BAH PRO' TANU

Bah Pro' Tanu chih thulu zang a i gelhdek leh Khliehriat khua leh huai a ka nasepna, ka seppihte leh seplai hunte khong sut zek phot ngai bang ven. Pan suk sin ni le.

Khliehriat. Khliehriat tuh Jaintia Hills District headquarters Jowai leh Lumshnong kikal, Ladrymbai gei a om, Shillong apan km90 vel a gamla ahi ding. Suangmeihol lakkhiakna munpi ahih man nitenga kilawh (labour) - Cachar (& Bangladesh) apan Bengalite, Kokrahazar a pan Bodote leh Nepali, Bihari chih khong a atam uhi. Sumdawng/dawrkai le vaite a hi zaw sim ua, Meghalaya Police a sem Assamese leh Bengali hunkhop [Khasi leh Garo a gammi danin koih le] om in BRTF Camp ah vaite om zek nawn ahihman kholai ah Jaintiate sangin vaite ki daihzaw bang hi. Zo suan lam ah Meghalaya Police a sem Hmar khat, undivided Assam hunlai a apa uh (phamsa) Police a lut Lusei inkuan khat, Khliehriat kho kima teng Biate tamlou, Catholic School a sem Tripura apan a Darlong nungak khat, Manipur apan Kom tangval a sep ka theih zohlouh leh sumdawng khat-le-nih muhkhak zeuhzeuh chih khong ahi lel ding, kei omkhak lai in.

Jaintiate gam ah lei nuaiah minerals- a diakin coal leh limestone tam mahmah hi. Vuahtui bangle tam mahmaha, Mawsynram, Cherrapunji sanga vuahzuk tam zawkna chihpen leng Jiantia Hills ahi in ka thei. A gammite’n amau mimal gam a coal ompen labourte laihkhiak sak, zuaka sum suah uhi. Huai khong teng mah buaipih a nei in coal nawnna ding Shaktiman (sepaih truck lui) a neih uleh hun gawp, naupang school kaisak nangawn don lou uh bang hi. Tangval khenkhat ki khotual sak, sum (puakguk nangawn) nei, kiphasak leh a nungakte uh veng mahmah pawl a om a chi uh. Pawlkhat in Police Station bang buluh mai, Police lamin bangmah loh ngamlou chih khong a kigen. Misi luang - kua thah ahia chih theihlouh khong a om zeuhzeuh. Shillong apan zingkala bus a tuangtou, lamlian geia siluang na om khong kei ngeiin le ka mukha hi. Lawm polh ding a vanga, office kailouhni leh weekend zat bei haksa hi. A family uh om ahihman seppihte holiday leh kiginni teng in Shillong ah paisuk in thohtanni zingin hong paitou nawn sek uhi. Kei leng amau bangin weekend tamzaw Shillong ah ka paisuk sek hi. Paisuklouh changa lawm polh ding omsun, vaipau a houpih theih Police a sem vaite, Khasi leh Garote leh Bodo labour khenkhat ahilel hi. Kipolhdan pen zudawn leh carrom kap, video hall a film va et chih khong ahi mai.

Bah Pro' Tanu. Inteekte sawmill nei, Bah Pro kichi om hi. Bah chih hi, e’n sanga upa zawte u i sak bang deuha Khasi leh Jaintiate’n pasal zahdeuh kawma sapna ahi a chih theih dinga, Pro chihpen a min ahi di chu. Ka Managerpa uh inluah neitupa ahih ban ah ka office ua Current Account nei ahihman ka kithei mahmah uhi. A tanu kimu vang mahmah pen tawlkhat hong kilang hi. Mingou, mai zum pian, amai a chivom a neuchik om, hoih mohlou leh nungak lian lawlou ahi. Amin le ka thei nawnkei. Khliehriat a lawm polh di omlouh ban ah nungak melhoih muh di vang ahihman Shillong lam nungak hi awmtak leh Mizoram nungak khualzin hongpai i galmuhkhak chiang in sepaihte bangin ki munuam phial leh kilawm hi. Huchibang dinmun ah Bah Pro tanu pen “angel suti hongpai” a chih uh toh teh theih leh kilawm. Khosunga a dang i muhte toh teha a mel vak setsat, sappau bang siam mahmah ahih chi’a ki houpih, kilawm bawl bang thalawp huai khat a suak hi.

Nikhat cashierpa suti lai cash counter a ka tut leh [cash counter a tut chihle, ei a clerical staff omsun i hih chianga cash counter polam na teng toh sepkhop vek hithou] i lawmnu in sum hong deposit hi. Maitai leh nuihmai heuhaua, kamsiam mahmah hi. Gammeite pau kisiamlou, vaipau le deihbanga i nallou ahihna ah Sappau a hong houpih chiangin, Khliehriat a huchibang kituak vang hiven nuam tuamin Shillong gim bang nam hileh kilawm hial hi. Huchi a ki neelpian in, kholai a ki tuahkhak chiang in hoihtakin ka kihou zel uhi. Apa le i theihsa mah, i customer ahih chia ki midang koihlou leh ki neel deuh mah hi.

UBI Staffte. UBI Khliehriat a sem mi li ka hi ua – Khasi Branch Manager, kei Clerk-cum-cashier, Jaintia Cashier leh Khasi substaff ka hi uhi. Koumau tumtum a mi thupi mahmah ngen ki sukhawm ka hi ua, ka loupi khopmai uhi. Mi li kia chilou in ka ki thutuak kei nasa mahmah uh.

Sihal banga pil chihdi hia, Managerpa, kou 3 lak nana na a paneu pen -i liangkou tan khong pha lel chilou in- kiliansak in ki chethei sak mahmah hi. A lawmte kiang bangah kou a staffte kha “They Are Pigs” [whatever that means] hon chih hial kha ka hi ua. Ka substaffpa u lah nungak lama duailou, a ut hunhun a zi leh taxi thak neithei chihdi ahi diam ah. Taxi thak i chih, a lui a taithei dinga bang chichi hiama a bawlphat ahi, a khenchiangin taxi sunga jerrycan apan pipe a petrol engine a a zawllut in atai sak hi. Cashierpa lah chipha ahi dinga kum 40 khonga ta 9 lam neita, kuva leh laizial (of course zu at night) a neih nak leh hun.. A theih vanglak chu thei, a theihlouh lah hilh but hilou, a bilha thoulou a chihte uh ahi diam ah. Sum bundle khat bang 10 vei valval a sim de aw chih ahi.

Kei tageet lah na om peuhmah koih theilou, zoh manlouh ding lau hi awmtaka kinoh taka sepa sem zungzung mai khat ka hi a. Kiginni chiang bang a tuh banking hours zoh a internal workte hihdingte hihkholh theihtheih zingkal apan a hihtou ngal mai sek ka hi a, Managerpu in nasep hat honsa lah hon phat nuamlou, phat malaka Regional Office in “it is reported that have been doing deliberate slow practice in work… you are to clarify within 7 days of receipt of this why action should not be taken against you as per the banks rules”[not quoted word by word. hiai thu le gelhtham ching zet zaw om ding hiven] chia MEMO hon piak ngat uh ka hi a.

Ka semkhawm u chu ka nasa thei mahmah uh aka! Kiginni tenga Shillong a paisuk, ahihtheih liai leh Managerpa toh motor khat a tuangkhawm lou hamham ka hi uhi. Motor tuan i chih Silchar apan a State Transport hongpai na taan, Khliehriat a pana Jowai bazaar bus a tuan ahihkei leh Shillong lam manoh apai, coal pua truck khatpeuh a kihen chih khong ahi. Jowai tan i tun nak leh Jowai to Shillong bel buaihuai lou hi. State Transport last bus 4pm a pen i lap kei lele, Jowaia Khasi nasem, weekend a Shillong pai ding taxi share pih ding khomial nung tannin le omthou hi.

Nasepna Genbeh Lai Vanglak Le. Thohtanni zing, Shillong apana kiklam motor kibangloua i tuankhak a Managerpu ei sanga minute 10 bang a ana tun masak zawk ngeingei letuh a san ngata attendance register a L (late mark) kimu geih mai sek dan ahi a. Naupang school holiday laia a zi-le-tate a hong zin khak u leh amah Shillong pailou ding, kiginni nitum phialphial a na hon seppih a hon khahkhe lou sek mihing ahi nawn. Huchi khong ahihman ahi di chu, thohtanni khat leave la a Shillong a ka om kalin Managerpu 10:45 A.M. tanin Khliehriat tung zoulou hihtuak. Huaini Substaff leh Cashierpu na tungbaih zenzen ua, Substaffpa’n Cashierpu na thuzoh ahi dinga, 10:45 am in UBI Regional Office, Guwahati leh Shillong a Unionte kiang ah Telegram - OFFICE REMAIN CLOSED TODAY AS KEYHOLDER BRANCH MANAGER DID NOT REPORT TILL 10:45 AM (STOP) chi in na khak pih hi.[Khasi substaff in sappau pauthei leh gelhthei] Kei Shillonga omin thil omdan theiloua, ka pai chianga ka late khak ding lauin huaini mah in Shillong hong paisukin Risa Colony a ka omna ah hong hilh uhi. Huchibang khong ka hi ua, ka tanchin uh gen ding tampi a om ding, himahleh hiai ah i gensau nawn kei ding.

Restaurant ah. Ka substaffpa un a taxi khong koihkhia in (Chinese) Restaurant khat hon hong hi. Sum dinmun hoih zawk ziak ahia, mikangte’n ana lawh deuh uh ahia, Khasi leh Jaintiate khong eilam sangin restaurant khonga nek culture ana nei zaw ua, Khliehriat kawm khonga restaurant hon le lawkthou khat hihtuak. Substaff in Cherrapunji product, nungaknou melse hetlou, san tiitiai zen khat hon neithak boka, huai toh restaurant buaipih in weekend Shillong ah pai nawnlou hi. Kei leng weekend khat pailou, nitaklama a restaurant uah banghiam ka va ne hi. Nekhin a dingkhia, counter lama ka pai leh dantan khata Bah Pro tanu leh naupang nih na tu keuhkauh uhi. Ka kihou kawm un a hong kimai a, “Ehh! Ka purse ka tawikha kei ka chi..“ hon chi vangvang in buailua danin hong om hi. Direct a hon ngen hikei mahleh a bill lam buaipih dinga hon beisei hi a ka theihmanin, a chow nekman uh ka piaksak hi. A khosakna khong uh etin huai nekman khonga hon khem ding hi in ka koihkei a, kineelsemna ding a lampi sialna a diam chih zaw ka thei kei. Kipah etsakna chi ahi di u chu, inlam ah hong zui ua, ka inluahna ah ka pai ua, magazine leh comics bangzah hiam hon khel hi.

A in ua va hel di chih leh *)%*%^#!. Kha khat khong a pai nungin weekend ka om kha nawna, nitum in Bodo tangval-coal labourte toh carrom ka kap uhi. Nitaklam anhuam kawmin a lak ua khat, “Tarzan” ka chih mai uh [huailaia vai film kithang khat apan a laksawn] lai theilou chia kingainiam leh nunneem mahmah, tha lama tuh amin pokha mahmah thou toh ka peg cheuh uhi. Annek khit, ki om thiithiai sim lai hiven, “Chalo! Bhar zaiga” chia ka pawtleh paulou in Tarzan in hon zui mai hi.

Jaintiate [for that matter even Khasis] ina a kihel uleh kihel louh uh thei khang, Bah Pro lah theihngei hia, a in ua va pawt himhim bang a siatna lawmlawm om ke’n teh, a tanu lah maingal huai thou, “kan vanneih phei chuan.. “ pawt gige na ding bang le neihtheih kha venchia chi in a inlam uh Tarzan ka manohpihta hi. A in uh lamgei hiven, lamlian apan a a gate ua ka lutsuk u leh tuahchil a tukvelh ah mei na vak keukau hi. A sung ka etleh a tanu laisim chihdan in table khat ah na tu keuhkauh hi. Ki maingal saka hong pawtdek ka hi uh ka chihpat leh Karei! Pawlnu patau law mawk! A khutpek geel honlak in, zakphak si, a ngaihlou theipen dingin “ Na khawl uau. Hong pai kei uau. Ka pa’n hon mu ding” chi’n hon khamta mai hi.

Va lut teitei di lah hilou bang ahih chiangin back gear la in lamlian ah kik uhi. Amah le hong pawtdok ngala, huai a muh chiang in bang a chihna a hiam Tarzan awl a kihemkhia in hon kigelsan mawk hi. Genpih kha khollou ka himanin aman bel ki ngaizawng di honsa, chance honpia ki chihbawl hi dingin ka um hi. Beiseih louh dan taka thil hong om vekta, nungaknu va kiksan mawk ding lah hisamlou a hih chiangin nungaknu kiang bang gen ding? Koi a pai ding? chih khong ka buaigu sim hi. Ki ngaizawnga hun thoveng mu chih lah hilou ahihman in omdan lem liailuai lou khatin om hi.

Huchih laitakin nungaknu’n ka awma hon sawnin

“MY FATHER!”

“RUN!”

hon chi mawk hi. Bang dia tai mawk ding? Tai tuanlou in ka dinga, ka etphei leh a pa vaiphau a hong hawk khe kawma hong tai kamuta hi. A gen ka theihsun chu, SWAR KA BACHCHA! TUKRA TUKRA KAATTEGA! chih ahi. Maizen! Zaknuam lua zaw hi het kei ei! Kaun Banega Crorepati a Fastest Fingers First a chih uh bang deuha i khutzung bang ana kin deuha, a tanu koi lailai hiam khong ana maisak chihbang hi beek lele thukhat. Ka kiang uh a hong tun phetin ke’n le vaipau ka siam theihtawp leh aw neemtakin Bah Pro aw, hiai na tanu toh bank a sumkoih dia ahong pai apanin ka ki meltheih ua, ka laibu khong hon khela, huaite la kawm ding chia na in ua hong pawt sawm ka hi ka chih patleh, nungaknu sakhi tal zaangtak bangin taimang hiau hi. Koia bang chih sawm ahita maia le ka chihsim leh second tawmchik nungin hong tungkik paha thet-theta, ka laibu alakte hon tawikhe tiiltiil in apa mai ah hon peta hi. Huai va genkha i hih maimah chiangin ke’n le kana sang ngal mai a. Huaikhit, gendi dang vang mahmahta. Bah Pro hi’n atanu hileh a pau khuk omlou, kei le paulou in ka ki khen hiau uhi. A pata un bang a kiloh ding uam ah.. ki theizui ban talou ei ve.

Akhonung a ka theihthak danin a tanu pen Shillonga a College kai hia, a omdan hoihlouh mana a omna hostel apan a nohkhiak uh hih tuak. Tangval toh ki taipih zihzeh, a pa’n a kaihkhen zel dan hi in kigen hi. Ana zei law khin, a om maimai thei nawnlou, experience haupi khat hihtuak ei, i pawlnu. Khonungin tuh: “Apa’n hong save! Baachgya re!” chihsim in a om aka.

A zingin bank a sum koih dingin anu hongpai hi. Sum bundle khat a note 100 zel kihenlom sek hiven, a note hon piak lom khenkhata pek 100 val ki koih pawl a om hi. Kuva haina kamsan seisui toh kamsiam tak leh nuihmai takin hon houpih nilouh mahleh bundle khat a 100 sanga tamzaw omte a koih mawng uh, a thangkam uh hi dingin ka ging sim hi. Huchibang thang khonga awk geigoi a hon manthei di uh kisa a di uam ah ka chisim a. Huai thang hi’n a tanu thang hileh ki awkkha lou tuh eive!

[internet kal khat khong i zattheih kei leh chimhuai chia laikhat ka gelh dek sin leh, ka sunzom peih na diam ah.. tangval lai thu hi. huai a pan munkhat stand alone zattheih dia kon hekkhiak ahi ei. zogamonline nungak-tangvalte laigelh dia ka chouna ahi pen]