I POPULATION tamlou lah gam tuam, mun tuamtuam a om i hihman in laibu hiam, music album hiam khat tou i bawlni khua in a zuakna lam (marketing) ah haksatna i tuak sek hi. A bawltu in lah a sum sen teng muhkik banah a gim a tawlman neukha beek muh khiak nawn ut, mun tuamtuam a omte in lah ei pau, ei khutsuak ki deih thou zel ahih chiangin lem leh lemlou in zuak/lei i sawma; i lei theihlouhte leng leilouh a neih i sawm mai ton a om hi. Mun tuamtuam leh khotuamtuama a zuakna mun ding bawl theih dinmun hilou ahihmanin koi hiama mimal kua hiam khat ngansiah a zuakdan lampi i zon mai takdih kul hi.
Aizawl a ka om sungin laibu zuak ding mun tuam a pan a hong kikhak a omlam ka thei kha zeuhzeuh hi. A gelhtute chin mahmah leh a laibu quality hoih mahmah hilehle a zuak dinga ngansiah a om mi nih in amau buaipih manlou ahihman un leh a bawlte sawlna lah a buchinsaklouh ding uh kisuanglah in a vek a aman ding zah a sum khak mai tuak ua a alaibute a zuak ua lelah a sum uh mukik ding a zuak kei ua lelah amau manna (supna) hi mai ding in koih uhi. A gelhtute i nam sunga mi tallang leh mi muanhuai ahi tuak ua, a laibu le hoihlou hetlou hi. A zuaktute le economic dinmun selou tuak ahihman un a zuakma un full payment bawl pah thei mai uhi. A gelhtute leh a zuaktute min zaw i gendah mai ding.
Kei ngei in leng laibu zuak ding bu 40 bang ka dongkha ngei a, EBC khonga kikhawmlou a kihihna ah eimi lom omna ah kizuak theilou leh mun teng, veng teng a ki paiman lou hihman in eimi contact haudeuh a ka theih mun nih ah ka koih top mai hi. I koihna te’n leng khat le nih bel ana zuak thei sam ua, en le mi khat le nih bang ki khum zou sam hi. I koihnate kianga i kan chiangin a zuak sunsunte uh a sum hong tung kim nailou chih khong, leh a leisa khenkhat in hong kheng kik uh chih khong a om thei hi. Dena i gente banga a vekpi a aman ding ei sum khak mai theilou i hih chiangin in i ngak hong kula, huchia i ngak leh i theihlouh kaal in hun sawtpi beipah thei mawk hi.
Huchih sungin Pu Zokhual bang a zin khak chiangin ana kan zihzeh uh ahih manin aman le nuamsa lou in paulou in ama pocket apan laibu man ana pe mai hi. A hun a hong sawt chiangin i koihnate kiangah a sum va ngetkik hiam a laibu va ngetkik hiam chih bang le a hithei khin kholkei a, huchia koihdap khak khongin a om mai hi. Lehlam ah tuh a laibu ei order hikei mahleh a bawltute’ thusia in zuaktu ginalou leh ginomlou na hi, ka sum hon nekgaih sak na hi chi’n hon ngohnuam bang hile uh ki minsiat loh deer thei ahi thepthup hi. Hiai case ah kei bel Pu Zokhual in hon hunkhia hi.
Laibu, music album khong mundanga i zuak chianga huchi khonga buai theih ahihlai in i laibu deih, i album deih khat Lamka bang ah va zong le leidi muhzoh hetlouh chih bang le a om thei thepthup zel hi. Album bang i muhsun a duplicate khong ahi nuam mahmah vial hi. Population tawm lele ei khutsuak - a bawltute a dinga le phatuam, a deihte in le a leitheih na ding ua marketing dan feltak khat bang chi neih theih ding a diam ah.. Huaiban ah i van, ei khutsuak (Burma a kibawl leh India a kibawl) tampi tak Burma leh India a zuaktheih a om tham ding. Na ngaihtuah kha ngei ding uam ah, huai hih thei le tuh i market leng a lian huntawk thou mai ding. Nam khat, unau khat i hi a chih ban uah PLSte khongin lai gelh dan a buaipihte khong uh leng huai ngimna mah hilou hia maw?
No comments:
Post a Comment