Lockdown lakkhiat hon pat zet u
leh a covid19 le bei hial ding hileh kilawmin khosung khong hong thoveng mah a
bang. Chile lah sorkalin a bawl covid19 update na munpi website i et chiangin
eizau lam (North East) ah hong ki khonung pat a bang zel. A sang (buhsang
chihdan a zat) va chih dia lah tam deuh ahihmanin
hitheilou hi. Min lockdown a lakkhiak pat leh eilam hivei kipan, kisan leh hong
kibuai san mawk hi peuhmah. North East chih mahtak hiai lama le ana ki tuantual
leh zekai zel houh a diam chih di ahihkei ngal leh. I chih hangin, lehlam gamtawp
Maharashtra khong bang le zaw nitengin a vei a dimin omom lai sam. Nitenga pha zah
bang le eilama toh teh vual di le hi kei. Amau a mihing tam, a test mah le hahbawlzaw
hi ding uh hiven chih theih zel tuh hi.
Vuah zuzu lai mahleh tuilian lou
deuh, a hun geiha hong khawl zel tadiha khopi sung buaisiatna omlou chih ding
hi. Vuah zuzu leh khonim nim dedu khonga a hong om chiangin nidanga Silchar
a omtung lai a tuilet lai khong phawkin
om thei dek mawk hi. Lungleng va chih
zenzen di lah hikei ven. Polam apan bangmah hong pailou, nek leh tak ding mumah
le hang deihbang lou, bazar khong buan a nawi toh meh di bang vang mahmah. A
omsun a hoihlouh ban ah mantam lai. Office kai tawp inn pai chia lampi leh inn
compound khonga tui pal ngai chih khong
hi in. Insung ah tui hong lutzek man mahleh bathroom khong hi deuha, huchi pi a
hong luttamlou tuh hi. Bangteng hileh
hinkhua nawngkai sakin lungsim khat nuam dedu khollou in ki om hi. Tua
ka omna khua uah tui hong lian lele, ka inn uh bel tui in hon tumlou ding hi.
Nisat chiangin a lumdeuh a hiven, tuitup ding zaw sawng khatna ah
huphulhhuailou phot hi.
Assam gam hih lianpi leh leihoih
mahmah khat ahi viala, a gam neiten zang phatuam khollou a di uam chihton om
hi. Polam miten bel enlah a hong lutlutin khosakna ding le laikhe zel mai uh
hihtuak. A gam let banah Brahmaputra luidung a omkha chih mahtak mun tampi ah tuilian
omkhina a buaisia leng tampi omthamta hi. Zannitak chih ding hia tuzing chih
zawk ding, vuah zuk chihtakin hong zu a, khua hong damin blanket bang silh
zozen theih in hong om hi. Zingkalin bel vuah zu nawnloua, tua hiai ka gelhlai
(sun) in khua nimin nitak chiangin vuah
hong zu zou mahmah leh kilawm hi. Kal paita a weather forcast ah zingchiang tan
vuah zu ding chih khat om hiven. Bang hong chi zuk touh zel diam, zannitak dana hong zukzom zel leh bel tui lianhaklou ding hi. Covid19 veng hikei mahleh
lockdown hong ki unlock leh buaina dang
in hon zom zui ngal ding abang chinuam kisa a huai teng hon bangen phot i hi
hi.
Khovel kha a huchi mah ahi a, a
bawltu Pathianin thil ahi dinga a bawl gamgi, mihingin duham mana i va pelhluat
chianga buaina hong omtou zel hih tuak. Thilsiamte (nature) khong zaha i kepbit
kei leh mihingin a huaise zaw le tuak toutou lai kha ve ni e. Covid19 a kivenga fimkhur di toh, a dang
phuttouh ding hong omom ding hi. Bangbang hong omtou zel diam ah..
Office lam ah hiai gelhtanin thupiak
thak a om naikei, state government in le bangmah suah nailou uh a diam muhkhak a
ki nei nai kei. Huaima a MHA te lai pansan a ana kipat mawk lah hilou dia i tunglamte laisuah ana ki hungaih phot chih
ding hi. MHA te lai ka china a, a copy whatsapp khong ah i muhte le kisim
naikei lai. TV news headline khong a i muh zual apan phualpi sorkalin economy kesia
khong ngaipoimoh kisa, hiai lockdown koih det na dan omlou chia khahkolin,
mipite pilvantaka covid19 toh hing dia hon koihta uh bang saksim in a om. Kou
hih di teng hihkhin, nou thu na man ua kivendan na siam ding uh, huchiloua a
kai na om u leh na kivenlouhman uh hita ding hon chihbawl uh hin teh. Bang hong
chi pai zel diam ah.
Hong ki khahkolin hon hong vek
ngei uhenla, zinsuk zintouh le hitheita
leh chihhuai mah ei. Lockdown ma a zinkhiakhia hikei lele, weekend leh hunawla koilam
hiama va dian zual utle le hitheilou hi mawk. Hichia kikhum nilouh zaw nuamkhin
nawnlou mah hi. Nek leh dawn lam le a ngei teng mah ninhuai simta. Eilam meh
diak chile, singthupi, khangkhuh, tengkol etc dante bel lametna dan le om zozenlou
in, ei omna a i na muhphak sek – singzual, anphui, aige dawng, nahtangum etc
khong bek duhhuai hong bangsim ata ve. Muhtheihlouh pi a kigakna om pen ning
kitel thei dek khong aka. Americate khong le a kikhumna uh ning kitel gawpa policeten
mivom khat a khoihlup khak uh lemtanga la in mipi sousanga buai noknok mai uh le hithei tak a mah ve. Eiate’n
le huchibang dinmun omthei chia a khahkol lam honpan uh bang le hithei tak ahi.
Office lam ah bel April leh May
kha nikum a business kipha dek suailou ahihna ah tukha apan lametna sangpi hong
om ding a bang. Tunglam aten noha hon nohsukin hon holh get nalou di uhia..
[01.06.2020]
Dibrugarh
No comments:
Post a Comment