Zan zekin zolawkta toh Durtlang hoh ding in ka office apan ka kuankhia ua, lampi a ka houlimna uah “Zomite lapawl zil khawmlou a lapawl lepsawm” i hihdan a agelh net a a khahkhiak thu hon genkha hi. Zolawkta hi mifel ahihban ah thu-le-la bun leh gil mahmah khat ahia, a gen ka ngaihtuah leh awm kasa lua hi. Huaizan hiamin lapawl zil khawm loupi a sak sawm chih ka ngaihtuah leh thil tampi a hong lang zungzung hi. Himahleh gelh khe khollou ka hihmanin tu in huaite hong suak nawn khollou hi. Himahleh tuni in neuchik bek gelh hoih lou ding hiam chi in kon thai zek hi.
Shillonga college ka kailai un pasal kia kaina St. Edmund’s College, St. Anthony’s College leh numei ngen kaina Lady Keane College leh St. Mary’s College a Mizo studentte picnic uhi. Mizo heutute in Shillonga college kai nungak leh tangvalte namdangte kia toh kimu in kithuah le uh a kiten loh bang om ding, Mizo nungak leh tangvalte kumkhat a khatvei bek kimukhawmin picnic khawm le uh a kitheiloute kimeltheihna piang dinga, kinel leh kingai thei ding ua, a kiten loh bang omdinga bangtan hiama namdang laka a manthat ding uh veng kha ding chih gelna a hichibang picnic kum tenga a sawm sek uh ahi hi.
Picnic na mun Cherrapunji road hia, Megahlaya State Transport Bus 4 hiam ki hire hi. Kuanlam leh chiahlamin bus sungah nungak leh tangvalte in la sa in nuamsa mahmah uhi. Mizoram akipan hi’n kipanlou hitaleh Luseipau zangte’n bel nam la, gamngaihla, la tualleng etc khatin hon pat peuh uh huh theiin sathei vek sim mai ua, khatin luangthei mai uhi. Kou Manipur lama pan Luseipau zanglou bangzah hiamte’n la asak chiangun ka zuithei kei sim uhi. Huchia la bang zui theilou, luseipau lah siamloute adingin huaini picnic pen a nopna khat om mahleh amau nopsakdan leh kou nopsak dan hong kikim lou pah hi. Tuam deuh hi a kitheihna ki neia, amau le huchi deuh a hon mupah uhi.
Zo suan hitawk lele, Zo suan hi chiat lele, unau khat hi lele, suangtu kibang himahle i pianna, i khanletna, i tenna gam a hong kibatlouh chiangin i paudan, i chindan, i duh-ingaih, i ngeina, i thu-le-la theih kikhatlou in kibang lou hi. I omna tuama kimumu lou i hihmanin nampuan/puandum a i zat bang hong kibang khollou in i kal ah gap tampi om hi. Huchibang dinmuna Zomi hiama kilomkhawm ding i chih bang, a utvek hizenpi, i lasak khata a luang theipah lou dinga lapawl i zil khawm mah kul ding hi. Lapawl nalhtak saktheihna dingin i zil khawm kula, kuateng in a soprano, alto, bass etc sa ding chia a part bang kihawm masak phot ngai ding hi. A la part kihawm khit chiangin, a kaih leh sakdan i siam chiat khit chiangin le a la thu bang byheart ngai lai dinga, music bang i deih ngialleh a musiciante toh zil khawm hong ngai lai ding hi.
Lapawl zil khawm hiam practice khawm hiam kholloua lapawl kilawmtak lemthei mai ding kisa a i lep fuhlouh chianga nou a basste ziak ahi, nou a supranote na siamkei uh, altote ziak ahi etc chia ki ngohtuah mai dan khat houh hi ngut i kei ua hia chih zolawkta lapawl genin hon ngaihtuah sak hi.
No comments:
Post a Comment