Kol leh vai

India mite genna dia Lusei, Hmar leh eipawl in vai i zat uh Thadou, Vaiphei leh Gangte in kol chi ua, kawlgam unauten kala chi uhi. India gam i chih gam lianpi a sung a chi leh nam tuam tampi omna ahihna ah kol, vai ahihkeileh kala i chih chiang a kua teng huam sak i hi hiam chih ah “hiai teng huam ahi” chia va gentan geih haksa ding hi. Zosuante'n ei omna mun a India mi i muhphak leh theihphakte vai (kol, kala)  hisak ki hipen ding hi.

KHUA

Tuni office a naseptha suaklou va mawktut di lah hilou deuh chi a, dictionary dia thumal kaihkhop laka khua omte lakhia in, khua thumal omzia ngaihtuah ka sawm leh mi hong lut  omom in deihbang a ki lutthuk zoulou hi. Himahleh ngaihtuahna a hong om neukha bek gelhkhiak himhim sawm in ka gelh hi. [September 30, 2022 ni a whatsapp group a post, 10.10.2022 ni a puah a gelh phat ahi]

AHIHLEH

Ei pau zat - thugen, laigelh, gelhsa simkhiak chihte awlsam leh baihlamlua hi khollou hi. Ut dandan a paukhiak leh gelhkhiak mai theih mahleh thugen a pauzat, laigelha pauzat ahihkeileh laigelhsa sim siam leh siamlou kikal om ding hi. Laigelh khenkhat i sim chianga mam zaih, gennop genkha, a sim le nuam i sak bang om hi. Huchimah bangin mi thugen ngai le, thugentu in emotional a mi a zohtheihna pelah, a pau zatdanin a gennop gen chiang leh bun deuh bang om nawn hi. I TV news, interview, film, serial, show tuamtuam youtube a omte khong i na et/ngaih khak chiangin a ngaihnuam deuh leh a nuamlou deuh i sak bang na om sek hi. TV news khonga a simtu sim siam leh siamlou deuh om mahleh sim dia news gelhtute’ gelhsiam leh siamlouh ah le kinga mahmah ding hi.

Subscribe To My Channel

Tulai mobile, tablet, laptop a ettheih huihkhozop (online) muhnop (media) tuamtuam tampite laka khat, youtube toh kisai houlim zekle chi hi hang. I theihveksa bangin youtube ah Entertainment chituamtuam, technology, automobiles, gadgets, cooking, gardening, travel, vlog, reviews, motivational, inspiring adg. a dimin oma ei tuina lam chiat et/ngaih theih hi. Sappau a ngainuamin sappau, vaipau le huchibok, ei Zosuante pau tuamtuam ah le tampitak omta hi. Youtube omna sawtpi hita mahleh Covid19 hipi len sungin a thil koihte hi in a ente hitaleh, a kua peuhin hun hau ahihmanin youtube hun lemtang hong suak a chih theih ding.

Eipau A Sappau

Eipau kisiam zoulou deuh ahi dia lai i gelh chiangin sappau va helkhak zek ngai om veu hi. Eipau gelhna a sappau malkhat le telsaklouh ding chih ngaihtuah khak sekin oma, huai sawmna sappau a thumal i na zat zongsak khenkhat eipaua i hon koih dek chiangin buaihuai sim hi. A thumal midangin eipaua ana koihsa omnapi en i na theih khaklouh bang omthei a, laigelh teng ah eipau thumal bawlthak kawm le hang midangin le huchimah in ana hihle uh thil khat genna  kibanglou tampi nei  teltul mawk le hoihlou ding bang hi. Huchibang dinmun ah eipaua letselou a sappau mah zat suk hun oma, sappau eipau dana kaih dan tuam i neih zulzuia gelhkhiak i sawm ton bang omin zuih kichian ki neitheilou hi.

Zawlnei

I pau a Laisiangthou i hon neih toh paumal/thumal thak tampi leng kinei khawm hi ding in gintakhuai hi. Khosakna a poimoh, i kimkiang a thil om i muhkhak leh theihte,  i sahkhua leh gindan a genneite, nekzonna leh khosakna khong toh kisaikhate khong i pau a thumal na kinei lel hi dinga, i sahkho thak (Christianity) kibulphuhna Laisiangthou, pau dang a pan ei paua lehkhiakna ah eipau ah omlou, eipau a gen haksa tampi leh a lettute pei lungam thei thumal leng tampi na om ngei dingin a gintakhuai hi. Sappau a prophet chih bang le ahihna tak ei sahkhua leh ei khovel a na om khollou ding ahihman a Laisiangthou toh i neihkhop paumal thak hi ding in gintakhuai hi. Tuni a Pathian/Pasian genna ding in Laisiangthou letten thumal dang ana zang hile uh huai ana himai ding hi.

SIALNEIH

I gan neih laka a lian leh manphapen a i ngaih sial hi ding hi. Gan tuamtuam –ak, ui, vok, kel, belam, bawng, lawi etc  i khoi a, a khoitu i hihmanin a neitu i hi hi. Sial pen aneitu kichi mahle gan dangte bang in va khoiluat hiam a giahna ding ngaihtuahsak hiam ngailou in gamlak, loutul khong ah a honin taa in na hing mai uhi.

TE ZATNA

I pau zatdan leh gelhdan ah khat sanga tamzaw genna dinga TE i zat toh kisai neukha gen zek le chidan  i hi. Khenkhat ngaih in houchik bang le ahikha maithei, thil houchikchik a i ngaihte bangle gengen leh houlimlim a kul ton om ahi i chi ding. Min ban ah TE i belh chiang in (gtn – Sangte), Dapzar lam a TE=NEU chihna dan hideuh dinga, ki noutawina hi ding hi. Huaipen tua i gensawm toh kisailou chiphot ni.

Pau Vai

Tualsuak, mimal etdan apan Zosuante pau dinmun gen zek sawm hi hang. Muhdan kibanglou a om tham dinga, pau toh kisai sinna nei, asiamte et in nuihzakhuai pi bangle hikhamohlou ding hi. Abangteng hitaleh etdan, muhdan khat ahi tei maia,  muhdan tuam neite’n le a hon gelh ding ua, zilna nei, asiamte bang le hiai  laigelh in a kaihkhiak zoh a ahon gelh uleh hiai laigelh lohching  hi ding i chi masa ding.

SIA

SIA KICHI kammal hi kawlpau a saya a kipan a laksawn hi dingin ka koih hi. India Zomite’n i kianga vaite, meiteite pau khong tampi i pau buhpang sung ah i seklut khin bangin Kawlgam Zomite’n leng kawlpau tampi a laklut uh om hi. Sia chihpen le huaidan hi ding hi. Pupate hun lai apanin i society a anniam-ansang (hierarchy i chi diam social stratification) na om ngeilou ahihman ahi ding, mi zahtakhuai hiam milian hiamte sapna ding kammal na ki neilou mah hileh kilawm hi.