Mumbai Suburban Train a experience nih sut ni ei le:
Experience No.1. Mumbai tung phet, 1989 December khabul in lawmpa (Angami Naga) toh map en zen in Church Gate a hoh sawm in k’ong ki thawi khia uhi. Pai ding dan pen kholaka mi dong tawm zel in Andheri Local Station a ticket la in Mumbai Suburban Train ka hon ngakta uhi. Station khat a tomchik a khawl sek hiven; mi tuang dim phitphet train pen a hong khawl chia’n a kumdingte huihpi mut bang in hong ki bungkhe zua mai uhi. A lut dingte’ ngakna kongkhak gei bang ahih kei leh lut manlouh ding bang hial hi. High School kai laia exam dia Imphal ka va hoh ua, mi tam salua lawmte khat in “hiai teng in zing leh nitak a ann ne ding uh hia maw.."
a chih bang phawk huai zozen. Mi tam mahleh Zo leh Naga tangval bel lut lah ngal lou in a sung ah ticket tawi teltal zen in ka ding uhi. A sung ah tutna ngahte lah muang kisa a ihmut u toh, a laibu sim toh, laithai kineih toh; a kua khutdoh hi a akua pick-pocket ahia chih lah theih khen hilou, sum omlai hiam chih chetna ding in sakhau/ip bang mai zauh zel in ka ding uhi. Lamet bang in kuama’n ticket hong check kei ua, dakkal khat phial ka tuan nung un Church Gate ka tungta uhi.
Church Gate kiim laka vak zek in cinema ka en uhi. Nitaklam in kikna ding Church Gate Station a ticket lak sawm apang lam ah ka lutta uhi. Ticket lakna ka va naih chiang un train a pan hong kuma kinoh tak a pai vengvungte paina platform mah tawn ka hihman u’n Railway Policete’n ticket honna ngenta uhi. Lak sawm pan, etsak ding nei nailou ka hih dan uh gen in hon theihsiamna uh ka ngen uhi. Mithak thei deuh a hi uhiam, ticket neilou a platform a pai theihna nei lou ka hihdan uh gen in sum hon liau sak sawm tinten uhi. Bangteng gen mahle ung ut tuanlou in Room khat ah hon piita uhi. Huai room sung ah leng ka ki nawk lailai ua, amau bel mi khat a Rs64/- (hiam ka chiang nawn kei) hon liausak sawm a lamdang ahi ua, a pocket ua lut ding hilou, a receipt hoihtak mah hon peding ahih uh pi gen zaw uhi. Huchi ahihleh chi in ke’n bel awm kasa sim maia, ki hihkhial deuh hiding chih kisuanlahna toh, pawlpa ka melh chiang in pawlpa ut dek suailou mawk hi. Heh kisa in hong om lanlan zozen! Mi lah hong pung deuhdeuh, hong en kheukhou uh ahihman ke’n bel nuam kasa nawn kei hi. Pangta vanglak chi a hi ding ua, na piak ut kei uleh chi in handcuff peuh hon lak uhi. Gei a mi hong ente ka melh leh pe mai un hon chi uhi. Dan bawhsia hi a ki thei ka hih man in leh thumu kisa in ka sawkkhe mai a, ka peta hi. Pawlpa’n bel hon awi hetlou in dawilawk bang hon hisak hi.
Huchi in ka hong pawt ua, a pam zek a ticket lakna que a va ding in ticket la in a paitou lam local khat ah ka hong ki hen tou geet uhi. Train sung ah hiai thu kuamah hilh lou ding in thukhun ka bawlta uhi.
Experience Number 2.
Kal nih hiam ka om nung un ka va pawt geet ua, Wilson College khong a North East Student khenkhat ka va zong khia uhi. Kiklam in Grant Road Station ( hi in ka thei) a lut in ticket lak ka sawm nawnta uhi. Tutung bel ka lutna uh lah dik ahihman kimatna ding thu om lou chi in lung amuang heuhau hi. Ticket la zou, minute teng phial a train hong pai zungzungte mihing a dimlou himhim omlou sim hi. Ka na ngak ua, khat hong khawl hiven, ka ngakna mai tak ua compartment pen dim hetlou in awngthawl mahmah henhan mawk hi.
Eheu! Hia’h awng vele” chi in ka tawm lut ngal ua, tutna bang a neem thiapthiapte na hi zomah! Station khat ka phak chiang un train hong khawl a, a lut leh a pawt bangzah hiam om in, hong lutte laka puan ngou silhte’n ticket abanban in hon checkta uhi. A masa ni-a a checklouh pen uh tutung a hong checkta uh, enlah ticket ki nei ahih chia’n lunghihmohna ka nei kei uhi. A check uh i na et leh a khen in a sakhau ua pan card- a limlak khong uh tuanna (season ticket) - hon dawkkhia ua, a khen in ticket hon dokkhia ua, kuamah dohkhiak kou neih toh kibang omlou mawk hi. Ki melh guk hong ngai nawn geetta! Kou hon phak tak un ki nei sam ahih chia’h chi in ka ticket uh dokkhia a ka lak uleh hon en vangvang in:
"Do you want to get down or continue?” hon chi ua.
A diklou om hi a ka theih man un kou le: “We want to get down” ka chi uhi.
Huchi in mau toh ka kum khe hanhan mai uhi. General ticket la a First Class a na tuang na ki hi zenhouh! Hon kumsak uh hiven, ka lutna ding dik tak ua hon lutsak mai ding uh ka sak u leh.. Koi lak ah! Receipt hon gelh tageet ve un chin. Mikhat in Rs24/- (hiam) piak ding ana hi nawnta. Stand khat tuanman dinga tam saksim in om mahleh, tutung bel phunlou-paulou in ka pe mai uhi. Mumbai local i ngak chia, general, numeite leh first class a ngakna ding a tuam chiat om ahihlam zilkhia tuh ka hi peuhmah ua, a zilman tam chih di adiam ah. Punna bel om veve chihmai ngai hi.
Mahalaxmi Station hi in ka thei. Ka sum ka ki piakna uh. Huai apan in mi tam leh lutna pen compartment, a ticket ka lakna uh, kou a ding diktak a lut in Andheri lam manoh in khoul kai niaunuau in ka tuang tou nawn uhi. Kuamah kiang a genlouh ding chih thukhun ka bawl nawn ua. Thukhun lui leh a thak va chih di lah hi ke’n chin. Kuamah chih bel, huai lai, Mumbai a ka lawm dangte uh ahi deuh a, amau lak a gen le hai honsa law ding uh chih venna dan a ka bawl uh ahi. Tuni chiang in bel free tak a gen theih in ka ngai a, ka hon sut hi. Lawmpa’n a im lai diam ah, inn a tun in a inkuanpihte kiang ah a gen thou diam ah. Ke’n bel ka gen mai hi
http://zozam.sphosting.com/train.html
No comments:
Post a Comment