Tongluan Siam

KHUTSIL

ZANLAM ZEKIN Aizawl apan Silchar pai dingin motor ah vaite khat ka pua hi. Durtlang pelh zeka passenger pua garite Thumna Mun ah zunbuk om hiven, huaia zuntha ding a khawl a motor apan ka pawt leh ka lawmpa’n a tui ka zatsak ding beisei takin “Lamkal a zunthak chia khutsilna ding chia tui ka puak ahi” chi in mineral water bawm polethyne a kitun a sunga tui om khat tawi in hon lak hi. Ke’n le “Aw” chihsan lelin zun va tha zokin a tui bel ka zatsak tuan kei hi. Lawmpa’n dawn ding tui pawlou in khutsilna ding bel a pua hi.

Khedap Suah

Silchar, 24.12.2009 nitak dak 8 lak khong ahi ding. Apa uh sanga computers lam khong ki buaipih zaw ahih thei in naupangte’n (ka ute nau) beisei takin a computer uh kisia ahihdan hon hilh uhi. Ka et leh a ki boot theikei ngeia, SMPS* sia ahih gingta in a computer uh “Hon domkhia ua leh” chi’n ka pawt khiak pih a, a inkiang ua a bawlna khat ah ka va lut uhi. Bangmah ngaihtuah khollou a dawr sunga ka lut suk mai leh naupangte’n: “ Pa Gin, khedap suah di” hon chi in kong pawlama vaite’ khedap koih hon ensak uhi. Ken le:  ”Aw.  Ahi maw” chi’n ka suah ngala, glass kongkhak sawn hongin ka khedap inkong ah ka dengkhe pah hi.

MUALSUANG

Mualsuang (suangdoh) Zomite culture poimoh khat ahi. Bang hun a pan a chin pat uh hiam chih ka thei kei. Himahleh a chinpatna uh sawtpi hih khin tuak hi. Khomun lui khat peuh zong leng, pupate mualsuang phuh ki mu thei hi. Mualsuang a samat-galmat lim a tuansakte un a tanchin uh taklang hi. I Zo ngeina a poimoh khat ahihman internet a mualsuang doh ding chi dan ka hi(Personal lua abang na a. Ban ah samat galmat phou khiakna zaw hi sam kei e).

LENKHAWM

Lenkhawm.

Khuang leh sialki khen a kisuklim, kihehnep leh lungleen thoihdamna di’a mi hon in la asak’ lenkhawm ahi chi le a genkha ding e. Sun in ki lengkhawm thou mah leh zanhah toh a kipawl diak hi. Tuni a India a om Zosuante khotang hinkhua a mun poimoh tak luah, paih aphallouh uh khat ahihman, a tanchin luh zek le tuak thou hi. Lenkhawmna a apelmoh khat KHUANG ahi, sialki a om leh bukim sem; omkei le lah khuang toh khutbet thuah in hih theih veve hi. Huaiziak in Khuang a pan in lenkhawm ah i lut suk ding.

LENKHAWMNA AH

Zanzek in ka veng ua lenkhawmna ah ka va tel a. Misi pen veng sung mi poimoh khat, VC member hiven, khuangpupa’n mi tam salou ahi dinga, la thum le li sak khitin a hong dinga thu ahon genta hi.