Tutung “Kawlgam Zomi”, “Inde Zomi” chih bang omsak ding i hi a, Zomi khen sawmna sapah kei le. Gamdang i paitheihdan kibanglou om ahih man a hiai kammalte zang i hi zaw. I gen masak nop nawn tuh, a theiloupen in gamdang pai thu i gelh ziak atheite agelh dinga choukhetu i hih khak leh chihman ahi. Tuahkhak nana gelh suk mai ding i himanin a simtute a simdan ana siam uh ngai kha ding hi.
Zomi’ laka gamdang - Europe leh Americate genna ahi diam ah - pai masapen kua ahi diam, ke’n zaw ka thei kei. Tuitawgala paite houh ahi ding uam? Akua akua hitaleh, tuni’n gamdang tungkhin Zomi tampi omta hi. Huaite lakah Inde Zomi sangin Kawlgam Zomi a tamzaw ding. Gambuai ziaka refugee, asylum khonga gamdang pai a tam lai un Inde Zomi apaisunte - theology lam zil, MBA zil, Indian Foreign Service a sem, Financial Institutions a sem, NGO a sem leh Juda nam hi a kithei chih khong ahi ding. Inde Zomi gamdang pai tamna pen Israel houh ahi diam ah. [Mi Israelte a kingaia huai lamlam va tung khinta e’n Inde Zomi i na chih lailai hon hehsan law maimah di uam ah :)]
Alalte uh kuamah thunuaia omlou kisa lua-in ni leh kha kala leng bangin kingai hial mahle uh tuni-in Zomite midang ukna nuaia om in self-sufficient hetlou uhi. Mi nuaia om chih mahtak politics leh economic lam dinmun hoihlou in khosak haksa sa uhi. Sep peihlouh man hilou in khosak noptuam zawkna dingin gamdang pangbel peuha a om uleh hampha kisa maita uhi. Huchibang dinmun ah gamdang paithei chia kipahpih ding hia mahni gama om theilou chia hehpih zawk ding chihle theih hakpi asuak hi. Bangteng hileh gamdang pai phuangta, gamdanga i dinmun leh khosakna a lungkim i hihman apai beh om toutou lai ding bang hi.
Khenkhat ngialin Inde Zomi le Kawlgam refugee a ki gelhlut uhenla, gamdang pai dan ngaihtuah le uh khangsawnte a dinga hoih zaw ding ahi a chi uhi. Huaidana ana lutkhin tampi om houh ahi zaw diam ah... Khosakna leh neih-le-lam kia etin zaw i gama haksataka om sangin hoihzaw kha mah inteh. Abul apana diklou taka pan- refugee hiloupi - refugee a vapai ding a utlou tampi om ding hi. Ahihkeileh hiai zaw mimal ngaihdan a kinga chiha genlouh zawk di hia leh? Refugee loua gamdang pai dan le a om tham dingin a ginhuai.
Technical leh siamna sangpi neikei mahle tuailai hunkhop India khopi tuamtuama Call Center, BPO etc a sem i om hi. Hiai pawl - English leh computer zangthei, Zomi website tuamtuam 24x7 a hulum saktute- hih a pawla gena gamdanga paithei dinga chitna neipen ahih uh aginhuai. Ngaihven deuhin lampi zong le uh hiai pawlin gamdang paitheihna kong tuamtuam kihong amuh uh a lamethuai hi. Delhi, Bangalore, Mumbai, Hyderabad etc a aseptheih uleh UK, USA, Canada, Australia, Dubai, Norway etc ah a septheihlouhna ding uh thu omlou hi. Ngaihven khollouh ziaka kong kihongte a lut kha tadihlou i hi kha diam?
Night duty khong om ziaka agam mite’n lawhtam a beiseih manun UK leh USA khong ah gamdang nurse tampi ala sek uh a chi ua, Canada khong ah old age home a teeksiate enkol ding mi a deih uh chih bang, gam tuamtuam ah motor hek ding leh sepna/kilohna ding lunglutna, siamna leh qualification neih dungzuiin tampi a om ngei ding. A ngaihvente a dingin agency tuamtuam gamdang pai leh sepna zonsak thei leng a om ding. Gamdang pai leh sepding omte athei law danin i gen zungzung dek mawka, migen khong gensawn maimai i hi. Migen chih a le “kua gen eita” chih dotna hong om leh dawng thei nawnlou zel ding pi khat. Chihsa bangin i deihpen zaw atheite, gamdanga omsate a gelh dinga i chou khiak zoh khak leh chih ahi.
Koi gam a bang opening om, bang sep ding om, kuate’n semthei, kuate huai gama lutthei chih khong alunglutte theih dinga genkhe theithei in pan honla le uh. Huaiban ah a mipi le i bengvak deuha koilam a bang kong kihong om ahia chih khong kansui deuh leh lampi kihongte zui thei dia adventurous deuh ngai le hikha ding hi. Gamdang pai khong i ut si-a, ahiloupi refugee khonga i painop kei leh chihman ahi a; ahuchih keileh gamdang pai va huchi zaalbawl luat ding le ahi khol diam ah.. Huchia kong i dap peih leh Zomi gamdang pai category hong ki behlap lai ding hi.
Gamdang khong ah va sem souhsouh ngutle, houh i gam sum-le-pai dinmunin masawn phaha i gama khantouhna tuntu khat ahih theih banah i ngaihdan leh value system khong khekna hoihtak banga hong pang vanglaka semloua sum muh chettheihna a ngaihna khong, nekguk-takguk leh thau tawia nekzon khong toh kisai i ngaihdan khong hon kheksaktu hong hikha maithei hi. Side A hiai ah i khin dinga, gelhta sasa Side B gelh i gelh lai ding.
No comments:
Post a Comment