AHIHLEH

Ei pau zat - thugen, laigelh, gelhsa simkhiak chihte awlsam leh baihlamlua hi khollou hi. Ut dandan a paukhiak leh gelhkhiak mai theih mahleh thugen a pauzat, laigelha pauzat ahihkeileh laigelhsa sim siam leh siamlou kikal om ding hi. Laigelh khenkhat i sim chianga mam zaih, gennop genkha, a sim le nuam i sak bang om hi. Huchimah bangin mi thugen ngai le, thugentu in emotional a mi a zohtheihna pelah, a pau zatdanin a gennop gen chiang leh bun deuh bang om nawn hi. I TV news, interview, film, serial, show tuamtuam youtube a omte khong i na et/ngaih khak chiangin a ngaihnuam deuh leh a nuamlou deuh i sak bang na om sek hi. TV news khonga a simtu sim siam leh siamlou deuh om mahleh sim dia news gelhtute’ gelhsiam leh siamlouh ah le kinga mahmah ding hi.

 

Hun neih chiangin Youtube lam ah ngaih ding ana hauzaw unau khenkhatte a na ngaih khak zel pawl om hi. Mihing kidaihzawte in laigelh tuamtuam le na hauzaw ua, a tangthu/novel gelh uh ngaihtheih dia youtube a a koih uh le na kidaih zel hi. Huaite i ngaih chiangin a ngaihnuam i sak deuh bang, a simsiam deuh leh siamlou deuh i sak bang le om hi. Youtube channel tuamtuam in laigelhtu khat gelh, tangthu kibanglou a simte uh bang le a ngaihnopdan ki banglou in channel i ngaih zongsaklouh pawl om hi. Hiai pen a ziak tampi omthei dingte laka a simtute sim siam leh siamlouh a kingakna lianpi le om ahi  chih chiangsaktu i chi thei ding. Huai i chihna san bel, a tangthu gelhtu lah kibang, a gelh siamdan, a pau zat siamdan khong lah a ngei mah, a channel tuama a simtu kibanglou ahihnatak ah ahi. 

 

Kama genthoh hi in gelhthoh hitaleh  i pau zatsiam poimoh ahi i chilou thei kei. Kama genthoh pen koihphotin, a gelhthoh lam en le. Laigelhtu’ pauzat leh gelh a siam leh, a simte a dingin baihlam leh nuam sot ding in i gingta. Ahihleh koia bangchi ki zila, bangchi siam ding ahi dia chih dotna hong omthei pah hi. Huaibanah a siam leh siamlou chih bangle kua in khena a tehna dia bang zang ding chih khong le om suk lai di a bang. Hiailam pen a lunglut leh ngaihtuah thukte buaipih dingin nusia in a simsiam toh kisai ah pai nawn le. Simsiamna dingin eipau a laigelh khat peuh, thutun tuam mi tuamtuamin hun tuamtuama a gelh uh simtam poimoh pen ding hi. Huchia i sim chiangin a gingkhia bang,  a ginglou bangin le simin simtam zou le kizilna hoihpen hi ding hi. Huai kawmin khobing pau tuam, i pau laka awkaih tuam omte bang le theitam zou in, pau kumlui leh pau upazaw deuhte khong le theitam zou laile phatuam mahmah dingin  a gintakhuai hi.

I genbeh ut khat  AHIHLEH, laigelh ki lem hoih manglou, sentence saupi a ki gelh belbual ahihmana simhak pawl a oma; laigelhsate etkik khak chiangin kei le hiaia bangkha in ka siang het kei hi. Huchite a sim siam mahmah khatin sim lele a buaipih ngai ding pawl om hi.  Huaite a gelhtute pau zat siamdan, gelhdan/gelh siamdan a kinga, simsiam leh sim siamlouhna lama kingalouzaw hi ding hi. I pau gelhthoh a bukimpena i neih Laisiangthou ahi ding. Khang paisa tampi i paua ana chawm khit bangin khang hong om ding tampi leh hun saupi i pau sinna leh kepbitna dinga poimoh ahihna ah Laisiangthou gelhdan bang le vel a puahthak a ngaihnate puah ding mah hi ding hi.  A sui leh velchian hilou i hihmanin hiai lam le ahih di awmte hih dinga koihin i gensau kei ding.

 

Pau zatsiam, pau gelhsiam, pau simsiam i gen belbuala, tu in i pau zat leh gelhna ah a kul ngellou, i na zat zongsat ahihmana i zatzat tampi a om i chi dia, sui leh ban gelhkhiak tuanlou in simtuten a ngaihtuah zom ding un i koih ding. A genchetna leh etsakna dingin khat bel i taklang ding.  TV news khong youtube a a koihte uah kul ngellou a AHIHLEH chih ki zang nonnon a nuam lutlutlou i na sak ton na om mawk hi. I pau zatdan, gelhdan suisui zou le houchik leh poimohlou a i ngaih tampite le na poimoh ahihlam phawk thakthak ding tampi omtuak hi. Huai dinga a lunglutte ngaihtuahna a tokthou thei kha hiam i chihna lel ahi.

[Dibrugarh

10.09.2020]