C leh CH Tungtang Kamkhat

Social media ah C leh CH toh kisai gen-leh-sak hong omom in beitheilou ding bang khong hi. A kum a sim bang hong hita in bang hiam tenga meimatum bangin hong puang leh uang deuhdeuh le bang hi. Pai toutou ding a bat manin a poi khat ahi. I etet chiangin lai ahihkeileh laimal lam le hinawnlou a i nam sunga kituahlouhna om latkhiakna phih khat le hizaw houh bang  hi. Huai ahih zenzen leh bel  nam sung kituak le hiai le  veng mai ding bang hi.  

Hiai buaina hichia omom pen nuamlou in ngaihtuah khak ton om sek hi. I lai saipawl PLS in lah mimal deihtelna a koih - a utten C, a utten CH zat di chi uh;  huaidana tuh buaina di omlou hileh kilawm, lah a buai a ki buai zel. Mimal takin ken bel CH mah ka zanga, C zangte le a deihtelna uh ka zahsaka  C leh CH thu a va buailuat leh kiselsel kulin le ka thei kei hi. Moreh Resolution omma a ka na zat, Paite MIL na zilkhalou ka hihna toh CH zongsanga zang ka hipen mai ding.

Hiai buaina toh kisai hingei dia kilawm pawl thak khat POLRD  chih bang hong om ahih social media khonga muh ding bang le hong om hi. A pawl omzia tak laigelhtu in thei kei mahleh PAL pawl active nawn khollou in huai mun awng luah dinga hong om hi dingin koih hi. A nasep uh kithei khat tuh Pu Nengzachin bawl Sintung Bu reprint  ahi.

Social media lama i  muhphak C leh CH tungtang apan pomtheihlouhna omte khen poimoh 3 pha a muhin oma  huaite genzek di hi hang. Research bawl ahiam, lailam sai pawla panna nei ahiam le a ki hikei, hiai toh kisaia thuneihna nei le ki hi samlou hi. Kuamah gup leh paih le a omkei a, koi kuam hiama phattuamna a om khak zenzen leh chia awlmoh mana mimal muhdan tomkima gen hilel  zaw hang.

C leh CH  zattheih tuak, mimal deihtelna a nga chi ngal lah laigelhtu in CH a zatnate C a ana kheksak zel chih kha social media a muhtheih khat ahi. A nihna dingin nam khatin laimal a thuah a neih mawk hitheilou, C leh CH neihkoplouh a CH ahih ding chih hi nawn a bang. A thumna, a bulpipen chih theih ding Paite laimal A,B,C hiloua atung a pan i na neihsa A, AW, B, CH om ahi,  Zomi nomenclature pom mana Tedim laimal va zuih chih Paite te a dingin  hitheilou chih hi nawn ding hi.

Hiai teng thum a kizom leh paikhawm, bulpi kibang vek a chih theih ding. Muhdan/theih ve danin Paite namin achik achikin kawlgam a unaute toh kizop leh kinaihsem na lunggulhin pan leng na lala hi. Paite nam min dinga pom ahiha genchian danin le unaute omna mun lama pan tua i omna lama hong pai i hihmana a PAITE chih apan Paite nam kichi ki hidana gen ahi. Huai lungput paitou zel ah Burma lam, Mizoram leh mun chiha Paite omte in laimal, laigelhdan kibang neile i laibu bawlte ki sim tuah sakzaw di hanga laibu le tam kizuakthei dingin laigelhte a dia le thaman om deuh ding chi’n Paite sunga organization, saptuam liandeuh teng leh dottham ching mimalte in kikupna bangzah vei ahiam a neih ua thupukna bawla, a   sai leh semkhe ding sehkhiakte in kawlgam lamte toh thukimna khat Moreh ah va nei uhi. Huai a thupukna 3 omte:

1.  Roman Alphabet 26te laimal a zat ding, a vowel teng India lamte ginsakdan zuih ding consonant C pen “cha” leh G pen “ga” a ginsak ding in vowel O pen “o”  leh “ou” kala ginsak ding.

2.     Laibul (primer) puahthak a zatkop ding.

3.     Min leh lai gelhdan tua i zatdan a hoihlam ngima etthak ding.

Hiai kha Moreh Resolution i chihsek uh ahi a, PLS in amau laigelhna leh MIL khongah hon zuipan uhi. Historical leh chronological a bukim taka a date toh i gen kei dinga, theihdan tangpi in i gen ding hi.

Mohpuakna piaka a om bang ua PLS in Moreh thukimna zuih hon pana hon semtou uh hihtuak hi.  Kawlgam lamten le huchia na sema paitou pih mah ahi uhia chihlam i theisau kei.  A lohchin leh lohchinlouh, PLS sung a ngaihdan a kituah leh kituahlouh chihte ahiam, kawlgam lam a ZCLS ten le amau lam mipite’ theihpih leh pompih mah ahi uhia chih leh mipite zuisak zou uhia chihte thutuamin i koih dia i gen kei ding. Bangteng hileh PLS lamin Moreh thukimna dungzuia Roman laimal 26 te hon zangin amau sung leh MIL text book khong ah huaidan in hon paipih uh hihtuak hi.  

Himahleh a pomtheilou hong om i chi diam, PAL chih khong khong oma;  Paite laimal omsa dungzuia CH in Paite laia a dinmun ngei mah a luah kik ding deih hong om chiangin PLS lamin thil omdan leh buaina dinmun enin C leh CH zattheih tuak tadih ding, mimal deihtelna a kinga ding hon chi phot uh abang hi. Common Writing system policy a neih panlakna pen tawpsan hituanlou in C leh CH zatna, mimal deihtelna a hon koih ua, MIL sinlaiten le examna khonga amau deihtelna zanga C leh CH zang thei ding uh chihdan hihtuak hi. Huai pen theihsiamlouh ding omlou abat lai in khatlamin utut zattheih chi napi a, laigelhtu in a laigelha a CH a zatnate C a va khek sak zel, mimal deihtelna a koih chi napi, mimal deihtelna zahsaklou a PLS policy phutluih uh chidan hihtuak uhi. Hiai dana  panmun a khohtuak ua, a dinkip tuak u leh kinial touhtouh ding loungal lampi dang omlou ding bang hi.    

A nihna pen le C leh CH thu mah ahi a, Paite nam khat hia a laimal CH neikhin, nei kichiansa pen a thuah a C leh CH neihkhop letlut hitheilou ding, hihna tumta neihlouh huai chihdan abang hi. Hiai le etdan khatin dik bangmahleh PLS lam paipihdan a tunga i gensa toh kibang mah hihtuakin a dinna ua chiang kichi a bang hi. Gensa bangin Moreh thukimna dungzuia laimal C (cha) pen pom theihlouhna hong om chianga mimal in deihtelna a zat dia koihin a policy uh bel khek tuanlou hihtuak uhi. Thukimna dungzuia a i laimal a C leh H gawmsa  (CH) om nawnlou, mimal in a deihdan ua a zat dek chiang ua gawm tawm dingin CH hong suak ding hihtuak hi.  Laimal kop dang:

A leh W =AW

K leh H = KH

N leh G = NG

P leh H = PH

T leh H =TH

 etc. i gawmtawm zel banga C leh H le gawm tawm zel ding hihtuak hi.

PLS lamin bel C kha CHA a gingsakin amah kia (H tellou) a ding lele CH(chaw) gin gelhna dia  zatttheih veve chi uh hihtuak hi. Huai omzia chu amau etdana C leh CH laimal neikop hiloua, a laimal dana gawmsa CH om tuanlou hihtuak hi. Hiai le atunga i gensa mah banga kitheihsiam leh pomsiam sawmna lungput a omkei leh kinial a buai nilouh ngai ding chihna hi zel hi.

A thumna ding in Paite in laimal original a neih Pu Nengzachin bawl: A AW B CH om a huailou Paite ten laimal dang neilou ahi, mipi mandate omlou in PLS in Paite laimal khekin a talkaih ding uh ahikei, mipil masate le zahna neih ngal ding ahi chihdan khong hinawn leh kilawm hi. Gensau louhin le Moreh Resolution  pom leh pomlou pawl oma pomdan nih a paita chihna hilel hi. A tunglam a i gensa banga a hun laia Paite sunga organization, saptuam leh mimal dottham chingte kituahna a malakna a kikhekna hong om ahi chihleh ahikei chih kikal ah hong ke ding hi mai hi.

Hiai Common Writing System policy pen kum tampi paipih khit himahleh tuni tana soiselna omom ahihmanin nawngkaina a om chih haihvual hilou hi. Huai i chih hangin PLS te malakna leh lai puahna ziakin tuni in i laigelhdan ah masawnna tampi muhtheih omkhin veve a, huaite nolh leh genlouh vual hilou zel ding hi. Tuni in India lam ah pomloua soisel hong pung hiaihiai a banga,  Kawlgam lama a ki thukimpih uh ZCLS ten le i gal-et danin mipi zuisak zou tuanlou uh bang thou uhi. Hiai dinmuna a damdawi hoihpen ding tuh Moreh Resolution velthak leh review ding hipen maithei. Social media khong sangin nam pumpi huama review bawl ding ngaihtuah hoihzaw kha ding hi.  Ahihhangin tuni a i nam omdan etin review bawlna dia hun hoihpen bel ahi khol diam chihzaw gen thei khang.

Huaiban ah review di hita mawng lele, Burma lam unaute toh Moreh a thukimna omkhin ahihmanin amau theihpihlouh a ei sunga i na review mawk sangin amau toh le thuzak phot kilawm maithei. Review in A, AW, B, CH ah kiknawn hile laibu bawlsa, a diakin MIL text book gelhdan  khek ngai tampi hong om nawn dinga, a buaipihna ding hun tampi, tha leh zung tampi sen banah a sum mah a le aman (price) tampi piak kul  nawn ding abang hi. Akua akua in lungsim kihong leh nam itna toh gel detdet poimoh leh kilawm hi.

[Dibrugarh

24.07.2020]

End Notes:

Moreh Resolution:  27.03.1984 ni a ZCLS leh PLS in lai lama kithukimna a neih uh ahi a, PLS tangin S. Ngulzadal leh ZCLS tangin Ginkhatsuan in suai kai uhi. A kithukimna uh point 3te a tunga laigelh ah i taklang khin hi.

PLS:  Paite Literature Society. 1945 a Paite paua laibu bawlna dinga Paite Literature Fund chia sum don a hong kipan, 1953 a Paite Literature Committee minvoh pen 1954 in Paite Literature Society chi in Paite sunga lai lam saipawl tuni dongin na hitou ngitnget hi. Tulamin Paite Lai Saipawl chihna in le hong kizangta hi.

ZCLS:  Zomi Christian Literature Society. Kalaymyo phualpi a nei lai lam saipawl khat ahi a. Kawlgam lam a lai toh kisai ah ZOLUS (Zomi Literature Uplifty Society) chih le a oma, huaite khong toh kithukim veka ZCLS in Moreh Resolution nei ahi di uam laigelhtu in kan khalou in theilou hi.

PAL:  Paite Academy of Letters. Hiai pawlin Moreh Resolution a laimal kipomte deihlouin A, AW, B, CH mah zat ding deiha pan na latou uh a chihtheih ding. Tuni chiangin bel hiai pawl om nawnlou ahi diam a thawm uh zak ding om nawnlou hi. A min kivuahdan apan in unau Mizote MAL (Mizo Academy of Letter toh kizul sim abang hi.

POLRD: Paite Organisation for Literary Research And Development. Hiai pawl 2018 lak vel khonga social media a hong kizakha in Pu H.Nengzachin bawl Sintung Bu hon print thakin 24 July 2018 in Hiangtam Lamka ah laibu honna nei uhi.  

MIL:  Major India Language. Manipur a siamsinna a Paite pau sunject khat (MIL) dana sintheih in hong oma, tuni chiangin BA tan ah ziltheih hi. Hiai a siamsinte tawi ding laibute PLS lamte in buaipih deuh uh a chihtheih ding.

Laimal 24te: A, AW, B, CH, D, E, F, G, NG, H, I, J, K, L, M, N, O, P, R, S, T, U, V, Z. Hiaite 1945 lak vel a Rev. H. Nengzachin in ana bawl Sintung Bu a laimal 24te ahi. Sappau leh paudang hel hetloua Paite tualsuak paute gelhna ding in kiching chih ding  ahi.

Laimal 26te:  A,B,C,D,E,F,G,H,I,J,K,L,M,N,O,P,Q,R,S,T,U,V,W,X,Y,Z. Moreh Resolution a Roman Alphabet 26 zat ding a apomte uh ahi. Tedim lamin J.H.Cope malakna in 1925 vel apan ana zang khin mahle uh Moreh Thukimna ah laimal khenkhat a gindan/lamdan puahin Roman Alphabet gindan toh kibang kimlou hi. A kibatlouhnate a tunga i laigelh ah I taklang khin hi.

Paite Pau:  1986 kuma kibawl Paite Customary Laws laibu a Paite pau tuamtuamte hi a kigente- Bukpi, Dapzal, Khothak, Lamzang, Lousau, Ngennung, Teizang, Tedim, Tuichiap, Val. Mun leh khua a tuam dungzui in pau kaihdan kibanglou leh thumal, thilmin kibanglou zekzek om seka, Paite sunga le huchibang pau awkaih kibanglou tampi om hi. Manipur a tribe tuamtuam a ki recognize khin i hihman a a telsaklouh uh ahi dinga, hikeleh hiaite lakah Simte, Zou leh a dang a telthei ding le omkha lai ding in a gintakhuai.