Lai i gelh tei sam chianga thil thupi leh thu thukpi ahiam lah va kisui leh gelh zoulou, hun tomchik sunga zohtheih di, lungsim a hong suak zual khong mankal a ki gelh hipen ahihmanin i hihna kipuang leh zumhuai bangin kisuanlahhuai sim sek hi. Chihbel ei thiltuah ahiam ei theihkhak khovel neuchikte khong a kipan gelh hilel i hihna ah ei le ei kipuang puang kihsim mai hi. Ei mimal blog khonga koih dia gelh lel i hi a, a simnuam a om zenzen lelah hoih, a omkei lehlah hoih chihdan a kisiamtan suk mai a hunlem om chia gelh zeuhzeuh zel mai aki hi i chi masa nuam hi.
A khen chiangin lah i ngeina, i pau, i gam ahiam, eipawl toh kisai koimah a gelhkhiaka om nailou thu khatpeuh sappau bangin gelhkhe thei in koihkhe le min a google khak chiang ua pawtkhe mai ding lunggulhna om in tawmngaihhuai sim hi. Himahleh tuni in huaidan gelh ding i hikei zel hi. PUC hiam BA hiam a English poem a Yarrow Unvisited chih William Wordsworth gelh toh neuchik kisaikha gelh sawm hi hang. A poem thuksuia literature lam a laktak di bel hi hetlou ding ahi chih thei masa le. Poetry genlouh, prose leh drama khong college subject text bookte le simsuaklou, heutute lecture ana lutkha zek leh bazaar note sukhawma pass nimnem khatin literature lam suantham ki gelhkhelou ding chih theihsa ahi. Ei leh ei hihna kipuang i chih kha huai khong ahipah hi.
Wordsworth in a sanggamnu ahia, a nungaknu ahia toh koi hiama a hohna ua Yarrow lui va phak malam dia lemtang hi ding hiven a lawmnun va tot lunggulh mahleh hohpihlou hi. A Yarrow lui omna leh a poem a kip a kawia sui leh gelh ding hilouin lungsim a ana tamlai khat deihkaiha gen sawm lel i hi. A phakpih utlouhna ziak bel thil khat peuh i suangtuah leh geldan oma, a tak i va muh hial chianga na kibang khollou in na ginalouzaw thei lai mawk ahihmana lungsim suangtuahna a ompen kepdet ut hihtuak hi. Hiai kha hinkhua ah lam tuamtuam ah dik saksim vialin a om hi. Mimal hinkhua leh personal taktak khong hikha ding ahihman in diksim i chihte ban gen kei ni in, a chianna ding in khat gen hamham ni.
Nasepna lam ah zanni in promotion na ding online in interview ka nei uhi. Nidangin online interview chihbang omloua India gam mun tuamtuam apan Mumbai khong ah va kikuan leh kisukkhawmin omsek hi. Zingkal, sun, nitaklam chihbangin a hun hon pia uh hiven, a kuamah a zekai hih ding utlou in a baihthei lamin ki kuan chiat hi. Interview na ah hun sawtdeuh lut bang omin a hunchiam dan chiahchiah in paitheiloua, a mun mun tungkhin si, lah sapa omnailoute ki tukhawm neinoi in a zoua hong pawtte kiang ah “bang bang hon dong uh” khong chi in kikan kheukhou in a kuapeuh lungsim thoveng loutakin ki om sek hi.
Huai kia le hilou India gam mun tuamtuam a pan paikhawmte ama ni khongin Mumbai kitung chiat hi. Lenna a pai hi in rail a pai hitaleh khual gamla zinna ah thil tampi ah inn a i om toh kibanglou kituaka, i lungput leh lungsim le inn a om thoveng toh kibang hetlou hi. A hun hong nai chianga nakpi a lai sim pawl bang, kicheina ding puan leithak bang, sammet a mul kiatsiang etc kigin theihdan chiat a kiging in huai tengteng kha lungsim sung thiltung apan hong piang ahi.
Tutung interview pen online a a khatvei ki hihna ding ahihmanin thil thak khat suak hi. Microsoft Team zat ding chih ahia, a utten inn a hihtheih, a utten office apan, himahleh Micorsoft Team zanga hihtheihna dia a poimoh teng a om ngai ding chi ahi. Huai dingin le a hunma in mi tamtak lungsim ah thil tampi om ngei ding hi. Regional Office, IT Dept, lamte in nikhat hon phone ua, a poimohte ka neih leh neihlouh en chian dia test ding chi uhi. Naute in zoom khong, Skype khong, MS Team khong a class leh meeting na neineisa ahihman un huailam a buaina omlou disa in ka koiha, ka ngaihsak kholkei hi. IT Dept. ten mi khenkhat a ka setup sak chiang ua hitheiloua a hun taka buai tuktuklouhna dia test ka hih uh ahi hon chi ua, weekend chiangin inlam ah i test ding ka chihsanta hi. Inna kon test chiang un khatveina in fuh ngal a bangmah buaina omlou hi.
Himahleh interview nei ding hi buang, neukha lai khong etzek a ki brush up zek hoih ding hiveh aw chih bel lungsim ah omom hi. Huai dingin a khen chiangin kou office lam a business related data tuamtuam, ka Company uh toh kisai thil tuamtuam office network apan lakhia in leh Manipur leh Assam adiaka Dibrugarh District toh kisai tuamtuam google a zongkhia in inlam ah ka tawi teltul sek hi. Assam a flood, Corona virus dinmun chih khong I hon chih chiangin India pumpi a dinmun, khovel pumpi a dinmun aban aban in hong omtou zeal. Himahleh a sim lam pen I va sim dek chiangin hitheilou zel hi. A khenchiangin mitbulh kibun hia a power khong hon dong mawk le uh chia I ngaihtuah leh kithei chiah khollou ahihna ah inkuante panpihna in prescription lui khong bang zon thepthup in a om a, interview hun tunma teng bel lai simkei lele lungsim ah thil tuamtuam hong om sek hi.
Promotion muh ding va utlua hikei lele, interview na a mualphoutaka omkhak ding bang kilau in lungsim ah ani ani in thil tuamtuam hong omom hi. Lah i sim taktak dek chiangin kisim thei mahmahlou zel. Huaite sim sangin youtube a news ahiam mizo story ahiam, la ahiam ngai in i hunteng bei zel in ani hong tung khongkhongta hi. Ani a hongtun a atak a interview i va tuah hial chiangin lah a dandan ana om zel, a hun tunma a lungsim suangtuahna omte toh kibang hetlou, houchik in kizou zel mai hi. I muh ding leh muhlou ding bel thutuam. A result hong suah chiangin kithei mai ding hiven.
Hiai Yarrow Unvisited gelhtu in a lui toh kisai a suangtuahna a a omsak khat omkhina, huaipen a takin va muleh a suangtuahna toh na kibang nawnlou dingin a lungsim a a koihsek dan bang phazoukei leh hou gai ding sanga a lungsim a omdan pen kembit nuamzaw a a lawmnu va paipih nuamlou chu ahihtuak peuhmah a. Corona virus khongin i lungsim sung ah bang teng sema, bang hon chi sutkhak ahia chih khong leh atak bangle kibang hetlou ding hikha ding hi. Khovel paidan mah ahih chianga maw.
[Dibrugarh
31.07.2020]
No comments:
Post a Comment