RAPTURE SONG

Neulai in Kaihlam ah Class VI zilin mi bangzah hiam school ka va kai uhi. Kaihlam ah la kithang mahmah khat om hi. Kaihlam nungak, a diakin Nunhoih, Niangvung, Ngaihpi chihte bangin sasa ahihman un ala kithei pah hi. A la thu (lyrics) exercise book a tei-in a title bang amau gelhdanin RAPTURE SONG ki chi zen mah hi. Memory a ka ngaihtuah khiak theih dan a nuaia bang hiven: 

Kei ka mang ding khatvei chiang

Jeisu in hong la dinga

Khitui luanga mi kikhenna om ding

Kei mei toh hong tuam dinga

Jeisu kianga hon tun ding

Tua vantung moupi na pawi a

Na kihel tel kei kha deh

CHO.

Hong kidoh kellei Zeisu tungah

Ka omna leitung ka ensuk ding

Kua ngen leia om chih ka mu ding

Mi kikhelna hun minute omlou

Daitakin ngai leng kiza

Misi khua aw ging zuazua

Kuamah hong pai kei un

Na piangthak un chi

Lazazuh kiang tui ngenin

Tu dongin hong tung theilou

Salua sange ka dangtak

Inkuante aw chi

Hell ah toptheilou gimna

Van a tawptheilou nopna

Toptheilou gel ki galsai Psaian koi

Sihna nang koimah pai ken

Mualte aw kei hong vukin

Chi a ngaplou pipi a kikou na aw kaza

A lathu a dikkim diam ah? I etleh kawlgam lam a kiphuak ahih a kilang. Aphuaktu kua ahia ka theikei. Pathianthu a rapture chih gindan base a suangtuahna apan a kiphuak ahih tuak.

I gennop ah lut ni. Suangtu khat, Chimnuai vontawi i hihmanin kho gamla pipi a teng hiam gamtuam a om himahle kawlgam leh vaigam Zomite kong chi tuamtuam ah contact ina nei tou zel a zi-le-ta a kila bang, sumsinna a contact bang leh thu-le-la ah leng i ki poh gige hi. Tua i la gen a kithanlai-in i Zo khovel, adiakin singtang ah tape(cassette player) ki theiphalou in radio khong kitheipha sim lel hi. Huchibang huna kawlgam a la kiphuak Manipur lamin i na theih leh ngaihnat pen bang hong chi paia a ana kithei kha ahiam ka thei kei. Laisiangthou leh Labu kibang neikei mahle thu-le-la leh Pathianthu ah leng contact na ki nei gige hih tuak hi. Neulai a Tuimuite lawpawl siamdan a gen khong uh ka mang thei kha viatviat lai hi.

Nidang pek apan kawlgam leh vaigam a laizomte kipohdan a thei zaw deuhte’n hon gen le uh i chihnop man ahi.