GENERAL INSURANCE LEH ZOMITE

Aizawl SSPP heutute’n “Magazine-a ding article hon gelh in” hon chih u leh, Zomite’n i phattuampihna dinga ‘Leikha’ beek ahih lamenin general insurance toh kisai gelhsawmin “Aw” ka na chipah hi. Ka hon gelh pat chiangin lah general insurance toh kisai thumal khenkhat eipaua gen haksa leh insurance i chih huapzaupi ahihman huphulhhuai hong suak thak sim hi. Na “Aw” khin ka hihman’ gelh theih dandan, ei Zomite toh kituak ding, a tomkim thei penin ka hon gelh suk hi.

MOTOR NEITU LEH MIPI THEIHTUAK

TULAI IN Lamka khopi khong ah leng motor chi tuamtuam a dimin a omta a, himahleh motor insurance lam hi i ngaikhawk zou naikei abang. Motor insurance compulsory ahihdan mipi theih dingin mawl chik in gen i sawm sin ding. Motor hi engine a tai leh bangbang hiam tamtak bulh khawm a bawl ahihna ah a koilai hiam ana sep ding bang or ahi ding banga a omlouh chiangin ahihkei leh a khalhtu lam pilvan louh ziakin accident a om sek hi. Motor neitu, a khalhtu pilvang mahmah lele midangin a motor va phutsak thei lai ahihna ah motor accident a om theia, om leng a om tou zel ding hi.

TPAs

General insurance nuaia insurance chi tampi laka khat, damlouhna insurance toh kisai kha, Third Party Administrators omdan neukha in i taklang ding. Misiamte sutdanin gam khangtoute’ population 75% in Health Insurance a zat lai un India gam 1% kia ahi a chi uh. Zosuante lakah Health Insurance a zang ki omkei leh kilawm phial hi.