Zosuante nam lian na hi ngei, ki khenzak a nam neu leh mawl suak i hi chipawl om hi. Hiai ngaihdan in pansan ding in culture/ chindan khenkhat a meilet hi. Hiai ngaihdan a dik/ a dikkei chih i sawm kei. Ahihhang in i kammal leh pauzat khenkhat en le tuma a i nam dinmun taklang mahmah ding hi. En culture i chihchiang in nam lam(dance) khong genna lel a ngaisim i bat hangin misiamte’n bel culture huap za sak mahmah uhi. Nam/mihingte khosakna leh khosakdan teng huapkha sim mai abang hi. Nekzondan, sumsindan, nikten-puansilh, pau-le-ham, thu-le-la, ngeina bangkim a huam a, kum 50 pan kum 100 sung khong a khosakdan, chindan kip hong piangkhiate ahuam hi. Pau leng telkha hiven i chi di'a- pau in hunpaisa a i nam dinmun a taklat neukha gen ni.
Pau leh a zatdan in minam dinmun- khosak dan, nekzon dan leh bangkim taklang thei hi. Lawmte khat in i pau a "daileng", "singlem" chihte a sut chiang in zattheih nawnlou sakna a nei hi. Insung a ekin(toilet) a ek tha a dainawl va ki khikhe nawnlou i hihman "daileng" va chih lai-lai, ahihke'h fibre hiam sik hiam a bawl vankoihna bawm a i zat "singlem" chih lai lai pen dik sa theilou hi. Ke’n bel pau kheka literal tak a amin leh avan, a thugen kituak sak ding chi le pau khek ding tamlaw ding a, mun tuam tuam a omte i pau ki gamla baih law ding ka chi hi. I gennop zawk bel "Daileng" i chih in tuma a ekinn (toilet) chihte na neilou; daipam (dainawl a vokpi mai a kisuah khia a) ektha mai i hih hon hilh hi. Hiai in inn hoihtak, a sunga room leh facility feltak nei a na khosa i hi kei peuhmah chih le hon hilh. Huaiban ah i van neihsun leh i goute koihna ding a sing na lemkhawm thei i hih "singlem" kammal in hon hilh nawn hi.
Kimuakna. Tuni'n kholai a kituak, ahihke'h hun bangtan hiam nung i kimuh chiang in ki muakna ding neilou sim i bang. "Dam maw?", "Ann ne khin maw?", "Bangmeh na meh ua?" chih khong i ki hou masakna kampau ahi a, i zat zat chiang in "Dam maw" chih bang sawisel ding omlou leh kilawm tak hong suak hi. Tuma in khopi ah i teng keia, kho neu, kho tuam tuam kithuzakna mumal neilou a na khosa i hih man meltheih leh mundang a om tanaute a sih a dam uh ki thei lou a kimuh chiang a "Dam maw?" chih masak tuak mah hi ding hi. "An ne khin maw", "Bangmeh.." chihte bel kho khat a teng khawm a kithei, zing leh nitak a i kimuh chiang a ann nekkhit leh louh or bang meh ne ki dotna hih tuak (Ankhing-tuibuk kikholte i hi a; mehlim nea, hong khollou uh ahih leh hihlou theihna ding a meh ki dot bang le hi khamoh lou ding hi chi le uanglua ahi diam ah..).
Kisapna. Khokhat a teng, kitheituah vek leh min a kisam thei ngen a khosa i hihman ki zah(tung-etna) kammal ki nei khollou hih tuak hi. I neihsun tuh kum tam (upat zawk) a kizahna ahi ding. 'Sang a upa zawte- u, pa, nu, pu, pi- chi in a min u toh ki sam hi. Gtn. Pa Thang, Pu Lian, U Niang, Nu Chiin. I khosakdan leh khotang hinkhua ah vaihawmna ah hausate in uk ua; siampute in sahkhua leh damdawi (khithoih) lam sai ua, i vanzat ding hiam leh hei siksute in hon sek/bawl sak uhi. Amaute society a dinmun vou, amin uh tellou a i sap (igen) theih omsunte ahi ding uh e. Amin ua sap ngailou in "hausapa", "siampupa", "siksupa" khong a chih theih uhi. Hiaite'n tangpi a ding (mipi) nna asep man uh i piakdan "buhsun", "tangseuh" "saliang" etc. in sum ana nei (zang) lou i hih hon hilh nawn. Thanghou le Liandoute leh tangthu dang dang ah mihau, mineizoute hauhdan chiamtehna sial, dakbu etc khong ahih i muthei a, sum tuh na zang khollou mah i hihtuak. Sawm (ham)chihlouh siamsinna mun leng na nei khollou mah i hi dinga, siamsinna toh kisaia a sinsaktu genna ding kammal bang neilou hile kilawm hi. Mizoram ah Britishte hong lut nung a siamsinna hong kipan a sinsaktu genna in "sikulpu" ki zang hi. Manipur ah leng sikulpu kizanga, huaiban ah Meiteite a kawm in "awjapu" chih leng kizang hi. Burma ah bel "sia" , kawlpau a saya kawmin kizang nawn hi. Khotang thil a zahna latsakna kawma i kisapna kammal - "upa", "val upa" chihte kum tam mana zah piakna hihtuak hi.
Alehlam ah nampi, nam upate, a mihing leng tamin a kidaih ua, a society uh eia bang in a mawl kei. Khopi khong ah a teng ua, mihing tampi ki sukhawm ahihman un hindan, khosakna leh bangkim ah mawltak in a hing theikei uhi. Kiukna fel tak, nekzonna tuamtuam, sumsinna, kisuklimna tuam tuam nei leh mimal in mohpuakna tuam chiat nei ahihman un, a society uah dinmun tuam tuam om hi. Mimal khat-le-khat ki thei senglou in leh mina kisap seng hilou ahihmanin mimal kimuantuahna tawm nawn hi. Huaiziak in eite champion pih leh i suanpen - "tlawmngaihna" chih bang a lemlouhna tam ding ana hih tuak hi.
Huchibang dinmun ah mimal min a u, nu, pa, pi, pu ki sak a ki sap hitheilou a dinmun pansan a kisap dan na nei uh ahi ngei ding. English a "sir" vaipau a "saap", "malik" , kawlpau a “saya” a chihte utoh khong toh ki tuak ding eipau in omlou hi (ka theihlouh man ahih ke'h). Ei society, ei nam bel huchibang poimoh ding dinmun (mihing population tam, khopi a teng, life and relations complicated) a na om kha ngeilou a hih mana huchibang kammalte na neilou ki hi ding hi.
Tuni in bel khopi hinkhua i chiamta a, zosuante khopi chia gentheih hunkhop I neita. Huai dungzui in i nekzonna, sumsinna, khohei, khosak bangkim a namlian leh pichingte a bang a khosak ngai dinmun a i hong din pat chiang in adiak in Mizoram bang ah i pate pa hiam i nu lamte genna hita lou in i tungette sapna/genna ding in "Pu" hong ki zang a, mundang ah zong ki zang vek simta a chih theih. Lehlam a kilang nawn tuh i society ah anniam leh ansang ki deidanna(caste system or any social hyrarchy) ana om louh ahi.
Nam genna. "Eng hnam nge i nih?" "Bang nam na hi hiam?" chih dotna a ki dot chiang in a dongtu in adawnna ding in Bengali hiam, American hiam a lamen kei a Pawi, Tuikuk, Paite, Hmar, Ralte, Vaiphei etc. khong a lamen zaw hi. Huai tuh tuma hun a "nam" i na zatdan, i na kikhen dan langsaktu ahi. Tuni a nampi (lian) hih utna lungsim nei a, unification khong gen kawma nidang a "nam" i na chih kammal mah sen a huai "nam" in a huapkhakte lianpi (Zosuan teng) i hon suahsak dek chiang in hiai kammal (nam) i zangbuai nak hi.
Unification/ Reunification i gengen, muhtheih a political gam khat ah i kigawm theita kei zong, suangtu khat ki chichi i hihngal leh i veka tunkha khat kammal (a nam min hilou) zat ding ki nei leh kilawm.. Lah.. kinei lou bang mawk hi. Hiai lai tak ahi kigawm sawm a phia phia napi ma i sawn theihlouh nilouh. "Nam" tuam chiat kisakna nei a, ei a chiat ngai khawk leh a ki zui di khuk omlou i hihman. Huaiziakin nampi, nam halh ana hi ngei hile tuni in i kikhen sawmvei tazong in a beh, abawng leh a "nam " teng huap a i ki genkhawmna kammal khat na om ngei ding in a gin huai. Zomi/Mizo/Kuki/Chin i chihte zang a nampi bawlkhe ding i chih i lohching ahihleh sapte "nation" toh kibang nam kammal hong piang pan ding hi. Tua i kammal neihsa "nam" i chih pen ki khennate genna lel hi a, i vekpi a nam khat a tunkha genkhawmna ding kammal a neiloupi i na hi lim hi.
Pau toh kisai a i nam dinmun latsakna ding in gending, sui ding a tam ding. Himahleh asiamte hon pholh khiak ding in i koih ding. Amaute chou khe ding a neukha i gelh liam-liam lel ahi chih ana thei le uh. Lehlam ah bel thuksui leh tam genthei kei mahle tua mawltak a i gensate in nam halh, nam lian, nam pil ana hikhin khollou i hihdan taklang thou mailou ding maw????
No comments:
Post a Comment