka chantir a

 Hrehawm tin tuarhtir in

 Thlanthim nuai ah zar tur in

 Ka nawr liamta

 Hmelma hnawksak ber a lo ni

 He ka thinlung hi

 3.Chu ka thinlung

 Famkhaw lawi hnu ngei chu

 Thawhleh zai rel reng an a mawi lo

 Nang hmangaih che vang hiam

 Thawhzai rel in i kephah

 Hma'n a kun leh maw

 Hmelma chimawm ber a lo ni

 He ka thinlung hi

A phuaktupa gennop ka gintakdan in a lungsim ngaihtuahna, a haksatnate’ bulpi pen amah-leh-amah ahi chi a, a ngaihtuahna “ka selung” a chih ngoh hipen in ka koih hi. Hiai la ka ngaihtung in a phuaktu in nungak ngai, a zawlngaih sunglut a gimpihluat pen a “selung” ngoh ek mai dan in ka koih hi.  A tang thumna ah a ngaihzawng a mangngilhsa hun sawtpi nung in a hong puang nawn a, huai bang le buaipih nawn in ninhuaisa a a “selung” mah ngoh suk nawn dan in ka koih hi.

Himahleh, a thu gelhkhia a ka sim chiang in zawlngaih toh kisai (kia) hilou, huai sanga thukzaw omlai ding in ka koihta hi. Amah mun thum a kigen in a “selung” a “lungsim” leh “amah” phasak hileh kilawm hi. Mihing ah a hoihlam leh a selam kidou om gige a, amah a (amah sung) a a hoihlou lam omte zohtum a nasa tak a panla, a genchianna ding a “temsau” bang zang hial a thatlum dan a gen-a a zohkhitsa himahleh, a kibawlhoih nung bang a le a hoihlou lam pen hong hingthak dek, hong thoukik dek zel nak a, huaiteng a “selung” hisak in ana buaipih, ana gimpihtu pen a “lungsim” hisak dan a gen hileh kilawm hi.

A hiai la bulphuh hi chiah keimahleh gensau zual le, mihing hinkhua a lunggimna, puakgik, lungsima haksa i sak om sek a, mihing in a hoihlam le thei leh deihna nei, himahleh a hoihlou lam utna, khemna le om den, huaigel kidoudou in a zou lamlam kha i mizia leh mi hon muhdan hong himai hi. Hiai la ah nungak ngaih toh kisai kia hilou in a hoihlam leh a hoihloulam kidouna, haksatna, buaina khat peuhpeuh huamthei ding abang kasa thak hi. Thil/dinmun khatpeuh mihing in ei a om a hoihlam ahihkeileh a hoihlou lam khatzaw samsam zang in i la in i sang hi. Gentehna ding in mikhat in mipi mai ah hon kou, hon dem ek taleh i hehtha suak a, “hon huchih vial”, “hon simmoh” “amah bang kisa atuan a” chi in i lung a dam kei hi. I  “selung”, i “ego” a khoihkhak a, a suknat man ahi. Sappau a “ego” chihpen mahni kipoimohngaihluatna chi le a gendan hoihpen ahi diam ka thei kei.

Lehlam ah mi’n a utut un hon chitale uh, hehna a lalou in “amau thil atheihlouh man uh ahi” chia zang taka la a amau leh hehpihhuai ana sathei pawl bang om zel hi. Huaite tuh a ngaihtuahna ua amau kia kikoihlou, amau a thupipen a kikoihlou, midangte dinmun le theisiam a thil posiamte ahi uhi. Tua i gen tegel ah i “selung” sappau a “ego” in i mihinna ah thu nei in hon uk mahmah hi chih a kilang thei ding. Sappau a “Egocentric” a chih uh “ego” apan ahi a, bangkim leh ngaihtuahna sung tawng penpen a mahni kikoih gige dinmun genna a chih theih ding. Kisaktheihna, kiletsakna, hehna, kiphatsakna, kingaihsiatna, khasiatna chihte khong le hiai ziak hipen hi. 

I la lam ah kikta le. A phuaktupa in amah ah (mihing ah) a hoihlam leh a hoihlou lam omsak in a hoihlam in a hoihlou lam zohsak sawm in nasatak in pang mahleh a hoihlou lam bei tuanlou in hong hing/thou kik dek zel a buaihuai sa, huaiteng buaipih ahi a chih theih ding. Mihing omzia, mizia hi Jesu bang in ana nak theih mahmah a, atawng pen tan a thei dimdem ahihman in mihing hinkhua a lalpen, a masapen, a thupipen a koih ding Pathian/Amah ahih ana gen khin hi. Huai dan in omtheile laphuaktupa buaipihte vaiveng vek mai ding hi. A huchitheite a ding in khovel haksa lou hi.

Laphuaktu in le a “selung” achih in amah tokbuai lua ahihdan la a gena a la bang le “Selung Tangthu” chi zozen dan hihtuak hi. La gil leh thuk mahmah khat ahi a chih theih ding hi. Tangthu i chih tanchin, thu saupi om ahi a, pitek, putekte ahiam nu-le-pate ahiam in naupang khong tangthu a hilh chiang un ngainuam in lupna tung ah tangthu ngai kawm in naupang khim ihmu thei hi. Huchia tangthu kihilhna ah naupang a ding a sin ding, etton ding, theih ding, pilna ding thu kiselgu tampi om ahihman in nam chiteng leh khang teng in tangthu nei in ana gen zel ahi uhi.

Huchi zawng a etin hiai laphuaktupa’n “Selung Tangthu” a chih a lamdang kei hi. I hinkhua ah “selung” mah buaipih ngen i hihman in.    

[Hiai thugelh 2012 kum khong a gelh www.zogamonline.com a kisuak sak, website pen a buai khak zenzen leh chiah Wednesday, 21 November 2012 a ka blog a ka suan phei ahi]



Behlapna.

Tunsun, 04.03.2020 ofis kailouhni youtube ka ngaih leh The Friday Show hosttu pa kawlgam a va zin a a lasatu leh a phuaktu, hiai la toh kisai a ava houlimpihna ka mukha a ka ngaih leh ka gelh lai a a na risk fuh dektak ka hih ka thei. Nikum lam in utube ah Kolasib tangval khat saptuam a kizang mahmah in a nungaknu zawlgai sak kha a, a dinmun mun toh kituaklou salua a that a, huai a aphuah ahi chi pawl om ua, hilou ahihdan gen pawl toh kinial nak mahmah ngei ua, ken le ka na ngaihchang leh theihnop gige sim ahihman a ana ngaikhe pah ka hi.

(A tungah blog a ka suanni 21 November 2012 ka chi a, blog a a ki post ni lah January 2013 lam danin a kilang daih zela, i lakna ahihkeileh draftna a formatting zatdan zila hiai blog a i post chianga alignment dik theihetlou pawl a om seka, huchibangte delete in note hiama plain text a koih a ka post thak pawl omzek ahihmanin huchidan ahih ka gingham.)

Awle, a phuaktupa gendan anuai  ah i koih ding: