TULAI KHOVEL AH

Leitung mihingte’n amau omkhakna khovel (dinmun) chiat ah nopna leh haksatna a nei ding uh. Huaite khang a tuam dungzui-in a tuam ding. Nidanglai in (ei pipute bang) concrete a sak building chih khong neilou ahihman un huihpi, vuahpi, gialpi laka pana bitna ding a poimoh lian uh khat ahi. Nekding leh akul bangkim mahni kisepsuah ngai ahihna ah loukuan, gamvak gige ngaia vuahpi, gialpi, huihpi chihte a bitna poimoh mahmah hi. Sa leh gala ki en leh a mat-a kidem ahihna uah leng lungmuanlouhna a nei gige uh. Nitak annek baih bang a ut uh. Annekkhit leh nna khat kizou, galtai na ding hiam om lele ann nesa, gilkial a bah pahlou deuh ding chih khong a ngaihdan uh ahi.

Tulai khovel toh i pupate hun a kibang kei. Technology in hon phata a, nitengin leitung mun tenga thiltung leh thil omte media tuamtuam apan in i mu in i za gige theita. Lamka Post bang niteng phialin India genlouh gamdang a simtheih hita hi. Hiaite in nasa takin i hinkhua hon sukha in i mihinna (personality) tok kha hi. Information chiteng ki access theia, huai teng a veka theihsen lah hilou hi. Information leh theihna/pilna nei tawmte khovela a fit lou suak zel ahihna ah hiai zah a hunta chih le omthei lou in a peihte a dinga ki update gige ding a dimin om hi. Mikhatin thil teng theih sen lah ahi kei. Sepna nei khatin a nasepna toh kisai theihtuak leh theih ding tam mahmaha, siamsin naupang khatin a siamsinna toh kisai information/data a theih ding a poimoh a access theih tam lua hi.

Khopi a tengte bang kholak a vak chiangun train/bus/taxi laplouh ding hiam ahihkei leh tutna tanlouh ding laua a kinoh hehu uh ngai den hi. Insung ah TV enleng channel a 100 a sim om, koipen en ding? Khat en le a dang ah bang a suak de aw chihna lungsim om zel. Inkuan khatin TV khat neileh inteekpa in news hiam reality show channel a etnop lai in inteeknu in Kasauti hiam ennuam thei hi. Naupangte in bang IDOL hiam ennuam leh a dang khatin football, a neulamte in Cartoon Network hiam, POGO hiam ennuam zel. A teeklamin lah Discovery, National Geographic ahihkei leh Animal Planet chihbang ennuam tageet zel. TV minkima va lei ding a lah neihin daihlou ban ah i in- i lou a le a koihna ding lemlou zel. I economy in zoulou ahipen. Huai dinmun ah inkuan sung management bang leng siam mahmah ngai hong suakta hi. Kitai hiam a neute deihdan vaua suppressed theih mawk hi nawnlou ahihman in.

Computer chileng lah a khoih nuam chiat hithei zelta. Naupangin games a kimawl ut laia a liante’n laigelh ut or internet khong khoih ut, la ngai ut pawl, movie enut pawl bang omthei nalai. Mun khenkhat bang ah pawlpi khenkhatin banghiam gelhna/bawlna a va zatsak nuam chihbang omthei. Computer bang kituh theih dinmun hong suak hi. Nikum lamin doctor lun mahmah khatin atate minkim ding computer a leisak ka mukha a, zozen kasa sim hi. Tu in tuh huchi khollou di eive ka chi dek simta hi. A computer lah ani ani a a hatzaw leh a hoihzaw suak den. Software khenkhat computer thak deuhte a hong compatible nawnlou chih khong.. Va ngaihsak deuhin, sum nei lai-in lei di etin en le leidi bei ngeilou ding bang hi. Gen ding a tam.. I gen seng kei ding.

Khotang lamah lah a neinei, a hauhau in thu nei leh a gente uh a dik suak. Community tengin a hinsuahna ding ua galvan tawi pawl bang neih ngai hileh kilawm. Khopi a omte lah inluahman save na ding khonga “living together” chih hita. Sahkhua chih khong le record a om lel ding hinpih ngai nawnlou chih ngaihdan bang hatzaw hileh kilawm. Hichibang khongte omna a hinkhua zat chih ina chin ngei hilou, i tulai khovela i kimkianga pana i laklut thak, hinkho thak a ki adjust ngai hong hinawn pah hi. I moral i chi diam i principle i chi diama, mihing ngeina leh sahkhua gimnan i phaktawk, neuchika DIK leh DIKLOU khenna boundary i neihte bangle keklet hiam khetchip hiam ngai pawl bang om leh kilawm tageet. Dai hoihtaka ana kai kholloute a dinga khetchip haksa khollou pen a dai concrete deuha na kaite a dinga khetchip haksa lua/theihlouh chihbang omthei. Huchibang a dai hoih leh kip neite bang tulaimi lou, thring leh HAI khong suak thepthup. I pupate’n le zaw ana tuak sam uh hi’n teh, “Thudik gen leh sazang kap a val” chihbang na omsak ahihna uah.

I gennop zawk ahihleh tulel a khang huna thil kikhek nasa diak, kimkiangin hon nawk diak, experience neihsa omloua phut touh ngai dinmun a mitampi ki om dinga, a ki bulhlem siamloua buai tampi ki om kha thei ding chih lam ahi. Neulai khonga kimawlna ding toys le neilou, pate tem selguk khong lakhia a gamlaka thang kam, khau va sat, singkung peuh phuk a hun zang bei ahihkeileh bawng hiam sial hiam khaua khiha thawh maite tuni a pichinga khopi a om, information age a nasem, technology chiteng in nawkkha thut ahihna ah thil muh leh theih, deih leh deihlouh, duh-le-ngaih, khovel leh hinkhua (lifestyle) bangkim hong kikhek, hong punga i economy chawm zohlouhtan I lunggulhpha hi. Laihlut theih nana a lailutte lah corrupt chih min put ngai zel. Huchi dinmun a i khovel toh ki adjust siamkei leng koilai hiama lungam gawpa om theih khak ding bang hi. 

I tulai khovel a bangchi ki adjust a bangchi ki bulhlem ding ahiam chih lam khong a gelhtheite’n hon gelh le uh i chihna ahi a. Experience nei taktak hiai adjustment a buai nawnlou bang leng a om tham dinga, huaite’n a experience ua pan khong hon gelh le uh chih i deihna ahi.