RETIRED LIFE

 Nasepna apan voluntary pension lakkhit kum khat bang hong valta hi mawk! I theihlouh kal in hun zaw ana paipai mah hi. Nna i seplai khong in i awlmoh, i hihnop, hihtuak i sak tampi om a; hun ki neileh.. khong ki chichi thei hinapi, i hong khawl hial leh thil taktak va pat dia kikhel simta peuh hong bang hileh kilawm. Thil neuchik khat va pat dia lah hih thamlouh sakna bang kinei sim hileh kilawm zel.

Phalbi Khawl

Sepna a vaiten a nunnop (bihu, durga puja, diwali) hun ua suti a la ua christmas leh kumthak lak ei huna koihsim uh a banga, huai hun suamin tanau veh leh kisukhalhna dingin suti kila tangpi hi. Sikul kailai khonga phalbi khawl (summer vacation, winter vacation chihte) chiangin mundanga siamsinte inlam apai sek uh bangin upalam khenkhatin sepnanei omkhete le phalbi khawl neia pai dingin koih sek uhi. Suti la chile sepaih suti lak banga sawtlou, a tampenin ni 10 apan 15 bang kila ngam hi. Sawt la le nna ana kisiah leh ei buaina dimah hizel leh sorkal kumtawp 31 March bang le naitou paha kisakkholh ding tampi om ahihmanin.

Kumthak Nasep

Kumlui leh kumthak kikhen lai vela suti la-in, January 11, 2021 ni apan i kainawn leh a mihing kidaihlouhna leh tunglamten VC (video conference) khong angei a na hihlai uh ahihman, kumthaka thathak lak ding chia phurna omzekte hon nenniamsak dek maimah uh bang va chih di lah hikei ven. Sepna nei, khaloh la a inkuan vak i hih buang chia utin utkei le, phur in phurta kei le i mohpuakna sepkhiak leh septouh zel ngaia, i hon sep leh zaw Pathian zalin a dandan hong omtou zel sam hi. I omlouh kala pendingte aban bana i hihtouh chiangin hun bang le bei pahpah mai in nna le awlawlin kizou toutou sam hi.

25, November 2020

Tukum March kha a lockdown hong omnung April 21 ni in office ki hong nawn pana, staff kimkhat khong kai in na kisem hi. A kailoute le inlama sem chihdana om zaw hisam, huchi dingin a mihing hi in office paizia hitaleh ataktakin a hithei kholkeia hiven. A kai pawla pan ngai ahihmanin a ki honni apan inn leh office kawmtuahin a kullua ahihkeileh kholai ah ki mawk pawt nuamlou hi. Aloutheilou a insung poimoh lei ding a om chiangin le dawr kiup deuh – departmental stall leh shopping mall deuhte bang ah kilut nuam khollou in dawr neu khonga a omnak leh kileizaw hi. Huchi in April apan November kha tan a kulna a pawt leh vakkhe mahle ahitheitana pilvang leh kiveng danin ki om kenkan hi.

October 30, 2020

 Gelhnop hong phulkhe kholkei boka, lai gellouhna le sawtsim nawnta hi.  Tangthu ahiam ngaihtuahna gil apan phuah ding chihbang niteng khosakna, nasep a i buai a tension e, bang e a tam chiangin phurna lungsim thoveng hong piang ngei ding banglou ngaituahna kulthuk zat chu “kaha se” hi mai. Niteng a ngei in oma, Pathian zakdah louh dinga , zinga ni hongsuak ,  nitaklama  tum nawn zel mai ding mah sakkhak theih phial di bangin hun ki beisak sak mai hi. Chizen mah le,a chihsek bang un ki hul ahipen di chu. Huchi dinmun ah bangmah va gelhthei kei lele diary/journal pian gelh zeuhzeuha, eipau kigelh himhim, a bang abang hitaleh whatsapp khong sangin online ah tamin  kibehlap leh chih lunggulhna in blog a koih ding tuni banghiam khat gelh di chia hong kipan chu ka hi a. Banglam ah a hong pain a diam ah..

SEPTEMBER 17,2020

Bangtan hiam Journal gelhlouh kalin a “BER” kha lam na kipankhin mahleh vuah khong a zukzuk mana i muhlouh ziak ahi diam ni satdan phavang suak selsal bel ki munailou hi. Himahleh BER khinta in March kha apan hipi in khovel hon pei taktak leh theihlouh kala tukum ana beidek man, kha thumin sam na hi mawk hi. Sorkal lamte paudan apan tukha khonga hipi beizou ding i na sak leh lah huchihtuak het kei. Ani ani in gam pumpi hi in Dibrugarh ah hitaleh a number  pung hulhul lai hi. Unlock 4 a chi uhia, state  leh state kikawmtuahna hon hongta uh ahihman hipi bei kei mahleh mipi inn a kikhum theih hi nawnlouin mahni khosak, khohei, nekzonna lam chiat buaipih ngai nawnta hi.

Yarrow Unvisted Khong Chisuk

Lai i gelh tei sam chianga thil thupi leh thu thukpi ahiam lah va kisui leh gelh zoulou, hun tomchik sunga zohtheih di, lungsim a hong suak zual khong mankal a ki gelh hipen ahihmanin i hihna kipuang leh zumhuai bangin kisuanlahhuai sim sek hi. Chihbel ei thiltuah ahiam ei theihkhak khovel neuchikte khong a kipan gelh hilel i hihna ah ei le ei kipuang puang kihsim mai hi. Ei mimal blog khonga koih dia gelh lel i hi a, a simnuam a om zenzen lelah hoih, a omkei lehlah hoih chihdan a kisiamtan suk mai a hunlem om chia gelh zeuhzeuh zel mai aki  hi i chi masa nuam hi.   

Ki Vid Lailai Veh Aw

Lockdown hon lakkhiak nung uh kha thum vallam office kikaita chu ahi a. Kha khat khong paita apan test a hahbawl ziak uh ahia bang ahia a statistic danin North East ah hong pung nak mahmah hi. Guwahati khosung, Nagaland, Arunachal khong inle kal nih lockdown hon hihthak ua, Manipur ah leng ahih nawn uhi. Assam district tuamtuam ah himahle uh kou omna district bel a thu kia in lockdown ding chih a kizakna kal thum bang valta ding hi. A nunungpen ah mipi toh administration in genkhawm ua zing chiang (28.7.2020) a kipanta ding chih ahia, zanni a statistics hon kapkhiakna uah a kaithak 60 val om, a gawmkhop ah sang khat valta ahihmanin hon hihngei ding un na ki koih hi. Himahleh tuni hiai gelh hun dong in administration lamin thusuah nei nailou uhi.

KHUALZIN LAMPAINA AH..

Khualzin, loukuan ahihkeileh gamvak a i pai chiangin  lamphei kia om khollou in a suk a tou bang le na om zel hi. Kenlak, kawllak, suanghumlak khong le omthei a, khedap bang bunkei le mun khenkhatah bii in hon sun, segahling sikkhak, suanghiam suihkhak, khetaw a ling tangin nuam velvullou khong om thei hi. Mualtung  gamkeu a sun nisa nuaia danghul kawma pai keukeu a ngaih ton oma, kho-ul kai niuniau kawma tawlhuai mahleh va dinkhawl theih ahih mawklouh hun bang om hi. Huchi khonga lam i pailai in vanpuak bang i neih leh hong gik diak in haksa hi. Van gik khollou i chih bang le i tawl i bah chiangin hong gikin dongkholh mai sek hi.

Muktuam Mah

A hun toh kituak le hiven, muktuam mah chinawn ni. Thilthak chih theih ahi zomah boka. Mukbulh chih di hia Muktuam chihzawk di, a malam in Muktuam ka na chikhin abanga huai mah paipih mai ni. America lam khonga “ka taksa kei thu”, ka ut leh ka bun dia ka utkeileh ka bunkei ding, nou hon phutluih kei un chihdan hilouin eigam ah muktuam ki bun diamdiam vanglak hi. Kholai i vakkhiak zek a i etvel leh vaite anu apa, atek akhang, kholai a i muhten le hon bun chiat uhi. Adiakin  rickshawala, pandukanwala, mutia  chihte khongin le hon bunvek uh i muhleh khovel zaw khekzou tak himah ei chih veivui sim in a om hi.

Lockdown 5 maw Unlock 1

Lockdown lakkhiat hon pat zet u leh a covid19 le bei hial ding hileh kilawmin khosung khong hong thoveng mah a bang. Chile lah sorkalin a bawl covid19 update na munpi website i et chiangin eizau lam (North East) ah hong ki khonung pat a bang zel. A sang (buhsang chihdan a zat) va chih dia lah tam deuh  ahihmanin hitheilou hi. Min lockdown a lakkhiak pat leh eilam hivei kipan, kisan leh hong kibuai san mawk hi peuhmah. North East chih mahtak hiai lama le ana ki tuantual leh zekai zel houh a diam chih di ahihkei ngal leh. I chih hangin, lehlam gamtawp Maharashtra khong bang le zaw nitengin a vei a dimin omom lai sam. Nitenga pha zah bang le eilama toh teh vual di le hi kei. Amau a mihing tam, a test mah le hahbawlzaw hi ding uh hiven chih theih zel tuh hi.  

Tampi Hong Hong Tung

Tuni le gelh nawn sin aw le. Banglam gelh zozen ding le a diam ah. I hileng uh banah pingpei, khaukhup pung, zinling chihte khong hong kiza nawn leuleu in thukhunlui lamlam bang ngaihtuah khak in a om dek. Tuni le vuah lah zu ziahziah lai ahihmanin tui a hong lian kei ding chih theih hilou hi. Gam khat leh khat lah hileng thu khongah kimohsa, kikheniam ut omlouin pang toutou ua, hileng lemtanga la houh ahi uhiam gem leh gam kingik tuah bang hong pung zela den chiah a hong kidou kei ding uh chih bang le gen theih hilou hi.

Pung Hulhul

Bay of Bengal a pingpei hatkhokheng, Amphan a chih uh, om ziaka Assam leh NE state tuamtuam a vuah zuk chihtaka zu dia a puan uh hong tangtung ahi ngei ding. Tuni vuah zu tiptip ging office a room apan i zak leh tuklai ding mah hong bangta in lunglen bang hong huai dek a bang.  Neulai khonga a vuahzuk gamlak vakin laia luigei khonga i omkhak chia luitui luangging, kawt nilhnelh kawma lam kul leh nal zawt ahihkeileh pichingte le vakkhe theiloua inom un, kanpuak kang, naupangin vuahthuak chih khong leh adangdang phawkin hong omthei dek hi. Kholum hehu bang le hong dai in nuam thokhat chih ding hi. May kha bang le a beidek lam hinawnta ahihmanin tuktui luan hun le hithouta mah ding hi.

Security Lam, Chimai Ni

Tuni apan Lockdown 4 na hong kipan mahleh huailam gen di ka thei vak kei. Tu kha tawptan kaihsau ahih toh kisai tv leh media dang khong le ka na en kholkei-in  omna mun a local news khong le ka ngaihven kei.  Bangmah ngaihsak khollou,  ei omoma i om mai leh nuamzaw abang. Himahleh, neukha lungsim hon kam khat bel a om. Sakhau Apan Mobile Che chih 15.5.2020 a ka gelh, a nitaka ka blog a post dia ka kisakleh ka delete kha laizanga.

Lockdown 6

Ni-te hong liam zela lockdown 3 bangle a bei kuan hong hita mai hi. Vaihawmten aban bang hon chi paipih di uam, tukal tawpin hon puang nawn ding uh hiven. Huchi kawmkal ah ei kiangnai North East sunga dingin Tripura state leh Assam khopi Guwahati ah hii kai hong tam guih mawka, mundang a le muhkhiaknailouh a omlai diam ah. Green zone hi, muhkhiak omlou chihte chu a bitlai dana ngaih ding ahi phot peuhmah dia. Bang hong chi tou zel diam ah chih hiphot hi.

Lockdown 5

Pupiten Lockdown 3.0 hon pat zet u leh kholai ah thawm hong om vengvung ngala kholai dai khepkhup nawnlou in vakkhiak, office kuan leh paivel khong le hong ngeina pian deuh bangta hi. Hi khialkhual nawnlou, lampi banga le motor kipel ziahziah, a horn khong ging vingveng, traffic point a le din hong ngaita ahihmanin inn pua a i pawtkhiak chiangin lungsim thoveng leh zangkhai deuh abang hi. Ama a zaw kholai le hi vukvuk a, police lamte chihlouh muhding ommangloua ki hi dedu simin nuamkhinlou hiven. Bang hong chi paitouh zel peuhmah diam ah.

MUKTUAM BUT (Lockdown 4)

Muhzoh sunsun i hon bulha, i nak(nose) leh muk ki tuamkha ahih manin i nak (breath) chianga hu pawtte nidang dana olsamtaka paisuak thei nawnlou in hong lumsim hehu-a tunglam hon uktou hi. Phalbi lai a i nak chia i hu a khu a hong pawt bangsim in a khu bang muhtheih in hong om maimah hi. Tunglam hon uktouh chiang in mitbulh sunglam ah hu hong ki kholin hong noma, chianglou ahihman in nuam nenua khollou hi. I muktuam in zillou ahia, a butdan siamlou i hia chih lah kitheita lou. N95 a chihte khong uh bang a chi diam ah.. I hihpatna ahihman hin teh chisuk in ki zangzang mahleh kal khat val bulh nungin le nuam ki sathei taktak naituanlou hi.

LOCKDOWN 3

Lock down chi a ka gelhmatlouh sek ka ngaih apha kei a, tuni chu google panpihna la a ka etleh dictionary khat ah hon piluta, huai ah lockdown chi in ana gelhmat ua, a nung uh kon zuita ding. Ni bangzah le hita ahia, zing chiang a Pu Di in a ni 9 ni zan dak 9 a program ana khat guanggalh khin ahihleh tuni a ni 8 ni hi ding eive. Dictionary in lah suangkulh tangte.., midang toh kisaikhalou dia koihtuam  chihdan lam khong ana hoih gen sim leh hong lauhhuai thak phing abang dek hi.

Lock Down 2

Zan in ei bial lam, Assam bang ah positive hong pung thut abang a, tuni in Manipur in a nihna ding neita chihleh Arunachalten a bul hon panin khat honneita uh chi zak in om hi. Sunnitum phial in utube ah la tuamtuam ka ngai a, covid lam ka ngaihven kei. Ki kailou miau ahih chiang in office nna lamle ka buaipih kei, phone call thum hiam ka donga huaite ahi mai ding official nasep. Inna office nasem chu ki hi buang. Sir Langchinkhup, DGP hia IGP, ka gelh leh ka chiang kei thak, amah zing chiang khong in a ki dong ngam diam ah. Whatsapp in ka kihou zek ua, i gam bharat thu  lamlam peuh ka gen uhi. College kaikhawm khit kimukha nawnlou ka hi ua, kum 30 val ahita. Eh! Ka zuau, Imphal a a office a tualgal nuai lai va vaklut kha zual, amah buailua ahih chianga kihou le kihou man manglou a ka kikhen pah uh ka mangngilh kha a hi. A tawplam in kou omna a a canteen lamlam khong ka genlut kha ua, van leinopte leina dia mi khat ana houpih a, ka min leh phone number ana pia, huai pan hon contact di ahi a chi a.

Lock Down 2020

Covid 19 a chih uh hipi len ziaka thilteng kikhak  a pawtkhiak theihlouh ni 6 na ahiam ahita. Pathian zar in inkuan in ana ki omkha geih a, a chihzia khopmai, Hiai hii leng tungtang gen leh sak a tama, sorkar tuamtuam hi in sahkho tuantuam a heutute hitaleh  a gente uh sim ding, ngaih ding a dim in om hi. Himahleh huaite va sim leh va ngaih sen ding le abang kei. Ngaihsak luatlouh bang le hoihzaw leh kilawm mai hi. Theihseng ding hilou ahihman in. Pathian a kingak a, sorkalte thu man a inn a ki om hithiat hoihpen mai ding in a gintakhuai.