Lockdown hon lakkhiak nung uh kha thum vallam office kikaita chu ahi a. Kha khat khong paita apan test a hahbawl ziak uh ahia bang ahia a statistic danin North East ah hong pung nak mahmah hi. Guwahati khosung, Nagaland, Arunachal khong inle kal nih lockdown hon hihthak ua, Manipur ah leng ahih nawn uhi. Assam district tuamtuam ah himahle uh kou omna district bel a thu kia in lockdown ding chih a kizakna kal thum bang valta ding hi. A nunungpen ah mipi toh administration in genkhawm ua zing chiang (28.7.2020) a kipanta ding chih ahia, zanni a statistics hon kapkhiakna uah a kaithak 60 val om, a gawmkhop ah sang khat valta ahihmanin hon hihngei ding un na ki koih hi. Himahleh tuni hiai gelh hun dong in administration lamin thusuah nei nailou uhi.
Hihtheih a omkei a hiven, lungsim leh khosakna ah cheptaka om nilouh ninhuai le hong bang khong mah hi. Ka veng uah inn khat ah signboard san a hong tak ua, a inneite puakkhiak nei uh hi awmtak ahi. Nitenga office kai ngai, meh leh bangbang hiam lei dia dawr a hoh zel ngai; i dawr hohna kima abangzah hiam muhkhiak om chih social media ah muhtheih in hong omta. Ka naunu uh le tuni a a sepna schoolten kai ding a chi, rooster a bawldan ua ama kaini hikha hi. Lockdown om apan online a class neisak ua school kainailou uh hiven. School bus paisakloua Maruti van khata mi nga khong hena school kai dia hong pi dek uh ahihman anu’ ngaihphalou in tuzing motor in ka va kha uhi. Tuni a ka zak nawn khat, ka staffte uh tangval khatin zanhala agentte khat tonpih a doctor ana ki etsak leh bangmah symptom omlou normal vek ana chi ahi. Ana laugu leh patau tena kai dia ana kimuangmoh a buaise dek ana hihtuak hi.
Ka branch ua Managerpa sanggampa zi le zanni a Tinsukia a ana si, damdawi innten hivei ana chi uh hihtuak zel. Tuni a staff khatin hon phone a, Manager pu lah hong kailou ka kiang ua om office khatin Disaster Management Dept. lam bang dia na hilhlouh uh ahiam, kou a dia le risk om ahi a hon chi uh chin hon phone hi. A Managerpa uh a tanaute covid a si ahih chianga amah le ginlelh huai ana sa dan uh ahi hi. Ana lungkham kei un, na Managerpa uh ka na houpih ding ka chia. Ka houpih leh inn le km 2 vela ki gamla ka hi ua, contact ka neikei himhim uh, ni 9 lam paita quarantine ahi hon chia. Huchi ahihleh bangmah hih ngaikei ka chi lungsim hi. Pilvan thu ah banghiam omkhaleh chin Guwahati lama pute thil omdan ka hilha, contact a neihlouh le bang hihngai a om dia hon chi a. Managerpa kiangah hiai toh kisai in mail ah misi toh ka ki contact kha kei uh chin gelhsak in hon chihmanin Managerpa le phone in ka hilhpah hi.
Hichi vingveng ahi a, hon en lockdown le uh chisim mahle nitenga kilohtawmte bang lunghimawh mahmah zel uhi. Ei bel Pathian zala khateng lawh kila lai sam ahihmanin nek leh tak, khosak ah kibuaise tadihlou, i duh i ngaih leh deihdan leidi a om gige kei chihthu hilel hi. Tuchiangin mipi ngaihtuahna le pai kawi gaita abang hi. Vaite lak, office khonga inphiatte leh niteng kilohtawmte khong le (kei zakdan) a thilgendan uh hong tuam deuh om abang hi. Natna bel om in teh, himahleh huchi lawmlawm hilou ding ahi, sum muhna dia ahichih uh ahi chihlam khong hon genta uhi. Khat bangin ka veng ua a hong puakkhiakte uh mi nih bang ni nih omsakin hon khahkhe pah ua, amau lah ka bangmah ana kei chi uh achi uhi. Putek stroke ziaka a khe zeng pian khat bathroom a puksia damdawi inn atut uleh na test in positive a chi uh chih bang le gen uhi. A chillaia youtube leh social media khonga bangbang ahiam ginlelh theih ding muhdi om sekte, ettam, simtam lungsim nuamlou phet chia ki ngaihsak nawnlou, tu’n hichidan lamte kholai thuthang zak ding hong omomta hi. Zak teng a dik lah a diklouh chetna omloupi va gelh ding le ahikei dia.
Hichi kawmkal ah bangkim a ngeina dan hithei kei mahleh office lam bel ki kaikai sam hi. A ngeina dan hileh promotion result suahhun, kisuan hun leng ahi ding. Zingni thai ni maha online a promotion interview ding, Pathian zar a mu zenzen hile koilam a hon denna di uam chih khong, mukei lele hiaia kum 4 bang ki omta bang hon loh di ua chih khong ngaihtuahna khat ah omom hi. Tulaitaka kisuan, munthaka pai ding i ngaihtuah leh huphulhhuai in peihhuailou abang maimah hi. Munthaka inluah di zon ding chih bang, a diaka vaigam bang hileh a inzon genlouh a va pai/zinvel ding khong mahmah le ngaphuai tuak hetlou maimah hi. Naute bangin le a laisim uh sutzopna ding admission test/interview result ngaktuak hi zomah uh.
I va ngaihtuah kha zauhzauh nak seka hiven, Pathian in eia dinga hoihpen hon hih mahmah ding chia Amah muan top ding hi mai hi. Ni khat pumpi gelh hikei mahle hiai hilen nunga ni khat hun zatdan, Pathian zalin a hii veikei lele hon tohbuai dan neukha office kai kawma i thai zual ahi.
27.07.2020
Dibrugarh
No comments:
Post a Comment