SWEET DECEMBER 2008

Ei lam music album leh laibu suakthak a om chiangin deihsim lele a leina ding kitheilou sek hi. I deih taktak leh Lamka lam (hiam kawlgam hiam as the case may be) a thukhak a neihtheih dan ngaihtuah mai ngai sim hi. Huchia i thukhah chiangin lemlouhna khenkhat a om theih banah hun bang kivei in kuahiam khat ki subuai kha sek hi. Album khat man khualgama kikhak ding pen i vaikhakte bang kisuangin hon khak dah mai-in a chih u leh amau gam khat kisuak thei hi.

Huchi kawmkal ah Aizawl khonga muhtheihte i va lei ton om hi. Zanin le YZTP Sweet December Concert & Fashion Show 2008 ka leia, nitaka ka etzual leh a tawptan ka en man kei hi. Review hilou in hiai toh kikaihmat ngaihtuahna a hong lut neukha kon gen sin ding. Kumtawp chianga Concert leh Fashion Show a neih khawm sek uh, a theme Zosuante kipumkhatna hisak uh a chih theih ding. Hiai kipumkhatna thil hi a latdan in kilawm mahmaha, a tak in avui-avai a om diam chih bel i theipha kei. Amun pen kumdanga azatna uh hilou Rangoon a om Strand Hotel ahi a, a ni Nov 29,2008 hi danin banga kitak banner ah tuang hi.

Fashion Show lam ah designer siam taktakin Zozia/Zogial dawk sak puan a design nalh taktakte uh model duangzen taktakin phoukhiak sak ua, designte uh marketing ah a panpih diam chih bel i theikei. Huaidana etin  eilawi fashion showte hi bang tupna a i neih sek uh a diam ah marketing lamah lohchinna a om diam chih khong ngaihtuah na ah a hong lut a kon gelh maimai kawm. Music lam T-Melody mah chih ding ahi ding. Pawi numei lam khat leh ei Falcon khuampi' Sangpi chihlouh lasate leng hiai band toh ki kaihmatsa ngen ahi sim uh abang. A lasak uh a tamzaw India (Mizoram) lam a la kiphuak/kithangsa ngen hizaw abang. Kipumkhatna theme ahih banner a kitak ahihmanin Zosuan tuamtuamte bangbang hiam a hong kilat khak zeuhzeuh chiangun a theme uh zuikha chih theihna tan a om ding.

I gen ut tak ah lutsukta le. Ka theihkhelh kei leh gamdang a omte in nasa taka pan la a apanpih ziak ua hichibang event kilawm leh lohching neitou thei zel uh ahi hi. Ei Zomi a kichi deuhte lak genlut le, kumtengin hichibang vai Manipur ah i sai thei diam ah... Music lam a kiva tamzawkna kawlgam lam Zomite’n bel a hih theih uh a beiseih huai. Akibawlsa ZOMUS, Lengtong Pauno etc ka muhkhakte toh YZTP ate etkak in kisakkholhna, a mun, a show bawldan, a event organize dan, sound lam chih khong leh adg. ah kikhaihna  om abang kasa. (ZOMUS Concert Malaysia leh Thwnkham Unplugged khong chu ka mukha nai kei) Hiai kikhaihna a om i chihin kuate hiam ngaisanga kuate hiam ngaisanglou i hi chihna lam kawklou hi.

Hiai bukimlouhna khovel ah YZTP lamte a hoih bukim chi zenzen khang, soiselna ding leng tampi a om thou ding. I et leh first impression ah atangpi in kisakkholhna khong, event organize dan khong, sound lam khong leh video editing tanpha eiate sangin navak zaw hileh kilawm ngaihdan hon pe thei abang chih thu hi. Sum kidaih deuh om ziak mah le hikha in teh. Nikum lamin hoih deihna a ei Zomite a ka muhdan ka gen leh mi khatin (a mi zaw gen le akul kei) defensive takin hon dawngin bangbang hiam a gen hi. A gen a tomin eiate low budget a kibawl ahi a, low budget dia quality nak hoihlua hizaw ahi. Eiate ngaihnatdan i siam ding chih lampang hiven. A dikna chiang le om mah in teh, masawnna leh improvement lam i delh louh khak ding lauhhuai i sak man ahi zaw.

Chilai le. Eia sanga i sanggamte a ngaina zaw leh phat zaw i hi kei a, quality leh a kilangthei (show) lam ah leng ma sawnna ding tampi a om dinga huai lampi zui lai le i chihna ahi. Ei laka le a potential om lua ahihman a i gen ahi. I sanggamte gamdanga omte’n hichibang thil khong tawsawn a panpih sek ahih man ua lohching taka hihthei ahih uleh kawlgam Zomi gamdanga om muanhuai threhthroh taktak tampi om ahihna ah beiseihna lianpi a om hi. Chin Famine Concert khonga telkhalou chia vuivui sanga i potential zat a i hihtheihte hihpat ding hilel mah hi. Tu tadihin music lam ah vaigam Zomite sanga kawlgam Zomite u zaw bang ahihman a huailam nga a i gen zual ahi.

03.11.2009