A PU TANCHIN NEUKHA

Aizawl apan pem dek pianpianta, inteeknu in laibu khong rep a pack dingdan khong ngaihtuah a na laibute enin chia hon nohnohta ahihman in zanni in ka laibute bangbang kep a bangbang paih theih ding hiam chih ka etfelna lam ah ka pa tanchin tomkim ka U Lal, Khamzalal in ka pa suangphuh laia a gelh ka mukha hi. A gelhna laipek bang le hoih nawn khollou ahihman in a kepchinga dingin a kigelh bangbang blog ah ki post phot himhim leh ka chi hi. Ka pa tanchin ka gelh theih bangbang a gelh ka ut ka chihna sawt mahmahta napi tuni tannin ka gelh thei naikei hi. Data kai khawm ding ka chihleh deihbang in ka hih thei kei nilouh hi. Bangteng hileh hiai lai a om bangbang a nuai a dan hive’n:

PHAMSA CHINZAKHAM TANCHIN TOMKIM

Hon na paisanta Pa Chinzakham tuh 1926 in Phuaizang Guite suan Pa Phungvai’ tapa khatna in Songtal khua ah piang hi. Hiai hunlai a Songtal khua a laizil mi tawmchikte lak ah amah leng na telkha in Songtal leh Thanlon khua ah school na kai hi. Inkuan sung khosa haksat ziak leh kumpi nasem ding mah leng mi kidaihlou ahihman in aban saupi na zillou a, August 15, 1947 (Independence Day) ni in Mualkui khua ah Govt. teacher dia guanin na om hi. Hiai mun a kum 3 sung a sep nungin Mualkui khua a teeng mah Khuppau’ tanu 3te laka a neupen Nu Nemzahoi toh a kiteeng uhi. Ginom taka kumpi nna hon semtou zelin Pasian vualzawlna gila gah Goutan masapen tuh 1951 in hon nei ua, huai nungin leng vualzawlnate dong touzel in tuni chiangin tapa 6 leh tanu 3 aneihte uh piching dinmun ah om thei vekta uhi.

Leitung a piankhiak mai pen detdou lou ahihlam phawka, tangtawn hinna dia Kris thupiak zui in January 26, 1969 ni in tui ah leh Kha ah piangthak in khamuang takin na om hi. Mundang a kisuan khia hetlou in Mualkui Govt. L.P. School ah kum 37 sung vingveng a sep nungin July 1984 in kumpi nasepna apanin khawl (pension) ta hi. A pension nung siah a taksa damtheihna lam ah a bah mahmah a, hun sawtlou sung natna haksa tak a thuak nungin, khovel haksatnate paisan a anuampen gam zuan di’n Aug. 27, 1984 in Lamka Mualpi mun ah hon na paisanta hi.

A damlai in mi taima tak leh mi nunneem mahmah khat ahi a, a insak-inkhang toh leng kingeihloua a omlam theih hilou hi. Mualkui khua a ateen lai in huan (Garden) lianpi a bawl a Lengthei, Nahtang leh theigah tuamtuam gaih zoh vual hilou a, inn kiim ah khuai (bee) bawm som sanga tawmzaw lout oh teeng khawm gige hi.

Atate laizilna tuh a ngaih thupi peen ahi gige a, singtang kho neuchika teeng himahle uh a tate School kai sak vek zou hi. “Inkuan kim a mun khata omkhawm lou a mun tuamtuam a omtheih i tup chiat ding uh ahi” chih tuh ate a thuhilhna khat ahi. Thu tamlua genkhe louin a gen vanglak a chi giugeu a, a genkhiak vanglakte tuh manpha thei mahmah hi. Inkuan sung khosakna/kivaipuakna lam ah leng insak-inkhang in etton tak sathei mahmah hi. Khatvei atapa khat un bang (wall) a Iodine thol kikhai ana dawn kha a, Azi in “Kei kizen zohlouh ziak ahi, na gamtatna nung kana enzui zou kei a ahi’ a chih leh aman leng “Ken ka gamtatna nung ka hem pahpah kei a, kei mohna ahi zaw” chi in ngaihdam a ki ngentuah uh chi in amau nupa tanchin tuh moulopna leh mun tuamtuam ah ki thuhilhna in kinei hial hi.

Pasian vualzawlna gila gah Goutan a neihte leh tua a dinmun lel uh hiai bang ahi:

Atate Min Sepna Zi/Pasal Ta Neihzah

1. Phungchinthang SBI Officer, MMGS II Niangzavung, UDC 3
2. Pauzalian SBI Remthang 2

3. Nemzaniang Business Thangtinlun 3

4. Awihoihching Awnkhomang 1

5. Thonzason Niangzavung 2

6. Suanzakhup CCG(VB)

7. Songzagin CCG(UBI)

8. Pamkhanvung

9. Dal Jacob Student

A PIANPIH SANGGAMTE

1. Ngaizachiin (L)

2. .

3. Luannem

4. Sialniang

5. Thangkhothawn (L)

6. Nengsuan (L)

7. Khamzadal

8. Chiinpam

9. Chinzaning

10. Ginzam

A inkuanpih tanau-laina te’n amah theih gigena di’n Lamka Tung hanmuala a haan ah ama kampau mah:

“DAMLAI A KI-IT DING, SIH CHIANGA KIVUI DING”

(No Postmortem Kindness Please)

Chih gelh in suang phuh ahi a, hiai thu toh kisai in hihzoh dandan a ankuang lui in tuni in ngaihnat tuamtuamte hon kichial khawm hi.

(G.Khamzalal)

A LA DEIH

Mihing damsungin tuailai hun poimoh,

Na tuailai hunin na mihinna bawl;

Na hun zatdan en inla,

Lungsim leh deih enchain in

Na tuailai hunin Pathian thei inla

Hon siampa thei in, tuailai in

Mi Pathian theite zaw lungmuang in si hi,

Hiai hi Pathian theihna Jesu Khris neih;

Mihoih a hon bawl dingin,

Pathian ta Jesu si ei di’n.

Hiai la a deih mahmah a, inkuan kikhopna ah atate thuhilhna a nei zel in amah kia in sa zel hi.


Hon paisansate paini chiamtehna:
1. Chinzakham       27.08.1984
2. Thangkhothawn 13.04.1985
3. Khamzadal        28.01.1997
4. Dimawi              15.01.1975
5. Nembiaklun       03.03.1987
6.Dousonlian         06.04.2012    
7.Joshua Khamkhanmung
8. Niangzavung