TPAs

General insurance nuaia insurance chi tampi laka khat, damlouhna insurance toh kisai kha, Third Party Administrators omdan neukha in i taklang ding. Misiamte sutdanin gam khangtoute’ population 75% in Health Insurance a zat lai un India gam 1% kia ahi a chi uh. Zosuante lakah Health Insurance a zang ki omkei leh kilawm phial hi.

Health Insurance. Ut leh utlouh thu hiloua damlouhna i tuah chiangin damdawiin a lut a ngaih ton om hi. Damdawiin a ki etkolna man tama, hospital hoih leh nursing home ngial ah sen tam theilua ahihmanin inkal kiatwi zena pan ngai sek hi. Huchibang hun ah Health Insurance zat phattuam theih hi.

A tangpi a genin i gama insurance companyte’n a neih uh Health Insurance Policyte’n damlouhna tuamtuam huamin, insurance lak laia damlouhna neihsate kum khat/nih bang huamsak lou hi. Insurance lak nung kha khat sunga damlouhnate leng huamlou hi. Insurance premium piak ding a tam leh tawm pen policy latu kum, cover a deihtam leh tawm khong ah kinga ding hi. Premium kum khat a ding kisung pen kum khat sung damlouhna omkei leh muhkik ding omlou hi. Damlou etkolna sum sen medical insurance in a huamkhak hospital a ki admit ngaite ahi tangpi hi. Medical Insurance in a cover khak leh cover louh toh kisai a thei chian nuamte’n mahni lemchan danin general insurance company khat peuhpeuh ah kan chet theih ding hi.

TPA. I gennop ah lut pahta le. Sorkalin a khua-le-tuite a dinga damlou etkolna awlsam zaw ding, insurance a neih u leh hospitala sum piak ngailou a a ki etkol theihna ding geelna a a bawlkhiak poimoh tak khat tuh Third Party Administrators ahi a chih theih ding. TPA i chihte medical background nei company, sorkalin sum a bikhiah zah neia Companies Act 1956 dungzuia ki register ahi uhi. India gam ah TPA 25 bang om hi. Mawl taka genin TPAte insurance company leh hospital kikal a kiloh ahi uh a chih theih ding. Health insurance nei mi khatin damlouhna tuakin hospital lut ngai dinmun ah omta leh, TPAte hilh ding ua, TPAte’n hospital a lutna ding uh kawkmuh ding uhi. Huai hospital a bill tengteng TPA in pe dinga, a damlou a ding in bill piak buai ngaihlou in Cashless Service hi ding hi. TPA in hospital bill a piakte uh insurance company in a din kik ding.

TPA Nasep Dan.

1. Insurance companyte’n amau kizop pih TPA kiang ah medical insurance policy a lak teng uh data pia uhi.

2. Huai dungzuiin TPAten policy neite a ding Identity Card na bawlsak uhi.

3. Damlouhna/claim a om leh policy latu in TPA theisak ding hi. TPA in 24 hours toll free line nei uhi.

4. TPA in damlou koi hospital a ki admit ding chih na kawkmuh ding hi. TPAte’n Hospital kizoppih nei ua, insurance policy nei damloute hospital a lut chiangun TPA in a piak Identity Card zang in Hospital in na admit ding hi. Damloute’n TPA kawkmuh hospital hilou, hospital dang a deih zawk u leh amau thu ahi. Himahleh a bill a aki piak phot uh ngai ding.

5. TPA in Hospital bill amau piak ding ahihna lai in Hospital theisak ding ua, a treatment khong enzuiin ding hi.

6. Damlou discharge ahih chiangin Hospitalin TPA kiang ah bill thon dinga TPA in na pe ding hi.

7. Huai khit chiangin TPA in a bill insurance company a submit dinga, insurance company in process dinga TPA reimburse nawn ding hi.

Tuni in i tenna gam ah health insurance facility bangmah om khollou a zang phalou himah lehang hun leh i khovel kikhekhek sam ahihmanin medical insurance leh TPA khong i zat phattuam khak hun hong tungpah sam dingin i lamen.