THIAM TOH

THIAM CHIH hi min laktom ahi. Gentehna in Thanglianpau chih bang Thapau chia a toma sapna ahia, huai hih tom zaw lai le Thap hiam Thau hiam hi ding hi. Thiam hi chiamnuih siam leh mi polhnuam ahi a, thil bangkim a muh peuh, a zak peuhmah nuihzathuai tak a hon genkhe mai thei mihing ahi hi. A chiamnuihte mi zakdah ding leh mi nasak velvul ding a om keia, amah live a i muh, i zak chiangin nuihzak huai mahmah hi. Zanlamin Sumpi Chiamnuih CD koitak hiam ah ka enkha zuala, huai ah leng Thiam influence a omkha zek ding in ka thei hi. Tuni in a ngaihhuai mahmaha, amah phawkna kawmin ka khualzinna uh, Singngat a zan khat ka giah thu uh kon gen ding.

Aphat leh a ni ka thei nawn kei. 1979 hiam April kha lak ahih ka gingta. Songtal apan zingkal annek khitin Lamka lam zuanin khe in ka pai uhi. Thiam pen kei sanga naupang zaw himahleh kei ka pai khak ngeilouhna ahihmanin kei sangin lampi aman a thei zaw hi. Songtal Vumpi apan kumsukin Thuangtam khong tawnin lamsuk-lamtou ka paipai chiang un nitaklam anhuanhun khongin Singngat khotaw tou ka tung uhi. Huaiah ka meltheih ngei loukuan hiam khat ka mukha ua, ka kiton tou uhi. Aman Singngat a pai ngeilou leh tunna ding le theilou ding chin amau in a tung ding in hon zawn hi. Thumang lua ka di uam ah Songtala Thiam’ pate’n Singngat a tunna ding theilou ding chia hon kawkmuh uh om hiven, huaite inn dong zaw in ka meltheihpa ka zui kei uhi.

Singngat khua ka tun chiangun khua a muita a, ka tunnate un an ana ne khinta uhi. Kou a ding ann hon huan thak ua, mehding singthupi boil, chi leh malta pum toh hon serve uhi. Ka hon nek chiangun ka ngaihdan uh hichiah lou a diam ah, bangmah gen bel omlou napi in ka ki nuihsan pah uhi. Nituma khe a lampai gim leh gilkial mahmah napi ka bun hetkei ua, singthupi boil luthoih nuam hetlou hileh kilawmin gilvah kiihkeih in ka ne zoukei sim uhi. Lampi a meltheih ka tuahpa bang uh phawksim pahin a om hi. Nidanga kou khua a hong zin zel, kouin a hong tung gige khat ahi hi.

Bangteng hileh nitak an kine khinta in zan ah hih ding om khollou hi. Ka tunnate uh nauvual thou uh kasak leh, huailai a naute uh koia om gai a di uam ah kuamah le a om lam uh ka thei kei hi. Koia om uh ahiam chih ka dotlam uh leng ka thei bok kei. Inteeknu, inteekpa leh naupang neu khat le nih khong om lel uh hi in ka thei. Nitakin inteeknu’n ka lupna ding uh sual tung ah hon bawla, a mau le a lumhak kei ua, kou le ka lumpah uhi. Huchi a ka hong lup chiang un Thiam pen amah banglou takin chiamnuih bawl lam hilou in amah pen hong nui khuhkhuh pah mawk hi.

Inneite’ kisuanlah ding khong ngaihtuah kawmin keile a lian zaw leh a pichingzaw ki chihbawlin Thiam ka tai a, maigum deuh mai khong in ka en gamgam hi. Himahleh nuih phuhphuh kawmin huai amau nuihsan lah hilou hanga hon chi in a nuih ngeiin nui hi. Nuih chih ah nuikhe lualua hilou in, biakin sunga nuih khak chianga kideek sawm mah le nuihza deuhdeuh lah va nuihkhiak ngam hilou a nuih konkon dan ahi pen ding.

Ka hong lup chiang un tuangtunga ka awngphah uh pan dikdek, tak gimgem, a ging bang omthei dek zozen ahi a, kon vel chiangun saiip ahia, a tunga puan pan (bedsheet) a kituam ahi a, a silh dingin kantha lui sim khat a hon provide nawn ua. Thiam kha huai teng khong – singthupi boil apan lupna- nuihza dan ahi a. Ken le ka naak mat lua a, himahleh lehlam pindan a inneite lumte’n ka thawm uh a zak ding uh kilawm salou, a neih dandan ua hon zintun ahihman ua kisuanglah ding uh chih khong teng ka gelchianga i pichingsak a Thiam tai leh khou nilouh ka hi hi.

Gintak sangin Singngat khua a lum vial a, thoukang bang a tam sim mawk hi. Thousileen lah aneu banah a lui in a vang a tam nalai hi. Thiam nui lah ka tai ka khouh chiangin a uang deuhdeuh a, khawlsawm louin a nui nasa kawnkawn semsema. Kei lah ka heh deuhdeuh hi. Kou lumbaih ka hi ua bang ahia, Singngat bazaar, bus stand omna lak hiven, in pawlam lamlian ah mi husa vengvung lai uhi. Huchi a lawmpa hong nuihnuih nilouh chiangin anuihna a taksa taangin kei hon sukha nilouh ahihmanin a tawpin ke’n ka lawmpa hehsan zou nawnluin ka nuih hong za simta hi.

Huchi in kidekzou nawnlou ka hi pen ding uh, a kei inteekte kisuanlah ding khuala ka lawmpa tai a heh lawpa toh ka nih un haihuaitakin nuih chihtakin ka hong nuizaakta mai uhi. Polam ah tangvalte’n lah guitar tumin la asa ziahziah ua, inteekte lah ihmu uh ahia bang ahia a dai khipkhep ua, kou gel zan khanglaiin teirawl biangthak bang main ka hai nuih ekta mai uhi. Zan dak 12 bang hon pelh khit nungin ka nuih uh ka tawp thei khong ua, ka omdan uh ka kisiamtan het kei uhi. A zingkal chianga inteekte muh ding bang ka huphulh mahmah ua, hichi in plan ka hon bawlta uhi. Zingkal chianga thohbaih ding, inneite thohma ngeia thoh ding, First Trip a tuanga a thohma ua Lamka lam a paisan mai ding chi in thupukna ka hon bawlta uhi.

Zingkal ka thou baih ngei ua, ka pawtkhe pah ua, himah leh First Trip ana om kei chitchiat a, chihna ding theilou in ka tunna uah ka kik nawn thou uhi. Huchi thouthou kik nawnlou a Lamka pai ding motor om masapen ngak mai awmtak.. ?