NAWI

Facebook a kinakzat thumal khat ahi a chih theih ding. Mizoramte in a zang deuh uh. E’n numeite  “nawi” i chih ahiam bawng nawi ahiamte ahi kei. Atheilou a omleh bang a chihna uh hi ding hiam chi’n  a buai maithei uh. Eipau a a kibatpih chiah theilou ka hihman in k’on genchiang thoh sawm ding. Nawi chih hih kisangzinga naunen a om nengnung, insung bang go nengnung chihdan lam kawk hileh kilawm kasa  hi. Mimal khat nawi i chih chiang in lah mellat dan ale fel mellou a hi netnut ahihkeileh  kampau a thil bang le gen chiangthei nemnumlou chihlam khong kawk leh kilawm nawn hi. Nawi chih huchi dan khong ka genchiang theih dan ahi phot ding.

PaKang: Khua Hun Toh Kituak In

Khokhal lai, March khatawp kuan hi hiven. A khua uh, Chiangkot a pan Lamka zin ding in PaKang phalvak in  kipan khia hi. Hiai khuate kikal khe a pai in tuailaite leh papi hatdeuhte kia nikhat in tungsuak zou uhi. Lamkal a zintun haksa chi’a giahlouh sawm a van giklua deihlou chi in antun genlouh a tuithawl leng a paw kei hi. A kawlzal kuah in a khut ah tem tawi lel in pai hi.  Kipan baih ahihman in khosung  nupi belte thou lel ua, nungak fel khat leh nih in leng sumtawng a ansuk panta uhi. Nitak a aki houna bang un Chingbem te inkong lam  a tawt phei leh a lawmnu’n sumtawng a ansu dia kisa kawm in ana ngak a, chibai kibuk leh mangpha kikhak in a kihen uhi.

DOUNGEL BULPI AISANPA'N UPA, GUITE (LAMJANGPA) LEITOL A UPA SONG DONA

PAN DUKAN

India gam a omte’n thei vek mahle, a theiloute a ding in Pan Dukan gen zek phot le. Pan i chih chiang in vaite’n “kuva” a chihna uh, kuva i chih nawn chiang in mikangte’n “betel” a chih uh genna in kizang tangpi hi. “Betel” chih pen a leaf (ateh), a nut (a gah) leh chinai (lime), zarda (tobacco) etc khong toh gawmkhawm a tuibuk i muam bang deuh a vaite hai sek ahi. Vaite hai i chih hangin tuni chiang in ei pawl le hon loh gawpta uhi. Kuva genlouh kawlgam bang ah le Bihar khong  a kibawl scented khaini (Golden) bang ana muam lua uh hileh kilawm mawk hi. Dukan i chih nawn chiang in van zuakna, dawr, sai chihna hi nawn hi. Pan Dukan pen kuva zuakna dawr (neu) ahi i chi thei ding. 

THEIHLOUH DOT

Nasepna Guwahati khopi a kisuan join khin, sep ding assignment hon pe fel nailou uh ahih man a sep ding om khollou, tuni (19.1.2012) IT Room a computer awng khat a ka tut leh ka phone hong ging ka lak leh "Pu Vangai tang lamte magazine hong zuak ing a, nang inn a lah ana omlou chin a" hon chi hi. Amah kua ahiam chih ka dot leh ka tute khat, Guwahati a om ana hi a, Dodong (ka tapa) toh inn a om ahihdan khong a hon hilh hi. A Vangaitang lam magazine' zuak zanhal a Pa Thangte in a ka muhkhak sa, a bu a Rs400/- chih kigelh hiven, "Bangzah a na zuak uh eita?" chia ka dot leh "Rs200/- ka chih uh ahi a, a tamzaw le piak theih" chi in hon dawng hi.

SINGPI HING

Britishte hong theihsak man-a singpi dawn ki hi dingin a gintak huai hi. Missionaryte’n tanchinhoih hong theihsak nung un nidanga zu i zatna tengah singpi i hon zangta a, tuni in i society ah singpi a loutheilou khat a hong suakta.. Khotang thilte ah singpi in zu a hong nohkhiak sak-a, i puzukholh leh bangbang zukholh hiam-te ah zu kikhol lou in singpi i kikhol zawta hi. Mimal inle gilkial dangtak hunin kholai a hotel khong ah singpi i dawna,  insung ah leng zing, sun, nitak chih bangin i dawnin lenglate bang leng i dawn sak  hi. Sungna nei khong a dawntheiloute bangin le singpitee tellou in “singpi puang” chi in bawngnawi, tuisa toh chini hel singpi dawnin i dawn hi.

GIM NAM

Kei zuan na dinga tangkhua khal

Heina peuh lenmui kai ziiziai

Huihkhi hong lang ngaih gim hong nam

Tang kei sinlai hong kuai ngaihnou

Thelnah lengin zaideih awi e

A tunga kigelh Lengtong Pauno  la dawng khat ah huih hong nun hiauhiau leh ngaih gim a hong nam a chihna hi awmtak ahi. A ngaih' (numei)  bang ' gim  chiah a genna ahi diam ah. Numeite sam khongin gim tuh nei hileh a kilawm nguta, huai gen a diam ah, a gimnamtui kinuh uh gen ahi diam, lapau a omsa himhim ahihman a ahon zat ahi diam. Mimal chiatin le zaw gim kinei mah ahihtuak. Huai a genna ahi diam ah. Singtang khonga lou nasem, nin bitbiat in hoihtak a le kisil gige kholloute gim leh khopi a insunga tui kai ziahziah nitenga kisilte a gimnamtui a kikap vitvit-te gim kibang hetlou hi. Lou lampi a nupite nung banga i pai khak leh gimnam khat a om thei abanga, Pauno in huai dan khong gen a diam, a bang pen gen ahia ka thei kei. 

THIL CHI MAI NI

Laigelh leh laipoimoh khenkhat kepching khaklouh om nak sek hi. Siam kei lele, topic tuamtuam, lai hi, a kha in hon matkhak chiang in ka gelh zel sam hi. Ka laigelh khenkhat website a ka suahsak louh computer a ka kepching ka mansuah a om nual hi. Computer a hoihtaka koih kichi tawk lele, computer kisiat chiangin leh a thak lei chiang khong in sukmang khak in om nak hi. Tuni, 3.5.2010 le Shillonga inn a omin, ka laigelh khenkhat ka blog leh internet khong ka zon leh ka muzou kei hi. Aizawl a omlai khong in Zolawkta (J.Thang Lian Pau) in a laigelh leh lai poimohte CD khongin fel takin a kemin a kawl sek a, amah bang ka phawk zozen hi.

BANK LOAN KHONG LEH EIPAWL

Loan chih i theih teksa bangin bank ahiam, financial institution khat hiam, mimal khat hiam apan sum a pung toh ditkik dinga leitawi a chih theih ding hi. Financial institution tuamtuam leh ei laka sumpung hawmte apan a leitawi i gen kei dinga, bank loan toh kisai khong hi zaw ding hi. Bank a sem hilou i hihmanin bankte dan leh dun i thei kholkei a, gelh diklou hiam gelh fuhlouh hiam a omleh bank a semte’n a dik hon gen mai ding uh i chi ding. 

SIAMSINTE LEH SINSAKTUTE

Nikum lamin kawlgam a lawmte khatin India ah Teacher kammal eipau a bang zang i hiam chih hong kan hi. Sia ka zang kei ua, sinsaktu khong ka chi ua a khenin Meitei kammal kawmin Awja achi ua a khenin (Aizawl lam suak hingei ding) Skulpu khong achi uh ka chi hi. Laisiangthou khonga le sinsaktupa chih khonga kigelh ahihmanin eipau a teacher genna dikpen sinsaktu hiding hi. Kawlgamin le kawlpau khong kawm maia sia na chih sangun  sinsaktu mah chile u chin hoih zaw ding hi khong ka chi gawpgawp a, sia pen ana zatsa uh ahihmanin genkha pen sa-in deihbawl deuh hileh a kilawma,  ka thilgen amen lawtellou abang kasa hi.

FM RADIO CHI GEET NI

Bangchik a ngai ngei le hilou pi zannitak in naupangte MP3 player a 100.7 MHz a ki broadcast Aizawl FM Radio ka ngai kha laizang hi. A hun le kana chiamteh kha khol kei hi. Ka ngaihpatna ah English la ahi a, Radio Jockey numei khat hiven (a min agen ka mangngilh), a zei mahmah maia, sappau lah a neh boka a aw lah hoih si, a ngaih nuam kasa mahmah vial hi. Huai khitin Hindi lai a hon play ua, Hindi RJ le numei mah ahi a zei mahmah thou vial hi. Huai khit lamin Mizo la ahi nawna hiai a nu pen chu a puandan apanin RJ chih sangin announcer chi le kilawm zaw leh kilawm kasa mawk hi. Himahleh a gente apan a ngaikhetute toh kipoh mahmah uh ahih akilang thou hi.

SILHPUAN

Kichei-kithopna a i zat puante namdang-kawl, vai, sapte etc in a neihlouh, zatlouh, tuamna nei mawng mawng ahi i chi ding. Numeite kicheina gen i hi deuh. Namkhat hihna nei i hih man a kicheidan tuam khat anei i hi chihna hisak le. Houlim na ah... huaile, huaile eipuan ahi, huaiten hon zatsakuh, hon sut uh ahi .. chih khong i za sek. Hiai adik leh diklouh thu gen zaw lou in, kicheina puan kikopthei hiam kituhthei te khat ahih uh provetu hi zaw lou a diam chi nuam i hi zaw. Khat hi zen, ki hui tuam sawm hang a lah hithei tuanlou hi zaw kha ding hi. I puante khat i hihna hon namkip saktu a pansak a, pom a, a zatna tuam chiat neihsak a akuapeuh in zat vek dan kizil zaw le. I neihsa puante a tamlua ahikei a, muntuam, hun tuam tuam a zat ding a bukim a kidaih hi nai lou hi. A omsate kituh sang in a kimnailoute zonkhiak, bawlkhiak i nasep ding hi zaw ding hi.

MANIPUR FILM INDUSTRY AH

Vai film ki kham pen local filmte a ding a opportunity hoih a suah deihna leng hitham ding hi. Film bawlna lam toh kisaia zil ngaite leh a technology poimohte thei leh nei in bawl le market hoihpi khat houh hilou ding a diam...

DIMAPUR HI

Nagaland a om Dimapur hi khopi khang hat mahmahte laka khat ahi ngei ding. Naga nam teng omkhawmna, Nagaland a dia a commercial capital uh ahi leng a chih theih ding. Sumdawng liante a tam zaw vaite ahi ding in a ginhuai. India van hi-in gamdang van hileh N.E. a dingin a kim na pawl ahi ding. Van leitu a dingin leng a kiman bok. Aizawl khonga kicheina van hoih leh mantam kizuak uh “Bangkok a mi” chih tamtak Dimapur apan a kila ahi a kichi ( adik leh diklouh zaw thei khang). Sumdawnna lama etin N.E. India a Guwahati zoma khopi poimoh ahi thei mai diam?

DUBAI LAM AH

TUNIi’ MI khatin a tanu Dubai a va kiloh dinga pai dek ahihdan a hon gen a. Nu-le-pa’n ka phalkei ua theihtawp suah a ka khemkhem hang un a tum tintena, a mangngilh theikei. Kum khat bang a hong kiveia kap zena hon nget chiangin ka ki ngaihtuah thak ua, enkhe ding ka chita uhi. Ei neulai a Silchar zin nangawn i huphulh leh a passport ding bang Guwahati a va pai-in a lawmte toh meltheih nei le hi tuanloupi hon saifel zungzung mai ua. Khangtahkte’n thil a ngamin a ngam ua a phu ua loh le a lohching zungzung mai uh hi’n ka thei. A visa leh sepna ding ahileh ka tanaute uh Dubaia omsa khat toh ngaihtuahin kou buai ngailou in bangkim a hon sufel zel mai uhi. Huchi in a kalnawn chianga zinsak mai ding dinmun ah ka om uhi a chi hi. 

FUTBOL PEK SIAMTE MABAN

1989 DECEMBER a Napean Sea Road, Mumbai a Pu Dongzathangte inn a ka va hoh khak in a tangvalte uh khat Tennis ( hia Badminton?) kimawl a pawt khia na om hi. Huai toh kisai gena ka houlimna uah a pi un ei lama mi ki zawng lua a individual games (expensive deuhte) ki zouloua kithanglou, a expensive lou mi tampi kimawl theih football leh volley ball chih khong lar ahi chih a genkha hi. Hmmm… ka chi sima, tu nunga ka ngaihtuah chiang in dik lotel ding in ka koih hi.

EI ZAU LAMA INTERNET SERVICE TUNGTANG

TECHNOLOGY KHANGTOU zelin hon phata himah in teh, i gam kilkawm khong apan a le internet zattheihta chih khong a kizata. Aizawl English newspaper khat, NEWSLINK in zanlam a internet sawtsim a down lai-in news suahlou ua, a nunga a genchiangna uah Internet down ziaka news kisuahtheilou a simtute theihsiamna a ngen uhi. Newspaper khatin amau maha news kaikhawm theia a suah di uh hi awmtak, internet apan a ban laksawn ua suah ahi di uam chihsim in a oma hiven, profession tuamtuamin le internet zang phatuamta himai lou di hia…. Bangteng hileh mimalin a phatuam lua a zang hi kei lele i gam ah leng internet poimoh leh ki hahzatta ahi a chih theih di e.