Lamka A Omlai

Kum 1982 a Lamka nutsiat nung kum li/nga halin ki paithei lela pai nunungpen March 2018 hita ding hi. Huchin Manipur khopi nihna leh Zosuan khopi poimoh toh polama apan kizopna haksa in thupiang ki theiphalou sim mahleh mobile phone leh internet hong om takin  a dan hong om deuh hi. Huai chi mahle tulai Lamka thu gelh di khop kitheilou ding ahihman sikul kailai  Lamka thu gen deka kinei hi hang. 

SAIKOT PAN

Zanlam zek a Bungmual a 1st (L) Thangchinlian Memorial Football Tournament a Zogamonline min a ana pang, ZOL FC te semi final a MMT-ten 3-2 a azoh man ua kia uh ahihdan ZOL FB group a hong ki post; a  chiamnuihna ahia, football pek toh kisai a a theih sunsun ana advice mah ahia,keuhthang in a comment na ah “a first half a na zoh ngeingei ua leh saikot pan in ana pang un chih chu ka gen hia ana huchi lou na hi ding uh mo??  ” chi a hon gelh leh, Saikot pan chih pansan a neukha gelh zual utna hong piang hiven, kon gelh zek ding.

Khekol Mang

1977 kum ahi in ka thei. Lamka ah laizil ding, ka unau ua inluah in ka om uhi. Inneipa a sepna mundang a akisuan a, a kisuanna lam a inkuan a pai a sawm ziak un a inn uh awnga kou luahtheih dinga hong omkha ahi hi. A khonungin a inn uh a zuak ua, midang khatin a leikhia a tuni tannin a teng lai uhi. A inn leh a mi zaw gen dah ni.

Kawlva' Phone Nunung

Tulaite’n nidanglai a laigelhthei masa, Britishte huzap khak, niteng a diary gelh thapthapte kiphalou ahi dinga, a ni leh a hun ka na chiamteh kha kei hi. August 2010 khong ahi ding, nikhat ka phone a hong ging a, ka lak leh Kawlva ana hi a, “Rajdhani ah ka tuang a, tu’n Bihar lak vel ah ka om lel uh” a hon chi hi. Ka kihou ua, Guwahati a hong zin dek ana hi hi. “Huchi ahihleh, Aizawl lam le na hong pha vanglak kei dia maw” ka chih leh, tutung a hong zinna toh kisai, survey khat a chi in ka thei,  a N.E. lamte amah mohpuakna pe deuh uh ahihdan a gen a, Guwahati apan Delhi a kik nawn phot ding in, huai khit lam chia a tuam a Aizawl lam a hong zing sawm ahihdan a gen a, kei le Kawlva’ Aizawl a hong zing ding, a tak mel kimu ding, houlim ding le tam chi in a hong zin ding ngak in ka na phur mahmah hi.

RADIO HUN LAI VEL

Kum sawmnih khong paita sungin music ngaihna vanzat kikhek nasa mahmah ahihmanin tuni a khangthak te’n Radio, Record Player leh Tape/Walkman chih khong theipha nawn khollou uh hi mai hi. FM Radio mobile phone leh mp3 player khong in kengtel sek ahihmanin Radio bel hong lar thak a chih theih ding hi. Huchi in tuni a music ngaih theihna ding computers, mp3 player, mp4 player, mobile phone chih khong a dimin om a, car sung nangawn ah pendrive zanga mp3 play ziahziah theih hita mai hi.

Krismas Kuan Aizawl

Internal Audit Team in audit a hong nei ua, Auditorte Guwahati a kipan ahi uhi. Ka company ua sem Ms Aneng, Dr. Lamkhanpau lawinu in Mizo X-mas la leh Gospel album bangzah hiam hon ngaihtuah sak inla auditorte hon pawsak in chi'n hon thukhaka, office naute va sawl dingin lah a leisiam kei kha ding uh ka chisima, auditorte pawtsanna lemchang chi in keimah va pai mai ding chi'n sunma lam in office nusia in Music CD lei dingin ka va pawt khia hi.

COMPUTER KHOVEL

Kawla nisuah sima vailou kuan, nitak lam vaitung ann nek khit ( Pa Douzathang chihdan tak in) “ann kam khuahna toh pawtkhe ngal” a lenglatna a ut teng sat khiak khit a inn pai, zan a tuuitaka ihmut hithit mai hinkhua toh tulai computer khovel a hinkhua ki bang lou deuh ding hi. Suna nna sem zan a mi ihmut nunga monitor mai a zanhah phial gige hi mawk! Aneizoute lei eng i hi hiam a zatna ding gen theih neilou pi, loan la hial mah a assembled computer ki lei khe ek mawk! I deih man chih hi mawk! Office teng phial in nna computerized in mihing sep ngailou zozen ding sakna om bang hial hi.

THIAM TOH

THIAM CHIH hi min laktom ahi. Gentehna in Thanglianpau chih bang Thapau chia a toma sapna ahia, huai hih tom zaw lai le Thap hiam Thau hiam hi ding hi. Thiam hi chiamnuih siam leh mi polhnuam ahi a, thil bangkim a muh peuh, a zak peuhmah nuihzathuai tak a hon genkhe mai thei mihing ahi hi. A chiamnuihte mi zakdah ding leh mi nasak velvul ding a om keia, amah live a i muh, i zak chiangin nuihzak huai mahmah hi. Zanlamin Sumpi Chiamnuih CD koitak hiam ah ka enkha zuala, huai ah leng Thiam influence a omkha zek ding in ka thei hi. Tuni in a ngaihhuai mahmaha, amah phawkna kawmin ka khualzinna uh, Singngat a zan khat ka giah thu uh kon gen ding.

KA MANGNGILH SIMTA MAWK KA CHI!!

High School kailai, pawl VI ka simlai ahi a. Lamka a J.N.Model School ah hon admit ua. English Sinna by Thangkhogin chih laibu khong apan sappau mal tampi ki theikhin mahleh school a sappau a hon houpih chiang un ki dawngthei hetlou mawk hi. Teacher khenkhatin: "What is your name?" chia hon dot uh bang i dawn dek leh a dawnna hong pawt thei hetlou mawk hi. April kha khong ahi dingin ka ging, school ah cholera injection hong nei ua, naupang tengteng kikap vek hi. A zingin pawl sawmte exam suti a khah ngal uhi. Kikapna na sa mahmah ki khosik sim mai ahi a; inlam pai ding ki utlua ahihman kikapna na leh khosik bang ki mangngilh sak in ka paita uhi.