Muktuam Mah

A hun toh kituak le hiven, muktuam mah chinawn ni. Thilthak chih theih ahi zomah boka. Mukbulh chih di hia Muktuam chihzawk di, a malam in Muktuam ka na chikhin abanga huai mah paipih mai ni. America lam khonga “ka taksa kei thu”, ka ut leh ka bun dia ka utkeileh ka bunkei ding, nou hon phutluih kei un chihdan hilouin eigam ah muktuam ki bun diamdiam vanglak hi. Kholai i vakkhiak zek a i etvel leh vaite anu apa, atek akhang, kholai a i muhten le hon bun chiat uhi. Adiakin  rickshawala, pandukanwala, mutia  chihte khongin le hon bunvek uh i muhleh khovel zaw khekzou tak himah ei chih veivui sim in a om hi.

A mantam, a mantawm, a brand, a local abang chihlam hilou in mi tengin thumangtaka a but diamdiam uh hoihluatna khat om abang hi. Lusei pau bangin “ a va han mawi in a muhnawm tak  em” a chih di chitak uh hileh kilawm mai hi. Thumanna i chihpen lauhna lehhihzaw le hi maithei tak. Bangbang Act ahiam puanga thupiak om ahihna ah. Bangteng hileh kholai i vakkhiak khak chia khodaka  i na et vialvial leh pu Di style a local deuh bun bang, N95 bang,  a chituamtuam hon but uh muhtheih tampi omte na etet theih di abang. Design tuamtuam – a nu deuh, a pa deuh, a sexy deuh khong bawla nek muhloh le omthei ngei ding hitah chih in om hi. Nekzontheihna zaw kikhek khek mah ahi ve.

 Pharmacy khong ah leiding a omta ngei dia, a CHK deuh khat lei ding ka chihchih zaw hia, ka leikha naikei nilouha. A spare khong neiha a office a but di bang, kholaia but di, lawmte laka but di chihdana atuamtuam neih bang le hong poimoh leh kilawm hi. Nungak leh tangvalte a di bangin a fashionable deuh chih bang hong om mahmah ngut in teh.

Pu Siama ka chih mai uh, UPC Pastor, a tanu puankhuisiam khat om hiven, inteknun “puanten ten chia silhtheih ding puannak khuisak ding ka hi” a chi a. Mizoram khonga puankhui nungakte’n tawmngaih suaha a puankhuina inn ua kikulh zena asun azana muktuam a khui ziahziah khong uh utube a ana ki enkha ahihmanin “muktuam a khui theihleh bangzah hiam le na khuisak kawm lechin” ka chi hi. Hon khui ngeia, ka inkuan ua 2 hia 3 chiat hiam a ka tan ding uh na khui in na kipia uhi. Aman nei a kikhuisak uhia, athawna chihlam le ka theihpihkei hi. Inkuanten chu kipahpih vanglak in meh hiam, bang hiam lei dinga a pawtkhiak zual chiang un bun sek uhi. A khui le a siama, a sunglam ah puanpan leh nem, a polam ah a vang si lah sahzaw deuh a zang hi. A rong bang le chituamtuam ahi a kilawm mawhlou hi.

Kei a di a chihte uh hon butsak dek sek ua, ken lah ka but chiangin bitdeuhsa ka diam ah ka bunnuam mang kei. A huihlutna ahia apawtna bembawk (chi mai ni) omte bang achi diam ah, ken chu muktuam ka bulhkhak himhim tuni tannin nuam kasakluat a om nai kei. Office ah le N95 chu hizenzou lah hoih mawhlou staff teng ka minkim ding uh ka lei ua, pakta in a bun souhzouh uhi. Kei avom khat ka tangkha a kigak peuhsa in ka bunnuam kei sim tageet hi. A elastic gui-in i bil bang hon kaisuk sim, a huai tunga i mitbulh kung kinga bok hi sathei kei sim mahleng tuni chu ka bunta khong mai hi. Butnop leh noplouh thu hinawnlou a but ding chih ahihmanin ki ngeinaseh leh zongsat hun hong om sam nalou di hia.

A bangteng hileh hun sawtpipi kibunlou ahihna ah a zia om. Office a i tutna a i tutchiangin i khabe nuailamah ki kaisuka, inn a lah kibunlou, banghiam lei dinga a kholai pawtzual sung khong kibun lel tadih hi. Lehlamtak ah lah office hin kholai ah hitaleh mi toh omkhawm, kihou chianga a khabe nuailam ua a kaihsuk u leh nuam chiahlou khat omin “kaitou mai ve” va chih hial di lah hilou deuh. Phone in kihouzaw ni va chih di lah hilou. A hon but thipthep chiangun chu kihoudan hong lemzaw pah abang.

Huai khong le himailou di hia NEW NORMAL chu.

[04.06.2020]