Website Lui a Data Na Om Nawnlou Mawka..

2000 leh 2001 lak velin html code a gelh ngiat website khat - JANGPHUALVA- chih kabawla, a url ahihleh www.geocities.com/phualz ahi. Huai site ah 1990s a Silchar a ka omlai a i nam dinmun/politics chih khong ka vei leh awlmoh teite ka gelhkhiak bangzah hiam ka koih a, huaiban ah i nam folklore khong leh personal deuh hon paisanta ka pate unau  mualsuang (suangdoh) internet a doh chizen in ka koih hi. Huan ah messageboard (forum) leh guestbook bang leng ka koih hi. English Section leh Eipau in ka khen a, Zomite tanchin mithupi, anthropologist etc te gen khong ka koih a, kuate'n banggen chi'n Zomi mimasa leh mipilte thugen khenkhat ka koih bok hi.

A site pen 2000 kum a ka bawl pat ahi a, a khen chiangin angelfire.com ah ka koih a, a khenchiangin tripod.com chih khong ah zohngeu nounei a chih bang un ka tuah kualkual sek hi. Huailai in hiaite ah free website bawlna ding facility a pia ua, html khong zil kha zek ka hihmanin ka phur mahmah a, ka tuah velvel a, himahleh kuamah le ka hilh ngam kholkei hi. A tawpin -JAANGPHUALVA-www.geocities.com/phualz pen ka zangta hi. Huai tuh 2001 nung Aizawl ka tun khit ahita. A contents bel Silchar leh Guwahati a ka omlai 1990s apan 2000 kikal a ka gelh ahi deuh hi.

Hichibang website ka buaipih tung lai 2000 lak velin Mizo site chih bang alta-vista chih khongin a zongkhe zoukei hi. Huailai in google khong a omkei a, search engine kizang leh lar pen altavista ahi maia, msn leh yahoo search khong le a kizang thou hi. Huaite a Mizo chia i zon leh porn site mizo.com chih khong a mu lel maimah hi. Zomi chih zong le bel hunkhop tak a hon kaikhe thei hi. Zomi website ka muh masak pente Tuang's Homepage (Singapore pan) leh Thangboi's Homepage (US) ahi. Sihzang Global Village chih toh. Thangboi (Tg. Zomi) bangin Manipur a unau melhaih a i buailai in i tanchinte email group chihdan deuh thukizakna khong suah in ana hawmzak khin hi.

2003/2004 lak velin Mizo site a  hong tam mahmah simta a, a site min ka thei nawnkei, kuate hiam khatin Zosuante site masapen chiat chihdan a site uah a list a hon gelh ua, Paite site a a masapen JAANGPHUALVA chih bang a hon gelh kha uhi. Koi a ana theih khak uh a diam ka chi sim a. Hiai site ka bawlna ah yahoote Geocities.com ka zanga, huailaiin space 10 mb a free in a hon pia ua, text ngen leh limlak i scan tawm chik khong koihna dingin a space kidaih mahmah thou lai hi. Guestbook leh forum chihte lah mundanga pana bawla site toh link ahi mai a. Hiai Geocities a ka bawlna ah ka yahoo id phualz chih ka zat ahi a. Inlam ah net zang thou mahleng sun khonga ka pawtkhiak chiangin cyber cafe ah leng ka zang thou sek hi. Cybercafe khat ah ka yahoo id phuaz password ka khek a, huaikhit Guwahati a ka zinna a cyber cafe a lutin ka account ka access dek leh a password a dik thei nawn keia, nitum phialin ka beia, himaleh ka lohsam hi. Yahoo/geocities te ka contact a himahleh ka password ka recover zoukei in ka lohsam hi. Huchi in JAANGPHUALVA maintain/update theilouin ka omta hi. Ka ngaihtuah thak chiangin ka cybercafe zatna a browser in password khong ana auto save kha pilvanlouh ziaka huchia nuse kha ka hi dinga, kuahiam lunglutna nei khatin ka password hon na kheksak hiding in ka koih hi. Gintak le ka neithou a, himahleh ka gentam kei, kei kizenlouh ahi ka chi zaw mai hi.

Huchih chiangin a dang www.zozam.sphosting.com ka bawl nawn leuleua, huai le free site mah ahia, huai le deihbanga hih piching manlouin www.zogam.com lam ah ka internet hun ka zang zawta hi. Zogam.com ah bel bangmah a kilangin a saitu hihna ka neikei a, Zomi site regular taka om gige a om ka deihna ziaka a sunglam a ka hih theihtheih ana hih ana panpih/kipei ka hi lel hi. A diakin forum bang ka nak buaipih deuha, a category/section khong interest leh subject tuamtuam a ding bawlin a thu lam gelh leng ka hah gelh thei mahmah hi. Huai laiin.

Huchi in ka JAANGPHUALVA leh ZOZAM ka ngaihsak nawnkei a, himahleh ka koihsa data bel a om gige hi. Om gige ahihna ah bei ngeilou a om nilouh ding sa in mundang ah ka ka save khe tuan kholkei hi. Nikum 2008 genlouh tukum 2009 bangchiklai hiam tan inle intact in a om kimvek lai hi. Tuni in vaphual.net a top articles for 2009 chih hiam khat a neitpa'n Zonet a hong kikapkhia ka etleh folklore lam telkha a oma, folklore section a luta a ka simleh JAANGPHUAVA ate a pau Tedim pau a kikhek zek a kikoih hileh kilawm kasa hi. English a ka gelh Lengtonghoih bang, kikhek manglouin a kigelh abanga, hileleng a source ZOLAI SIMBU 4 chih anuai ah akigelha. Zolai Simbu pen mukhalou ka hihmanin, English a kigelh mah a diam ka theikei hi. Aneitupa Carey Suante a site mah a comment bawlin a website piching kasak leh kipahpihna ka khak kawmin a folklore lamte koihiama ka simkhaksa toh kibang kasa a, aman a gelh vek mah ahi hiam chih ka dong ngal hi. Huaikhit JAANGPHUALVA ka etdek chiangin geocities ten ana koih nawn kei ua, sphosting ka etdek nawn leh huai ah leng ka account ana subei nawnta uhi. Internet archive ah geocities a ka site ka zon lelah a om tuak kei hi. Huchia ka zon nalamin Geocities a site te tukum October 29 a ana subei uh ahi chih ka thei khia hi.

Bangteng hileh folklore bangzah hiam www.zogamonline.com forum a 2006 khonga ka na koih khak pawl a om a, huaite hiai ka blog ah a kepchingna dingin tuni mahmah in kana koih phei ngal hi. A omnawnlou ka muhzoh nawnlouhte floppy ah ka kollai maitheia, computer ah  floppy drive chihbang aki neinawn kholkei a hiven... Nei hilele a floppyte a hoihlai mah diam ah.. Geocities leh Sposting khong a i account/site khong ana om den ding ana kisa kha mawk a.. Sawt le zaw sawtsim samta a ana paih u lele awmtak himah e, 2000 khonga i koihte tukum 2009 a ana paikhe pah uh ahih chiangin.