Tulai mobile, tablet, laptop a ettheih huihkhozop (online) muhnop (media) tuamtuam tampite laka khat, youtube toh kisai houlim zekle chi hi hang. I theihveksa bangin youtube ah Entertainment chituamtuam, technology, automobiles, gadgets, cooking, gardening, travel, vlog, reviews, motivational, inspiring adg. a dimin oma ei tuina lam chiat et/ngaih theih hi. Sappau a ngainuamin sappau, vaipau le huchibok, ei Zosuante pau tuamtuam ah le tampitak omta hi. Youtube omna sawtpi hita mahleh Covid19 hipi len sungin a thil koihte hi in a ente hitaleh, a kua peuhin hun hau ahihmanin youtube hun lemtang hong suak a chih theih ding.
Khovel pumpi huapin tulaitakin news lam youtuibe ah Covid19 toh kisai - Wuhan, China, USA – chih khong a lunpawl ahi maithei. India ah Sushant Singh Rajput sihna thu toh kisai ahi zou diam ah.. Zosuan youtube ah bangthu a lunpen diam, suizek louhin a genngam huai kei. Tuma lam deuha uisa nekthu a Hema Choudhury in Nagalandte a kikoukhumna toh kisai bang gintak sangin vaiten le youtube ah ana nakbuaipih vanglak ua Nagate’ “thlavang hauh” a Hema Choudhury mohsa ana tamsim vial uhi. Lehlamah zaw huchia ana hih uh aziak om vek ahi zel. Youtube channel a vdo khatpeuh i etleh a kipatna ah a channel uh subscribe sak dia ngetna, bell icon mek ding a ngetna, a channel uh i veh ziaka kipahthu genna chihte ninhuai phial khop in omvek hi.
Nidanglai va chih di lah hiken chin, atunglai in youtube ah account ki bawl sam mahleh a koih ding lamah kibuai a kizang khollou a diam i thumalkong (password) bang le ki mangngilh gawp hi. VDO editing bang zilzeka mobile camera panpih ding camera zattheih khat leh poimoh dangte ngaihtuah ding lungsim ah om sek mahleh kitangtunlou hi. Huailai khongin ei Zosuante’ youtube ah la lam - music singles leh album, movies khong a ututin ana koihlut (upload) mai ua, album thak khong a om chianga a leiphalouten youtube a hong ki koihlut ngak mai sekin om hi. Ei a din lemtang mahleh a bawlte a dingin zakdahhuai ahi ding, youtube a koihlut loudia ngetna khong bawl sek uhi. Abawlten a album/movie bawl uh youtube apan sum muhna in neikei mahle uh a lasak uh, a album bawl uh, a movie bawl un a theihlouh kal ua gam teng na zelin dalh ahihna ah minthanloh thei ua amau adia phattuamna kuam na omzek sam hi. Ngaihdan tuamtuam om in teh, gensau kei ni.
Internet mobile phone a kizang vekta, lup kawm banga le youtube theih hi mai. Mi koih ena hoih i sakte i subscribe ban ah a bell icon meklai le koihlut thak a neih teng ua message a hon hilh uh chihna ahi. Youtube channel neiten subscriber leh et (view) tam a neih dungzui un sum muthei ua, huai lunggulhin tampiten channel hon bawl souhsouh ua, mihipthei ding thu leh la niteng phiala koihlut thei ei lakah le omta hi. Studio nei, musician, lasiam, movie bawl adg. ten le amau channel kineih vek simta ua, S.Chingnu leh Zorock bangin le amau la ana koihlut khinsate kianga thaimang (delete) dia ngetna hon bawl hial uhi. Sum muhna ding hialin bel youtube channel pen a lun deuh ahih ngai dia, huai dia enmi (viewers) hipsawmlua kisa in thuthang teng sulzuiha thu “belhchian dawllou” sim khong bang le na koihkha om thei hi. Youtube khonga thu/thiltung i muh leh zakte adik leh gintak vek theihlouh om kha ding chihna.
Zosuante lakah unau Mizoramte youtube ah ana hahpan thei vanglak ua, a pau uh nasa taka thehdalh a suak uhi. Sum muh ding lunggulh pawl om mahleh pau kepbit leh dalhsak sawma chihtakna toh panla le omtham uhi. Huai ahihna ah tangthu lui, laigelhlam (novel khong), sikhathu, thulamdang deuhte, Pathian thugenna, khovel a thiltungte(news) leh review hoihpipi khong a nei uhi. Apau uh athei bangle Zosuan laka tam leh punghat ahihna ah thu leh la ngaihnophuai a nei kimpen kha ding uhi. Mizoram polam a Zosuan – Burma, Manipur, Assam, Meghalaya, Tripura leh tuipai gal ate dongin amau a na en leh ngai ahihna ah sapte a khong toh tehdi hikei mahleh a market uh neulua hilou suak hi. Youtube channel million view nei tampi omkhin uhi.
Internet omma 1980s lai in i makaiten hiai dinmun ana mukhol ahi ding ua, ahun toh kituakin laigelh leh laibu zuakna (market) zai sak ding na lunggulh uhi. Huai buchinsak leh zat phattuamna dingin Common Writing System na genin Moreh Resolution bang na neikhin uhi. Lai lam ahi a, tu in muh leh ngaih theih ding huai lungpuak mahin youtube ah thu leh la ngaihnophuai, a phatuam ding vdo tampi koih zou le a en leh ngai ding tawmlua hi tuanlou ding hi. Lungput khek zek leh lungsim gamgi khetchip zek a ngaihna bel om maithei. Pumkhothang late bangin G Group khovel pumpi zelzou mahmah in kilang hi. Unau Zouten Thailand lam movie amau pau a pausaka, Paupu The Hero a chih uh Manipur singtangmi Naga louteng a en/ngailou ki om khollou ding hi. Burma, Mizoram leh Tuipi gallam tanah le enlou, ngailou tuanlou uhi. Hiai in i gennop a gen chiang mai ding e.
[04.08.2020
Dibrugarh]
Note: Hiai thugelh ah ahitheitan a eipau zat sawm hi mahleh a haksa mahmah khat a om hi. Sappau a thumal tampi eipau banga i zatsate eipau a bulh leh lehkhiaki sawm teitei le hang a simte a dingin le sim nuam mulhmulhlou omthei hi. A kulloupi va lehsawm khak le omthei leh kilawm. Huai chi napi in etsinna dingin sappau khenkhat eipau a bulhsawmin a kizanga;, a hoihpen, a dikpen leh a kilawmpen ahi kei ding chih theihsa ahi.
Huchia kizangte a nuai ah i vual suk ding.
1. huihkhozop = online
2. muhnop = media
3. thumalkong =password
4. koihlut = upload
5. thaimang = delete
6. enmi = viewers
Hiaite ban ah eipau a gen haksa Lusei pau kizui mai mun nih a - thlavang hauh leh belhchian dawllou – a om ding. Dapzar lamin a pom leh zatsa eipau mah ahi chia Paite neusek honsa le a omkha maithei. A diklou tuan kei a, kinialna ding a om kei. Lusei pau influence oma Dapzar lamin ana pom leh zat uh hi a ka koihman lel ahi.
I thugelh a thutun ban ah pau lam le ngahi poimoh kul sakmana a tunga kikoihte sappau apan eipau a ki koih sin mah ahi a, kei ngei inle lai ka gelhnawnna ah zang zui tuanlou ding ka hi maithei. Hiaite toh kisai muhdan leh kupnop a om a hintakhuai a, a om leh huai i deihman a hichia hon kizang mah ah. Muhdan leh kupnop neaten comment lam ah ana nusia un chih i kingen hi.
No comments:
Post a Comment