BANG GELH DING?

Tuni office ah na a om kholkeia, forum lam lah tulai a hot vakkeia, banghiam khat hih leng hoih ding ahi chih ngaihtuahna ka neia. Bang hih ding a hiam chih ka theimai keia, lai ka gelh dek le lah bangmah idea a hong pawt si kei a.

Bangteng hileh computer a MS WORD hong dengdang in ka tu a, bang gelh ding hiam chih ka ngaihtuah leh gelh di ka thei kei. Himahleh gelh ka sawm thouthoua, bang lam in a hong pai diam ah. Laigelh i chih hi na maimailou ahihna a om hi. Laigelh siam a lai gelhgelhte hi thupi uh kasa. Nidanglai deuh ngial banga laipuan tunga pen khong toh gelh or typewriter a type ziahziah a laibu sah taktak gelhtheite mi thupi lua uh ahihdan khong ngaihtuahna ah a hong lut hi. Gelhkhelh hiam bawlthak ngai hiam om leh tulai computer khovel ah bel i ut dandan a va edit ziahziah mai theih hia, nidang in tuh thaisia a agelhthak uh ahiam, pek tampi type thak hiam ngai ding hi. Idea leh puanzak ding nei taktak leh gelh tum taktak, literature lama lunglut taktak louin ana mawlh gelh theihlouh ding hitah chih khong a ngaihtuah theih hi.

Akhenchiangin laigelh ding idea hong pawta, gel utluat i neih ton bang om sam hi. Huchibang hun ah ki gelh geihgeih thei khollou zel hi. Lehlam ah tuni dana hunlem oma, kisa lui a gelh i sawm chianga gelh ding ki thei hetlou zel. Kuate hiam nitaka chiamnuih (zahmoh lam le ahi di chu) gen a nuamsalua uh, a zingchianga sunann paw zena gamlak a va gen ding chih thupuk uh hiven. A zinga gamlak a va kuan ngei tak uh, khatin “SU” a chih pah leh aban a gen ding thei om nawnlou chihte bang a phawk huai zozen aka.

Rangkachak toh ka houlim khakna uah amah laigelh kisit, gelh ngam khollou hidanin a ki gen ngei hi. Huchibang omthei mah hi. Nungak/tangval laithon ding deihtawka zana gelh, a zing khovak chianga a simthak leh khak ngam nawnlou chihdante om thei mah hi. Lai ka gelh ngamlouh hun a tam hi. Aziak tuh laphuakte mah bangin lai i gelh chiangin i hihna kisel sawmsawm lele a simte’n i hihna leh i dinmun tampi ana manthei ua, kipuangpuang khat i suak hi. Hon theiloute laka i hai lam tak lang saksak peuh i hih khak ding lauhhuai a batton om tham hi. Himahleh huai chivek zel le kuan gelh ding chih om zel hi. Asiampente le a gelh tuung ua zaw kuaman a laigelh uh theilou leh bangmah a ngailou khong hithou ding ahi. Hon gelhgelh chiang ua gelhdan style khong hon neia, mi tuidan leh mi simnop zawng khong hon gelhkhe thei ahi thou ding uh.

Huchi hileh bang gelhta ding? I vei leh puaknatte gelhkhiak ding i hau deuh ding in a ginhuai. Subject hiam i tuina lam leh i theihtam deuhna lam khong ah gelh ding a tam deuh maithei. Agelhsiamte’n lah gelhmoh a neikei uh abang zel. Niteng hinkhua a i muh, i tuah, houchik leh bangmahlou a i ngaihte bang hon gelh chiang un a simnuam leh lungluthuai pente hon suah thei zel uhi. Huchi ahihleh tuh gelhmoh omlou, bang gelh ding chia buai ngai selou, i gelhhun a i lungsim puak leh i kimkianga i muhte apan gelh suk mai theih a bang hi.

Huchi’n gelhta le, laigelh i chih mang pahpah loua, tunung chianga i kisik leh i deihlouh ding pi bang i va gelh kha diam chih hong om thepthup zel. Sepaih pang khatin, a sepaih panna lama tangval thathak laitaka a ngaihnat mahmah numei zahmoh lim abaan ah tattoo in a gelhsak a chi ua. Anunglam a zi-le-ta hon nei, hong pension chianga khotang leh saptuam lam banga hong kizang mahmahta, a baan a taatoo pen deihhuai nawn hetlou suak ahihman a pangpalek lem lianpi dana tattoo bawlte va bawlsak a chih bang deuh un.

Lehlam a lah hun paisa a i laigelh khong i va sim thak leh kua’n bangmah in ngai kei lele hichibang ana gelh thei ka hi maw chih di bang om thei zel dan ahi. A gelhin gelh suk himhim phot le, i tattoo i deihlouhni a om lele pangpalek lema bawlsak dan om nalou di hia ? chi’n ZOL userte laigelh dingin kon chou ve.

9.5.2008