Eipau A Sappau

Eipau kisiam zoulou deuh ahi dia lai i gelh chiangin sappau va helkhak zek ngai om veu hi. Eipau gelhna a sappau malkhat le telsaklouh ding chih ngaihtuah khak sekin oma, huai sawmna sappau a thumal i na zat zongsak khenkhat eipaua i hon koih dek chiangin buaihuai sim hi. A thumal midangin eipaua ana koihsa omnapi en i na theih khaklouh bang omthei a, laigelh teng ah eipau thumal bawlthak kawm le hang midangin le huchimah in ana hihle uh thil khat genna  kibanglou tampi nei  teltul mawk le hoihlou ding bang hi. Huchibang dinmun ah eipaua letselou a sappau mah zat suk hun oma, sappau eipau dana kaih dan tuam i neih zulzuia gelhkhiak i sawm ton bang omin zuih kichian ki neitheilou hi.

Hiai huzap maha i pau zatna leh zatdan i hon et chiangin sappau thumal ki nak zatlua hilou hiam chih di bang hi. Tu covid19 lockdown sungin online sermon tampi ettheih ding hong oma, ni khat thugen ka ngaih zek leh thugentu in sappau hel tamdeuh bang ka sa, Eipau a TV news leh youtube a muhtheih tuamtuamte ah leng huchibang mah ahi thou. Sermon ngaih kawma ngaihtuahna a honglut ahihleh khangthak leh laisiamte in thei vek mahle uh a upa lam leh sappau theiloute a dingin ngaihkhiak lem khollou ding bang hi. Houchik a i koih leh ngaihtuah ngeilouh khat henlut lai le, public muhdia om news, film chihdante kia lou mimal kihouna a mobile number khong i gen chiang bangin le kua, li, thum, guk, khat, li, thum, thum, guk chihdanin eipau khong zatsawm le haksa hetlou di zaw hia.

I buai nawnna khat uh hia a kilang gen lai le. I thulu pelkha le himaithei, i pau toh kisai ahihna ah chi in kisiamtan mai ni. Lamka a khotuam tuam pau kisukhawm in hong kinawktuah a, huaite ban ah i unaute pau, eia toh kibanglou deuha i koihte toh le hong kinawkkha lai ahihmanin pau kilohtuah (influence) a i helgawp vek chiangin i paukhiak, i genkhiak khum  leh hi geihgeih (effective) zoulou in a ngaihkhiak le nuam nemnumlou hileh kilawm hi. Chihbel, insunga Lamzang, Bukpi, Lousau, Dapzar etc pau zangten mi toh a kihou uh ahiam, mipi maia thu a gen chiang uh ahiam in insunga a zat uh awkaih mah in gen chetchet le uh a gindan leh a zakdan nuamzaw ding bang hi. A pau kibang, kaihtuam lel a kitheituahlou ding lah ki hilou ahihman in. Hiai thu ah kuamah mimala dem leh mohsa i hikei a, kei ngei leng ka siang tuan kei. A mi ka houpihte a zilin ka awkaih khek dinga ngai in khek khakha lai ing. Ka laigelh ah le awkaih tuamtuam omte paumal zat hel theihtheih hel ka sawm sek. A gelhthoh pen zaw thutuamin le a koih thei ding, sawtpi daih ding ahihna ah heldan siamtakin hel le hoihzaw kha in teh.

Hichi dinmuna a kenchia i ngaihtuah chiangin i pau it zoulou leh a khan leh tuallen ding lunggulh leh ngai poimoh leh pan la zoulou deuh mah houh i hi de aw chih di a bang. Lehlam ah lah i tulai khovel ah khobing tuamtuam awkaih hong ki sutuahin huaite kip nailou leh luang henhen thei nailou deuh en ana ngaklah lua a insunga i zat chiat nal takin zang le ana chikha i hi diam chih bang le om zel. Buaihuai ka saksim khat ahi/

Bangteng hileh i paua laigelh, news, thugen chihte ahithei tan ah sappau khong hellouin eipau ngen zat hileh i pau leng bukim ahihna taklang in zahhuai zaw ding in a gintakhuai.