[Monday, 10 November 2008 14:57 Tuni cycle tuan theihlouh thu ka gelh ka computer sung pheklet a ka zon leh ka mu zoukei a, hiai khualzin thu ka va thaidok kha a, koimah a koihkhe lou ka hi in ka kithei a, kon koih suah ding - Phualva]
Manipur leh a polam kawmtuah bus a khualzin tampite thil tuah leng hi ding in a ginhuaia, Lamka apan Dimapur tan Blue Hill bus a ka tuan thu kon thai zek ding. 1999 December in Guwahati pan Lamka ka zin uhi. Kuanlam bus a pailou ka hihman un i gen dah ding. Lamka ah gaalpi na veng nailou in nitak teng in thau ging kiza thei lai hi. Amuna omte kingeinaseh mahle uh mithak in bel thaugin i zak mawk chiang in nuam kisalou hi. I hong taam zek chiang in ki ngeinaseh dan khat zaw hong om sam.
Kiklam, January 2000 in Nagaland tawn ut chi in Lamka apan Dimapur tan Blue Hills bus ticket ka la uhi. Eigam a buste zingthou baih ahi ding ua, phalbi zing nawngpi, vai pathian thohma, in Tedim Road a aki patna uh delh ngai hi. A hun a kipan kei mahleh ki paikhe baih thou hi. Tuibuang a dak sawm tan tham ding chih lam himhim ngaihtuah lou in bus hong kipat chiang in Lamka nuse takpi ding chi in lung bang hong leng dek thei hi. Bus kise taktak ahia, Tuibuang ah abawl kineih uh ahia, bus sai talpakte a bawl a buai mahmah danin a nuai lam peuh ah lut in lamdang uh ahihman a bawl khit uh ngak in ki om nilouh hi. Inlam a va kiknawn a inn a ann va nek di lah hilou deuh, tulai dan a mobile khong a ki phone ziahziah bang la hithei lou. Annek hun-in gil khong hong kialsim ahi dinga inn ah zaw ann neta di uh hiven peuh chihsim in a om hi.
Atawp a dak sawm bang a hong hih chiang in hon paipih khong uhi. Imphal tun chiang in sun hita a, Blue Hills station ah ann neman lou deuh ding in hon khawlpih uhi. Neding i chih leh Sekmai a nek ding a hisak ua, amau thu mah man ngai hi. Sekmai tun chiang in lah annnek hun kikhel zel, talpak hotel ah ann ki mu zoulou zel hi. Naupang toh bang toh ann neding chia hotel table a tu zeizai khin napi Driver leh motor saite a ding kia om a chih chiang un, “ahi maw” chih lel in om hi. Gaalpi ven siangma a a kuamah ki theichianglou ki muangmoh sim chiat khat aki hi diam, passengerte a kihou khuk lah ki omlou, talpak gam ahihziak a meikhup mai aki hi zaw diam a phun-apau omlou in dawr neuchik khat-le-nih a biscuit leh muh theihtheih nek a tui dawn mai ngaita hi.
Sekmai a pan painawn in zingkal a motor siapen lah Nagaland lamtou khong ah hoih peetmah leh hat peetmah hileh kilawm zel. Mao ah khollou in ki paisuak a, passenger (Lamka a kipan ngen) a pau a phun omlou in ki tuang dimdiam vanglak hi. Talpak gam hi chi a a pau-aphun omlou khat aki hi diam ah! Nagaland Gate a Police check Post ah ki khawl zek hi.Kei bel bus pawlam ah ka pawtkhe pah a. Pai sawm nawn pah geet uh hiven, kuamah a phun a pau om ngeilou di bang, kipat mai ngai hi a thei ka hihman in motorpute kiang ah na passengerte uh na bawldan uh diklou hi. Zingkal apan tutan a ann nelou, hiai ah singpi beek dawn ngai hi, na khawl ding uh ahi ka chita hi. Ka lawinu leng kidek zou nawnlou hi ding hiven Nagamese in hong haang zakta hi. Nagaland Policete khong amuh leh khamuang kisa ahi di chu! Ahihhang in a vanpuak khong uh kitheihsiamna khat nei uh ahi diam, Policete toh amau ki neelzaw mawk ahih man un bangmah phattuamna om vak lou a bang. Hotel chihdan khat om hiven, passenger dangte samkhia in aktui pumhuan, sang khong ne in singpi ka hon dawnta uhi. Adan hong om deuhta chih ding hin teh.
Huchi in k'ong pai nawn ua, Kohima peelta chih ding in motor pen mumallou dan hileh kilawm hon bang sak geet uhi. Jaanggam a lampi hoihna hinapi hong awl tai mahmah geet hi. Atawp in Dimapur nitak dak 7 in ki tungzou pan hi. Lamka leh Dimapur kikal sau mahmah hi, huai ni zet in tuh!
A omzia hi dinga ka gintak bel Lamka mite zinga pan nitak dawng ann ngawl a paisak ding, Dimapur apan bus dang man dingte'n a laplouh ding uh; Dimapur a singtangmi nitak annek kikhel hun a tun ding (an zuak hotelte na kikhak or ann na bei khin ding) chih khong hilai ding in zeldim theih hi. A negative lua leh lungsiam siathuai lua na sa di uam ah. Huailai bouruak a thil hithei dinga ka gintak dan ahi a, huchibang deuh experience kha midang a om diam ah. Api leh a paneu Shillong a paisuak dingte nek ding bel hotel ah ka mu hamham ua, kou bel a giak ding ka hihman un hotel a ann muhlouh le phamoh nawnlou hi.
Guwahati tunnung in lungkimlou theilou ka hihman leh ka bus tuanna uah Blue Hill Travels kichi ahih chiang chi in, Guwahati a Blue Hill Travel HO attention ding, ka tuannate un a passengerte a ngeingaihlou dan uh uh saupi a gelh in Chandmari a Assam Tribune office kong a a mail box uah ka va khia hi. Bangchi a diam ah, Assam Tribune ah le ka Letter To Editor hong kisuahlou lai zomah!
No comments:
Post a Comment