EI ZOSUANTE’N nungak hel chih chindan i chi diam ngeina i chi zaw diam i neih pen thil hoih leh manpha lua khat hiveh e. Namdang chile, vaite chih khong bangin nei khollou a di uam ah, sapte’n chu dating a chih uh kha ahi mai dia, ei kihel dan bel hon tuk zoulou ding uh bang kasa hi. I kimkianga (N.E. India) a nam tuamtuam in bang a chi neih di uam ah, talpakte bang le kihel khollou uh hilou hia le? Khasi/Jaintia te’n le nungak hel chih dan nei na lou ding uhia chia ka risk leh BahPro Tanu chih article ka gelh loh hial aka.
Paklun tak mai khuaimu, khuaiva leh khuai chi tuamtuam in a zu tawp dia ava veh vutvut ua vasa chituamtuam in le kek bambam zozen a ham leh chiak a ava boh nainai u banah thousi-thouvai nangawn in ava velh dipdip uh bang in nungak hoih leh siamte tangval kichi taphot in inn dimdim in va hel neinai mai uhi. Nungakte nasep chi tuamtuam – tanghou suk, chiangtang suihsak, sing eh, khau zial etc etc bang leng a huh ding tangval a dim in om hi. Ngambawm in Khupchingte lou a singkung sangtak ava suam (khiat) banga nungakte nna a thawna sepsak ding tampi om ahihman in nungak neite a dingin lawk leh phatuam mahmah hi. Nungakte’n le amau hih theihlam kamsiam taka inleng teng a na dongsong leh laizial zialsak, patsak, puan sawpsak etc etc khong hih ve thou uhi.
Tulai khonga nungak leh tangval kingai, nu-le-pate’n lah theihpih lou, koilam hiam a midang omlouhna a hun thoveng zanga utut a a om theih uh bang hilou a, insung mah a nungak hel tangvalte leh intekte tu timtem a houlim thei ahihman un a kuapeuh a dingin hoih hi. Nu-le-pate a ding a le lung hihmoh luat ding omlou a a ihmut uh a suah chianga lupsan geih mai thei uhi. Nungak khat in a lenglate laka tangval hoih khollou ana deihbawl kha bang hitaleh a nu-le-pate’n leng a lengla teng ana thei mahmah ahih chiangin “huaipa pen zaw… “ chi in a tanu uh a deihsaklouh thu uh ana hilh thei pah ua, a hoih deuh leh a deihsak deuhte bang uh amau le ana hoihbawl deuh pahin a tanute kiang uah leng hilh pah thei uhi.
Ke’n kon gelh sau vak kei dinga, nungak hel chindan i neih a hoihna leh a hoihlouhna tampi a om lai ding. Huaite leh nungak hel toh kisai kha himhim thilte hon comment ziahziah mai dih ua le. ZOLte article gelh i taima kholkei uh a banga, gelh khawm vek leng i chihna ahi e.
No comments:
Post a Comment