MIHINGTE LEITUNGA kho tuam, mun tuam, gam tuam tuama khena teng leh khosa himahle mun tuamtuam a omte ki poimohtuahna i nei hi. Laithon, email, telephone khonga ki thuzak kia hunlou a taksa ngeia kimuh a ngaih ton a om hi. Huaiziakin nekzonna toh kisai, inkuan vai, lawm-le-gual vai, politics vai, sabiak vai, damlouhna leh adangdang toh kisai in khualzin ngai sek hi.
Khual i zin chiangin i tenna inn leh i inkuan, i tenpihte taihsan a ngaih gen ngailou hi. Khenkhat in inkuan taisan a khualzin ngeinaseh pah thei mahleh khenkhat huchilou hi. Inn taihsan haksa sakna oma, a diakin numeite, nupite bangin inn leh a tate uh a taihsan a ngaih chiangin haksa sa diakin awlmoh mahmah uhi. Khangnou lamte in lah a inkuante uh sangin kho sung, veng sunga a lawm le gual uh khelah in ngai zaw thei uhi. Hiaite ban ah khualzinna lampi ah - motor, rail leh lenna a bang tuak ding, damtaka tupna tung ding maw, zinna mun a bang chi ding, dam taka in tungkik ding maw chih khong leh a kikaihmatpih tampi a ngaihtuahte a dingin ngaihtuah ding om hi.
Khualzin i chih experience hoih leh nuam taka hi a, thil tuah khak ngeilouh tuahna, mun le gam muh ngeilouh muhna, theih ngeilouh mithak toh kituak, kithuah a lawm thak muh theihna ahi nawn. I tunna hotel hiam, mi inn hiam ah leng inn a i chin ngeilouh, inn a i zat ngeilouh thilte chin a zat khakna lemchang ahi. Ann bangle lamkala hotel gina khollou taka nek a ngaih ton a om lai-in, khopi khong ah hotel changkang taktak a nek khakna hun bang om thei hi. Khenkhat in khualzin hun pen a zat phattuam siam mahmah lai un a zang phatuam siam hetlou le ki om hi.
A zang phatuam siamte’n khualzin sunga hunawl a neihte uh laigelh, laisimna ahihkei leh laibu hoih zonna khongin zang phatuam uhi. Thil ngaihven deuhte’n a zinna khua ua mun/thil poimohte a va pai a va muh, va etchianna in zang uhi. A felte’n a zinna mun ua om u-le-nau, lawm-le-gual, meltheihte zonkhiakna leh vehna in zang kawm uhi. Kikhual siamdeuhte’n lah thil poimoh inlama ki muloute zonna leh leina dingin zang phatuam uhi. Sumhaute’n bel bazarna a zangin van lei ekek hiam nuamtalna hiam khongin zang uhi.
Khenkhat nawn lah khualzin chiangin vasa khahsuah banga thoveng in nuamsak thoh mai uhi. Huchibang dinmun ah principle nei kholloute a dingin thilthak va chin, lawmthak va polh a inlamte theihlouh a utut a gamtat theihna hun ki hong hi. Nek-le-dawn bang ah kidektheilou a dingin a limlim ne a dawna uangtaka omtheih hun ahi. Nek-le-dawn khit chianga taksa utna hih buchinna lemchang a zang bang omlai hi. Hiai dinmun genchiangna dingin Mizoram ah chiamnuih in Vairengte pelh ngeingei le chu a dawn theilou omlou chih khong gen in a om sek hi.
Nang lah, khual na zin chiangin bang na chi a? ?
No comments:
Post a Comment