KHUALGAM A VAN KIZUAK SAK

I POPULATION tamlou lah gam tuam, mun tuamtuam a om i hihman in laibu hiam, music album hiam khat tou i bawlni khua in a zuakna lam (marketing) ah haksatna i tuak sek hi. A bawltu in lah a sum sen teng muhkik banah a gim a tawlman neukha beek muh khiak nawn ut, mun tuamtuam a omte in lah ei pau, ei khutsuak ki deih thou zel ahih chiangin  lem leh lemlou in zuak/lei i sawma; i lei theihlouhte leng leilouh a neih i sawm mai ton a om hi. Mun tuamtuam leh khotuamtuama a zuakna mun ding bawl theih dinmun hilou ahihmanin koi hiama mimal kua hiam khat ngansiah a zuakdan lampi i zon mai takdih kul hi.

KHILAI

Ei pawlin “Koi kuva hon khilai dih.” ki chih khong i thangsak hi. Khilai chih kammal hi vai pau apan a laksawn ahih tuak. I zatdan ah tuh i maingalte i liausak hiam a neihsa uh i neksak theihna kammal ahi a, a sum petute lam ah lah a deihsakte uh a neiksakna uh ahi leng a chih theih mai ding e. “Hon khilai in” khong neel taka i ki chi borborh a i ki neksak pih theihte toh i relationship le a hoih in a smooth chihna ahi i chih thei ding.

NUNGAK HEL

EI ZOSUANTE’N nungak hel chih chindan i chi diam ngeina i chi zaw diam i neih pen thil hoih leh manpha lua khat hiveh e. Namdang chile, vaite chih khong bangin nei khollou a di uam ah, sapte’n chu dating a chih uh kha ahi mai dia, ei kihel dan bel hon tuk zoulou ding uh bang kasa hi. I kimkianga (N.E. India) a nam tuamtuam in bang a chi neih di uam ah, talpakte bang le kihel khollou uh hilou hia le? Khasi/Jaintia te’n le nungak hel chih dan nei na lou ding uhia chia ka risk leh BahPro Tanu chih article ka gelh loh hial aka.

KAMSIAM’ TOH KISAI

A KAMSIAMLOU penpenin kamsiam thu kon gelh mawk ding. “Kamsiam in siallei a sang” chih khong i pupate’n ana genkhin ahihmanin amau hun lai pek apan kamsiamna ana ngaina i hi chih a kilang. I pupate hunlai a khosakdan, tendan leh society paizia pen kho khata teng mikim kithei i hihna ah- i pu, pi, ni, gang, nu, pa, u etc dingte ahihna ding bangtak ua i sap, i address theih ding ana poimoh mahmah ngut ding ahi chih a ngaihtuah theih. Huai dungzui i chi diam ah, i pau a hiai kammal- “kamsiam” - i chih chiangin dangnal leh thu zol leh khum tak a gente i chihna hizaw lou in mi ahihna bang tak, i sap dingdan bang tak a sam tiautiau theite hizaw hi. Kamsiam chih huaidana paipih a gen ding i hi.

RELATIONSHIP: EI CONTEXT AH

ZOMITE KHAT-LE-KHAT kizopna (relationship) a asiamlua om mahleh a tangpi a genin a siamlou lam hi zaw le kilawm hi. A siam leh a zei mahmah tampi om mahleh, kei bang tuh a siam hetlou khat ka hi hi. Khat-le-khat relation i siamlouh manin leh mi khat leh nih kingeihloute ziakin i society ah (vengsung, khosung, khotang, organization, association, saptuam, nam etc ah) haksatna, buaina, kituahlouhna, kithutuahlouhna, kilemlouhna, kinakna etc om ahihna tan a om tham ding.