INTERNET I zatna sawtlaw naikei mahleh tuni in eipawl le internet tellou in i om thei nawn kei simta hi. Lampi tuamtuam zui in gam teng ah i ki thehthangta a, ei omna gam chiat ah leng khopi tuamtuam ah a sem toh a zil toh i om khe souhsouta. Khovel leh technology hong kikhek dungzui tuni in internet toh i hinkhua ki kaihmat in khen theih himang nawnlou hi. Tuni in huaite gensawm i hi keia, internet a i music lam toh kisai gen sawm i hi zaw. Zosuante (Chin,Kuki,Mizo,Zomi) hi music ngaina nam i hi a, siamna sang taktak nei tampi leng i om hi. Atangpi a genin Burma lamte music ah India lam sangin a sang zaw uh abang hi. A lasak lam pen ah India lamte a ngaihkhiak a nuam zaw a bang nawn hi. Tuni chiangchiang in bel India lamte le music ah hong sang tou hiaihiaita a, Burma lamte late le a kaih leh a sak dan kawl influence hong tawm hiaihiai in a level hong ki nai tou hiaihiai a bang hi.
Music a tui nam ki hi mah ahi dia, a mipi lamin le i omna peuh ah ei la mah ngaihkhiak leh music video khong et ki lunggulh chiat hi. I album, music video bawlte lah i omna peuh a lei ding ki pawng muhlou ahih manin i deihte bang le leikhak leh neih khak a haksa a, a deih taktakte’n bangchi chi hiamin a lei thei ua, a leitheilou te’n kuahiam computer apan hiam a laksawn dan khong a ngaihtuah mai uhi. Huchi dinmun ah a music tumte leh a lasate in a mau toh kiphu lawkna nei theilou in a om lai uhi. Huaiziakin music a talent omlou leh a mipi a tuilou hilou napi in hiai lam ah i khan ding tuk in i khang thei kei abang hi.
Abang teng hita leh, tuni in Youtube genlouh in le internet a i late ngaihkhiak theihna ding online music site tamkhop a omta hi. Tamkhop om mahleh huaite mi tampi a k na theikha lou chih bang hileh kilawm hi. A music tum leh a lasate a dinga lawkna om kholkei mahleh online music site i neihte mipi a dingin noptuam mahmah hi. Site khenkhat ngial bang ah a la leng download theih fingin a oma, album i muhzohlouh, i lei theihlouhte khong a om khaleh a download theih a, a kizen mahmah. Site bawlte’n album neite kianga phalna la uh a diam la lou uh a diam chih lam zaw i theihpih kei. Hilele a phatuam mahmah i chi ding.
Mi tamzaw in I theih a i zat phattuam ding deihna in Zomite Online Music site a buching deuh 4 anuai ah i taklang ding.
WWW.ZAIDEIH.COM. Hiai hi, ka theih khelh keileh Norway a om Khen Solomon bawl ahi. Zomite album lui taktakte khong le a oma, Burma a kibawl the Blue Hills leh Singkuang Leh Aikuang chihte ka mukei chihlouh Zomite la/album hiai site ah a kimpen mai diam ka chi sim hi. Music Video bel omlou hileh kilawm hi. Tulel in la 7750 tak a om a, tunai zekin English la le a hon hoih beh hi. Hiai site ah online in la a ngaihtheih a, la thu (lamal) leng a om zeka, registered user ten leng la thu a koih thei ua, mi koihsa a edit thei ua, a comment thei ua a interactive pen leng ahi ding. Hiai a late bel download mai theihlouh hi.
WWW.ZOMISONG.COM. Hiai site ah a bawltute min khong muh mai theih dingin a ki gelh kei a, himahleh i ki register chiangin i email ah confirmation hong kithawn pen Augustine Sum email apan ahi hi. Youtube khong ah Zomi music video zong le Augustine Sum a tam mahmah hi. Augustine Sum pen music lama tui leh khutma nei khat hih tuak hi i chihnopna ahi. Hiai site ah album tuamtuam pek thum dim online a ngaih ding a om a, i ut leh download theih lai hi. Hiai ah la thak deuhte a om hoih a, Burma leh India a Zomite la om tuaktuak hi.
WWW.ZAIREM.COM. A theme uh i chi diam, CHIN SONGS COLLECTION a chi ua, music ngaina mi bangzah hiam kipawlkhawm a abawl uh ahihdan a site ah kigelh hi. A site late Falam Songs, Hakha Songs, Tedim Songs, Mizo Songs, Matupi Songs, Siyin Songschih in khen uhi. Zosuante CHIN, MIZO, ZOMI, KUKI chihte la omna site a chih theih dinga, Kuki la bel a om kei hi. Hiai leng online mp3 la ngaihna a chih theih dinga, la download lam pen hih lou uh hih tuak hi.
WWW.ZOGAM.TV. Hiai chu i theihchiatsa uh ahi ding, i lawmpa uh GetConnected a ahihmanin. A theilou i om zenzen leh Japan a om Sang Valte, lasiam Gamngaihla leh Pathianla sa a lar V.Siampu tapa ahi. A site theme ding in BROADCASTING ZO MEDIA a chi a, music video tamkhop leh chiamnuih, movie leh documentary lam a om zek bok hi. Mp3 player om kasak tutak a ka etleh ka mu mai keia, omlou a diam ah.
WWW.PENGLAM.COM. Delhi a om Lun Thawmte bawl ahi a, Music Video bangzah hiam a om a, Mp3 omlou in lathu (lamal) koih khawmna hi deuh hi. Lathute Biakna Late, La Tualleng leh Pathian Ngaih La chih in kikhen hi. Hiai a lathute hi tulai khovel a khopi tuamtuam khonga omta i hihman a nopni dahni a labu chih khong a om lemtang kei leh hiai a pan lakmai theih dinga zat tangzang ding chia Lun Thawmte a bawl ahih tuak hi.
Adang lasiam -mimal leh group- website hunkhop a om dinga, huaite toh website tuamtuam a Music Section te i gen lut dah ding. Tua i gente ah ki register louh in le la ngaihtheih, music vdo ettheih hi thou mah leh site-a facility omte kimtaka i zat nop leh ki register ngai hi.
Atawpna dingin chihsa bangin a album bawl lasiamte leh music tumsiamte a dingin sum-le-pai a lawkna om kholkei mahleh hiai music site-te ziakin minthanna leh leitung mun tuamtuam a mite theihphak hihna dinmun a nei veve ding uhi. Huaibanah hiai site-te ziakin i la i pau nasa takin mun teng ah dalh thei dinga, mimal in i omna peuh ah internet a om nak leh i la i ngawl kei ding. Huaiziakin kuapeuh a dingin manluatna omlou in lawkna ahi zaw chi suk mai le. A site bawltute tawmngaihna leh kipiakzohna phawka a site-te i zat kawmin bawlte le pahtak leh tawsawn dingin hoih ding hi. Hong hahpan tou semsem uhen aw.
No comments:
Post a Comment