ANN KINEKPIH TOH KISAI

Ann ne di’a kichial tungtang a koilamlam hiam i gelh sin ding. Sun-an in houh pan le. Loukhou a nekzon lai thagum poimoh, nektam deuh leng ngai ahihman lou lama antun pua in sun-an i ne sek hi. Tulai in office khonga semte’n bel office canteen a omom ne mai uhi. Ei gam lamdeuha office canteen a sun chianga neek tangpi - singpi leh sangkan, chau etc- khong ahi mai diam ah, vaigam ah bel ann (buh leh meh) mah ne deuh uhi. Ei lamah bel zinga mahni inn a ann ne chiat i hihmanin sun a singpi leh sang khong inle i ki naamtak theih mai hi. Vaigam ate’n bel vaite’ chindan zui deuh uh bang hi.

Mikhual Nekpih. Ei ngaihin vaite leh namdangte in sun-an ngaina khol uh abang chih ding hileh kilawm hi. Office khonga mikhual, auditor, midang official thil a hongzin a om chiangin sun-an nekpih ngai hi. Huchia i nekpih chiangin annekna mun siangthou leh hoihdeuh bang zot angai a, atangpi in restaurant khonga i pai chiangin hun sawtpipi ngak ngetngut bang ngai sek hi. A ki CHK sak deuhte bangin a omloulou duhse in buaihuai dekdek thei hi. Tui bang mineral water lou deihlou zomah uhi. Sunan nekna ah official time bangzah aki waste sek diam a sui a om diam ah…

Nekkhawmna. Ann nekkhawm hi kinaihna leh kithuahtheihna langsaktu khat ahi a chih theih ding. Ann nekhawmna hih a nekhawmte adinga houlimna hun lemtang leng ahi. Inn a anne dia kichial ahihkeileh restaurant a ann kinekpih i chihte a kinai leh a kithuahtheite ahi tangpi uh. Mi kingeihlou, kisaikhakna neilou anne dinga kichial hiam restaurant a ann kinekpih chih om khollou ding hi. Annekkhawm kawma kithuah a houlimna ah insung, office, sumsinna, khotang etc vai fellou genveng tampi leng a om a ginhuai. Sumdawng leh a customer in ann anekkhawmna gah ua sumdawnna lohching leng tampi a om ding.

Zinte Kipahsak. Pute hiam kuate hiam kianga gennop, ngetnop neite in annek kawmna a gen ua paisuak nuam deuh khat ahi hiam huai hun taang pawl a om sek hi. Asiamte’n kamsiam kia hilouin annekna ah leng pute (ahiam akipahsak nopte uh) ego mutpuak hiam maingal leh nuamsa taka a nektheiohna ding ua bawl dingdan lampi tuamtuam athei uhi. A kuang ua a meh di uh suahsak, chi (salt) khong pia, a nou ua tui sunsak, nekkhit a toothpick khong pia chihdan neuhneuh khong. Inlam a nekna khong ah leng tuate khong ahihsiam mahmah pawl a om thou hi. Lehlam ann i nekpih leh, i inn bang ahih ngial leh i michialte (annekpihte) in nuam asak ban uah i ann leng lim a sak ding uh a chialtu mohpuakna ahi a akul leh poimoh teng uh i ngaihtuahsak a lungkim sak ding mah ahi.

Aneideuhte Mahin Nekpih Thei. I neihsa, i lohkhiaksa midangte toh share ding, midangte nesak ding chihpen azalzoute adinga kiphahhuai leh a kiphalte a dinga felhuai mahmah khat ahi. Mi annekpih i chih kuapeuhin i hihtheih hithou mahleh a neideuhte mahin a hih zoh leh a hih theih uh ahihna le a om. Aneilou a dingin ameh/asa leina ding leh insunga nasema kipei ding chihbang buaihuai thei hi. Huaiban ah i michialte pawl-lim leh houlimpih bang kul nawn ahihmanin huailam i siam keileh ann lim tawk lele i mi michialte tai khollou leh lungkim khollou a le koih theih thepthup zel ding abang.

Ann a Thangkam. Mi khenkhat in lah (mipil deuhte chih ding a diam) tupdang neia mi anne dia chial athangsak uhi. Chihsa bangin neizou thoua kingaihnat ziak a mi chialmun theite bel a ngaihsan leh ngaihnat huai uhi. Tupdang nei, gennop/theihnop nei chihte pawl in bel akhenchiangin thil houchik theihnop/gennop man nangawnin mi anne dinga chial zozen uh bang hi. Nungak nei nu-le-pate bangin tangval prospect hoih deuh nei a atheihte uh inkuan bang anne dingin a chial nuam viau uhi. Hiai khong a hoihkei i chihna a hipah sam kei. Huchi a ann limtak a anekkhit chiang un, a ann uh va neksak ahihna uah kisuanlahna khat omtheita a, huaiban ah a inneite inn, amau boruak ahihmanin gen a hon neih chiangun annekhin ten inneite gen va pawng sel hitheilouin a thilgen uh paisuak nuam deuhse abang. Huaiziak maha anne dia kichial ahi uh. 

No Chih Theih. Bangmah hikei lele kingaihnat ziak le hi khollou a tup dang neia min anne dia hon chial leh a nuam kholkei. Abul apan ana nial khiak pah a thawveng zaw maithei. Anne dinga i ki chial leh i ki itman, i ki ngaihman, i kithuahnop man, i neihte i share nopman, haksa tak leh lemlou taka omte panpihna dana chial chih khong himai henla, a kikaihmatpih- khau kuala awkna ding chih bang om kholkei leh fel leh thoveng pen mai hi. Himahleh khovel paidan huchi ahi gige kei mawka, anne dia mi hon chialni bang om thei, en mi i chialni bang le om thei ahi mawk hi. Kingaina taka kichial a hoihtaka i kithuah a ann i hon nekkhawm pen nak nop mahmah hi. Taksa bang hrisel deuha, bangmah kidek, kidam lou a nek ekek theih bang ahih ngial leh.

Aw Chisi a Lah.. Mi anne dia chialin “aw” khong chi khin napi ahun a suanlam khong bawlthak phinga va kilangtalou chih bang a om thei a, huchibang dinmun ah a chialtute a dingin sum senthawnna ahihban ah nuamlou leh thil buaihuai tampi a om thei hi. Ann leh meh bang tampi huan elul khin, paih dia lah pammaih si, a zing chiang khonga ankhing nek nuaunuau mai ngai chih bang om thei hi. Tulai khovel a communication lah hoih si ahih chiangin khual zin ding bang le i tunna dingte kianga a pai ding zah, an huankep a ngaih ding leh ngaihlouh ding khong gen fel pah hoih zaw ding hi. Annek hun banga i tun zoh kei dingleh lampi a hotel a nekhinsa a tun bang lamtang a hoihzawk ton a om maithei.

Ann kinekpih tungtang a kizom lou pipi i ban gen suk mai ahi a, gen ding leh gentuak a theizaw, a gelhsiam zaw tampi a om leng a gintak huai. Mihing a dinga poimoh mahmah, a tellou a ki omtheilou himahleh annek toh kisai lai gelh khong eipauin i nei mang keia, a siam zawte chou khiakna khonga apan khak tak in chia i gelh mai ahi.