HAIHOT

Nupi nih houlim in khualgama mikhat sihthu a gen uhi. Misi pen meia kanglum hihtuak. Kangse lua amel muhding omlou ahih tuaka, azi leh inkuanpihte nangawn a hankuang honga a mel a et ding uh a phalkei uh chi uhi. Khatpen in huchia ahih uh hoihsa mahmah ka hi, ensak hile uh a zi’ mitkha ah a pasal a mel-le-puam le kitheilou a muh nanungna pen tamden dia a lungsim nuam ngei lou ding ahi a chi hi.

Mihingte thil mangngilh thei dinga siamtu in hon bawl mah hih tuak hi. Hinapi in mi tamtakte thil mangngilh hatlua, haihot lua kisa in i ki sit sek abang hi. Banghiam poimoh i mangngilh khak zenzen chiang bangin i heh mahmah ton a om theia, midangte bangin le a hon hehsan luat ton uh a om thei hi.

Himahleh, dena nupi houlimte’ gen bangin thil khenkhat mangngilh theih louh leh lungsima hing gige pawl om thepthup zel abang. Mangngilh baihlam deuh leh mangngilh haksa deuh pawl om mah a diam? Ahihkeileh i lungsim putdan, i ngaih poimoh dan a zila mangngilh leh mangngilh louh a diam? Ahihkeileh i lungsim, i khuak i chiil dan leh i zatdan a zila thil khenkhat i mangngilh louha i kep theih deuh om a diam?

Lehlam en nawn le. Ei Zomite a tangpi in laizial (zatep), tuibuk, khaini khong uangbawl i hihna ah hiaite pawlin i lungsim hon su mawk baih deuh a diam? Ateploute le neuchik apan a kimkiang ua midangte’n buk, laizial, zabel etc tep khu luahluah ahihna uah nawkkha thou ahi diam? Ahihkei leh i thil nek- sa, anteh/mehteh khenkhat ziak ahi thei diam?

Diam chih lam ngen a va hihsuk nilouh ding lah hikei ven chin.. Bangteng hileh thil i mangngilh theia, mangngilh thei dinga siamtu in hon bawl leng ahih tuak. Huaidan in pom phot peuhmah in thil i mangngilh khak chiangin le ki mohsa, ki ngaise law pahpah kei le. “Kou naute zaw a lungsim (memory) uh hatloua, ama in simkhol le uh exam chianga mangngilh ma’n di ua, huaiziaka exam lai mah in hahsim le uh chi ka hi” chi a nupi mawl in lungkim taka mangngilh theihna om ahih a pom bangin pom peuhmah le.

Huchi ahihleh chu, a diakin siamsinte bangin thil ki mangngilh thei hiven chia, a sima simtam sawm zawk ding hi ding hi. Laisiangthou khong bang le mihing haihot lua i hihmanin hahsim deuh mai ngai leh kilawm hi. Khovel a theihna leh pilna mah poimoh den ahih chianga huaite zat tangzang ding neih gige na dingin a sim a sim tam zoh ngai ding hi. Mangngilh ding toh mangngilh den louh ding toh!