DIMAPUR HI

Nagaland a om Dimapur hi khopi khang hat mahmahte laka khat ahi ngei ding. Naga nam teng omkhawmna, Nagaland a dia a commercial capital uh ahi leng a chih theih ding. Sumdawng liante a tam zaw vaite ahi ding in a ginhuai. India van hi-in gamdang van hileh N.E. a dingin a kim na pawl ahi ding. Van leitu a dingin leng a kiman bok. Aizawl khonga kicheina van hoih leh mantam kizuak uh “Bangkok a mi” chih tamtak Dimapur apan a kila ahi a kichi ( adik leh diklouh zaw thei khang). Sumdawnna lama etin N.E. India a Guwahati zoma khopi poimoh ahi thei mai diam?

Lenna leh rail luta, Dhanseri lui gei phaizanga om ahihmanin thil baihlam hi. Phaizang meh hi’n local meh hileh baihlam taka Dimapur a puaklut theih ahihna ah kimin kiman hi. N.E. a khopi dang Agartala, Silchar, Shillong, Imphal, Kohima, Aizawl, Itanagar, Tinsukia, Dibrugarh chihte amau poimohna omchiat thou mahleh a omna uh kilkawm deuh a batna oma, rail bang lut vek khollou ahihna ah sumdawnna lam ah Dimapur sanga fuhlou zaw dingin ginhuai hi.

Nagaland sunga om, Nagate khua ahihna ah Naga tribe teng kisukkhawmna khopi ahi a, alou theilouin a cospmopolitan sak deuh uh a ngaihna om hi. Lehlamah bel mi dukdaklou, damdawi/khamtheih zongsang, a khua khong ua omtheiloute a dinga omna lemchang asuaka, huaite’n khuttawi bang nei-in gamnuaimite min peuh zangin sum nget a thangsak uh chih bel om hi. Huaibanah mun tuamtuam akipan vaite paikhawm a dukdaklou pawl om banah survive na dinga hihmoh neilou bang leng a om tham ding hi. Ahihhangin vai businessmente baihlam taka a survive zohna uh ahi thoua, ei Zosuan business lama lunglutte’n le i va naih phaka om ahihna ah va boh in business va pan le survive kia hilou a a hih hoih thou uh a ginhuai. Tulaia Mizoram handloom product (puanteen chihna tuk) bang a zuakna market poimoh khat Dimapur ahi a chi uh. I unau, i Zo suanpih, Thadou lamte Dimapur khokim, Ghaspani khong a teng pawl leng a om thou uh.

Vaigam/Guwahati khonga sum dawng ding chile, tax leh bangbang hiam piak ngai dinga, Dimapur ah bel ST hihna ah piak ngai khollou ding hi. A customer ding Nagaland state pumpi leh a kiang naia Assam leh Manipur om ahihmanin Guwahati chihlouh N.E. khopi dangte sangin advantage om zaw leh kilawm hi.

A va boh leh ava lut i om khollouh mana neel lou i hihleh i chi a hiven, sum nei deuh khatin business va pan leh Lamka leh Imphal khong sangin houh bang a chi de aw.. chihbang a om.