T. Zorampela Laibu Honna

Man leh hunneih deuh chianga ngaih dingin hiai ah park ni

http://bluewaverecords.in/guitar-legend-t-zorampela/

C leh CH Tungtang Kamkhat

Social media ah C leh CH toh kisai gen-leh-sak hong omom in beitheilou ding bang khong hi. A kum a sim bang hong hita in bang hiam tenga meimatum bangin hong puang leh uang deuhdeuh le bang hi. Pai toutou ding a bat manin a poi khat ahi. I etet chiangin lai ahihkeileh laimal lam le hinawnlou a i nam sunga kituahlouhna om latkhiakna phih khat le hizaw houh bang  hi. Huai ahih zenzen leh bel  nam sung kituak le hiai le  veng mai ding bang hi.  

Thumna: Hong Pezaw Ding

Hiai ka neikei a,

Huai ka kiphamoh hi.

Hiai ka deih a,

Huai kei din a kul hi.

MUHDAN

Ka neulai in
Nungakte alian thei ua,
Tangvalte sang thei peuhmah;
Nupite hat thei ua,
Papite hangsan thei mahmah uhi.

PAU I CHIH

Senneu a tongdam i zakte

Tunnu zuapa lohdan mah

Khanletpih a zangtou i hihman

Pianpih tong a ngaihna omchiat hi

TU HUN A LAIBU KEPBITNA KHAT

Internet i hon zat nung un i pau tuamtuamte ua laigelh muh ding a hong tam sot mahmah hi. Nidang chile, kum 15/20 khong paita in niteng a kihawmkhia newspaper nih le thum, khateng a suak magazine khat le nih, kum khat a siamsinte bawl magazine, saptuam tuamtuamte journal chih khong hi lel ding a,  adang laibu a kibawl mawngmawng kum khat in tam hetlou ding hi. Huchi lel khong i pau a laigelh sim ding om ana hi sim hi. Internet i hon zattung lam un yahoogroups khong, phpbb forum khong leh website khong ah laigelh sim ding leh ngaihdan kikup, kinialna hong tam sot mahmah hi. Tuni in facebook group, mimal blog, website a dim in om a, laigelhsiamte gelh sim seng ding hi nawnlou chihtheihta ding hi.

ZOL LAPI

1.Keuhthang, Penglam laitual lenna, (8)
Zolawkta, Kawlva, Muvanlai  lenna (10)
Akmasa khuan’ Jingsol aksi tanna (10)
Zogam, Phualva dungsun Zomi luahna (10)
Townbus totlouh vangkhua vanlai zom (9)

PUAH TOUH ZEL NGAI HIH TUAK

Hitang-khosik chihdan in tukal office ka kaikei a, zan nitaklam in hiai ka blog neukha ka puah zual hi. Tuni le sunzom ding chia ka et dek leh a puah lam a paikhalou in a kigelh mun khat ka sim zaw kha hi. Huchi in a masalam leh tulai a ka laigelhdan a kibatlouh lamtak ka phawk hi. Lunglut a kihi di chu, siam man hilou in na ki gelh kha zekzek a, kep khaklouh a mangthang bang le ana omsam ahihna a a kepna dia hiai blog ka bawl mah ahi a, mi a ding in lungluthuai kei mahleh ka phawk khak chiang in ka va dak zel hi. A khenchiang in kha nih ka thum nung bang in ka va dak a, a khek chiang in lah ni khat ni nih nung in. Lehlam ah tuh hiai a ka laigelh omte ZogamOnline website ah a omkim phial maithei.

NAMPUAN KHAT

ZOLMA 2013 ding a  ZOL Lamka chapter nasa tak a ahong kisak vengvung thawm un zak ahih chiang in tulai internet hun a i omdan leh thil nasatak a kikhek ahihna gelhkhia zual in sakthoh dia la a ana bawltheih uleh hoih chin ZOLMA 2013 FB Group ah lawmte a ding in ka post hi. A kaih, lasiam Muan Hangzo bawlsak ding a chi ua; ni bangzah hiam nung a Jammang Guite toh ka kihouna uah, "Muan Hangzo in a lathu pen pau tuamtuam a bawl ding in lem a sa diam" a chi a hon chih leh, lemsa chiahlou a pau tuamtuam a bawl dia hiai ki gelh thak ahi hi.

By Ginpu Guite on Monday, November 4, 2013 at 2:37pm

NAMPUAN KHAT

-Phualva

Nopni dahni a silh leh ten, nampuan
Kawlgam vaigam a Zomite nampuan
Et in lawm mahleh azia kikhatlou
Kikhat leh etlawm zaw kan lai ding aw

HUN KIDANG

By Ginpu Guite on Tuesday, October 22, 2013 at 6:29pm

Tuni a ka gelh, LA A SUAK THEI DIAM AH..Internet era la deuh ding na saknop ua leh ZOLMA chiang a sak dia a kaih na na ki bawl mai ding uh ahi di CHU. A vual teng syllable 9 vek a kibawl ahi a, a kaih bawldan lemlou khong a om diam ah. A kaih khong na na bawl zenzen u leh a gelh/phuak kha PHUALVA chih ding ahi. Na na bawl kei ua le chu a thu ki khek lai kha ding ahi VE :D TUAH KHAKKHAK KI GELHSUK MAI AHIHNA AH KI ENTHAK LEH HELNOP AHIAM KHEK UTNA BANG OMTHEI CHIH THU AH.

KEI

A tun sung mimbang piang
A nunnuam nuamlou om diam
A nei-ahau, nek-leh-dawn niang-leh-tai
A zawng daipam a kuamah peuh
A lungawi, nunnuam den lou
A hang khat om ding hi

Laigelh

Laigelh i chih haksapi a batna lah om, baihlamtak a batna lah om khat ahi a chih theih mai ding e. Atangpi in haksapi i chih thil taktak, issue taktak, thutak suichian ngai leh a dikna theihchian ngai, suangtuahna thukpi zanga thil omlou/tunglou khong a om, a tung bang a gelh  khongte ahi deuh ding a; baihlamtak i chih pen thil houchik, i muhzual khong, lungsim a hong pawt zual khong, niteng hinkhua a i tuah khong etc ahi a chih theih ding. Amasa pen a gelhte hi in a simte hitaleh lungsim piak taktak (serious) ngai deuh dinga, a khatpen bel zangkhai leh thoveng tak a gelh leh simchi ahi ding.

Lai Kum Bangzah Neita?

Lai chih kammal i neih man a sawtpi apan a lai ana nei nam ihi chih ahihkeileh lai i neihna sawtpi hiding a gintakna om mahleh i lai i suipha nawnkei a, Pauchinhau lai i chih lah kizang khollou ahihman in tuipi gal  mikangte i gam a ahong lut nung ua kibawlte i lai neih patna ahi i chi ding. Gendan dang in genle, i savun lai, ui in hon neksak i chihte pawl gintak taktak theih dia suichianna omlou ahihman in lai i neih hun i gen dek chiang in mikangte hongpai nungate mah pansan hong ngaita hi. Mikangte hongpai nungate pansan ding hilele a koipen tak pansan a lai kum bangzah neita i hi hiam chih feltak a chiamtehna bawllou hile kilawm bang sim hi.  

Siamsinna Leh Vakiangbu

Siamsinna Leh Vakiangbu te’n website bawl sawm ahihdan uh Kikim apan FB in ka zakha a, huai nung sawtlou in a website ua thugelh ki post a simnuamte sim ding chi’n FB Group tuamtuam a ahon phoukhiak chiang un website bawlkhin uh ahih ka thei hi. A website uh ka va vehpah kha kei a, zanlam zek, zansawt nung in ka va lutkha hi. Ihmut hunta ahihman in thugelhte ka sim kei a, website sunga kikoihte ban et zualzual in ka lumta hi.

Internet Ah Zong

Ka lawm, Internet  a ka lawm hi

Ka nau, Internet a ka nau hi

Ka lawm lah hi, Ka nau lah hi

A lawm, a internet lawm hi’ng

A u, a internet  u hi’ng

A lawm lah hi’ng, A u lah hi’ng

A lungkhamnate a u kiang tun a

A buainate a lawm kiang kum hi

A lungkhamnate a u in neem a

A haksatnate a lawm in khamuan hi

Inn ah i omta zong

Gam ah i omta zong

Koi koi ah i om ahita zong

Lungkiak, mangbatni a omta zong

Mihing khat-leh-khat ki panpihtheihna

Internet nangawn ah ahithei tan om veve hi

Selung Tangthu

La thu mah houlim nawn ni. Tahan Melody-te la, a music video a aphuaktu “The Rengs” kichi, Selung Tangthu chih ahi a, a phuahna  pau i siam in daihkei mahleh theih dandan in hiai la tungtang gen sin ni. Adiklou a om leh a theizawte’n hon kum in hon gen le uh chih i ngen bok hi. Hiai i gelh na zenzen ziak ahihleh, tuailai laphuah, lavui phuah lam khong a lunglutte’n hihdan tuamtuam omthei ahi ngut e ana chih theih ua, lungsim zang a omnailou a hon omsak na ding ua lamlaktu ahih khak leh thu-leh-la lam a khanna, phattuamna hiam om kha thei ding chihman ahi.

A Chi Ding

A chi ding in kiging in khangnou aw
A chi ding in kisa in tangpal aw
A chi ding in kikem in lianu aw
A haichi chi ding poimoh hi

LAI GELH DING

GAM LEH nam khantouhna ding, i gam bawlhoihna ding, khotang hoihna ding chih khongin i vei leh awlmohte kuapeuh in i gelh souhsouh hi. Thugelh bangchituk in hoih in simnop mahmah lele pulpit a Pasianthu gensiam mahmah khatin thu gen a, a ngaikhete’n le nuamsa mahmah uh, himahleh a taka zui khuk om tuanlou chih bangin a i laigelhte in a taka nasem tuanlou a a phattuamna gen ding omlou a diam chih theih dek ton om hi. Huchi dinmun ah laigelhte’n gelhgelh lai ding a ding uam chih theih dek mawk hi.

THU

Hiaipa’n bangthu gelh sawm a taphet de aw chi’n literature lam khong na na muangmoh maithei, ke’n le bang thug gelh sawm ka hia chih ka thei nai kei. Thu chih thulu a zanga abul pan ek mawk in, a hong pai khak na lamlam a pai sak mai ding chi dan ka hi. Thu chih hi i pau ah a zatna a tam khopmai a, i gen seng kei ding chih le a lauhhuai zaw abang. Pau tuamtuam zangte bangin le thu chih thumal ana nei ve tei uh abang hi

LAI LAM THU: THANKIK TUNGTANG

ZOLAWKTA APAN ka lei ZOULUS Journal, December 2007 in Nagaland a ka zinna ah ka sim a, thankik tanchin ka simkha hi. Thankik toh kisai Zomite’ ngaihdan leh kei mahmahin neulai a kana ngaihdan leh ka hih khak khenkhat – gamlaka i pai chianga a aneupen ki nunung sak leh thankik in na chilphih ding a khangtheilou ding chia a nununga ki paisaklou chih khong leh lamha a kiak chianga thankik ha hoih toh kikhek theih chi a, ha tunglam ahihleh intung saklampanga a (i ha kia pen meihol toh patzam a tuna) ki lawntou chih khong leh thankik puanpi gan etc telkha ahihmanin ka thankik tanchin sim simnuam kasa mahmah in ka tui ten hi. Agelhtu bang siam kasa in a laigelh original kasa mahmah a, skul subject khonga tawi dingin le hoih phial dingin ka gingta a, hiai mipa kua a mawngmawng de aw ka chichi hial hi.