KHUPCHING LEH NGAMBAWM

Sawtlam pek in nungak lawmta kithuahthei, hohna lam-lam ki juiden a om ua; pasal aneih tak un gai ton uhi. Lamdangtak in a gilnat uleh a sung ua nau tat a ki tuak sek hi. Amau leng lamdangsa kikum in "Lawm i naute hong pian chian' akibang ahih uleh i ki zawlsak dia; numei leh pasal ahih uleh iki tengsak ding"chi'n thukhun a bawl uhi. Nau hon neihtuak tak un khat numei,khat pasal hong hi a amin ding pasalpen Ngambawm numei pen Khupching sa uhi.

A nauneih nung un leng lawmtate kingaihna beituan lou in loukhoh aki thaloh gige lai uhi. Lamdang tak in naungek tegel a gilkial uleh kah hun bang a kituak zel a;nauluai khat a asial khawm chiang un kah adai ua, asial tuam chiang un a kapzel uhi. Asa uh aki sukkhak peuh leh aching ua don leng ngailou hi.Khangtou zel in tual taithei hong hi ua, kimawl khawm in kithuah gige uhi. Ataksa uh akhan dungzui in aki ngaihna uleng a khang a,nungak tangval hong hih tak un, a nute u bang in nasep silbawl kithaloh in singnuai gammual ah akithuah gige uhi.

Nikhat Ngambawm pa sabetna a tuahsia in hong si a, Ngambawm tagah suak hi. Apa sihnung in zawng hiai hiai ua, puansilh nikten kisia in gentheitak in Ngambawm anu toh khosa ua; himahleh Khupching le Ngambawm kingaihna bel kiamtuan lou in khang zaw hi. Huchih tak in Khupchingnu hong lungtungta kei a, Khupching hon tai panta hi. Anun a taimun peuh leh Khupching in Ngambawm a itna alian sem-sem a; atawp in Khupching tuh anu-le-pan khodang ah pemkhiak pih uhi.Himahleh itna in gamla leh nai theilou in Ngambawm azu aham thuak in singnuai gammual tawn in Khupching heel in kuan hi.Lampi a thelnah lak khawnga khawl in singkung peuh a kal in,la asa zel hi.

Amual in hon hal kamkei mual in hal

Hal zoulou e zawlching ngai ing e

A tui in hal chiautui in hon hal

Halzou lou e zawlching ngai ing e

Vang kingai nikhat melmuhlouh kum kivei bang ahihman Khupching leh Ngambawm omzoulou tuak ua apasal zaw Ngambawm Khupchingte in ah ava lengla hi. Khupching nu'n"Hong hoh nawn dah mai in Khupching gentheih ding ka deih kei" chi'n na zawnkou kawm hi. Ngambawm pai in Khupching anu'n "Ngambawm tagah genthei ahih theilou na hiam? Sithuai sa ka hi. Tawpsan in" chia atai zagu hi.Huchibang thu a zak chiang in Ngambawm lungliap leh duangvul in a hehtha peuh suak in Khupching nu china maileh chihbang ngaihtuah kha hial in la honsa hi:

Khupchingnu tongsuah siahkun a ka ngaih

Khupching toh laitawi tonlou aw e

Ka luankhi'n tuibang hon tuum hi e

Khupching na tun in na tun lungmawl in

Sanggahlua hon chi

Sanggah muantui ah va bual leng e

Laukha selou aw omlai tang thei leng

Na tun sungnek in neinuam ing e.

Khupching nun nak hallua ahih man dainawl peuh ah aki thuah uh ngaia; atawpin amaugel ki itna khokim-khokiang a thangsuak in min a hehpih ua, kigawm le uh chih a deihsak uhi. Gamnuai a la khong sa in kumkhen hun kikhekte, huihkhi lang leh vasa hamte'n a lungzuan uh a phawng in sing leh loupa ki hekkhawm bang a lunggulh uhi.

Khupching leh Ngambawm liangvai lua sang e

Gam ah tangnah silhpuan in nei e

Khupching leh Ngambawm liangvailua sang e

Puanbang pom nan leibang lel ve ua

Khupching khim in zing hon zialkhawm hen aw

Banzal nangbang hon henkhawm hen aw

Khupching ka ngaihman tuanglam i tung ah

Khokhang phaikhin sem e vuang ngel-ngel

A singzing nuai ah tangnah lam nuai ah

Zawlching sialbang giahpih nuam ing e

Thangvan ging dim dim laikhun thawn chiai

Puanbang pomnan leibang lel ve ua

Khupching leh Ngambawm in lungsim hon suangtuah tuah ua,a tawpin Khupching in:"Ka nu leh ka pa va houpih him him in,bang agen uhiam?" hon chi a zum leh zual mahleh a itna uh tangtun sak na ding in Ngambawm in Khupching nu lepa ava houpih hi. Khupching nun'n na hougawp nawn ahihman zum,dai leh khasia in hong kika:

Ka tun va dong aw Ka zua va dong aw

Khokhal tuibang kei hong la ve aw

Na tun va biang e Na zua va biang e

Khokhal tuibang lakna nailou e

A tagah gentheih kou a om gige man Ngambawm lungkia in Khupching aguka va muh gige zumhuai honsa in kimuhpih vang mah mahta hi. Huchi a akimuhlouh chiang un Khupching' jawlngaih sunglut khakham vei in china pah sek hi. Khatvei hong china lua a, thoih thoih mah le uh damtuanlou hi.Atawpin beidong kisa in anu-le-pan a hihdam thei a om leh a kitenpih ding hon chikhong uhi. Ngambawm in huaithu a zak phet in ava hoh a,Khupching in amel amuhtak in hong halh hiai hiai a hong damsiangta hi.

A damsiang takin Khupching nu-le-pa'n a tanu uh Ngambawm toh aki tengsak nuam tuankei ua, Ngambawm hehlua hi.Khupchingnu gawt a ki nei in Khupching lusip a samzang khat botkhia in Ngazam luipang ah suang a delhkhumta. Huaitak in Khupching china in hong puksia a,a ni ni in gimse hiai hiai hi.Khupching gimsiat atheihphet in Ngambawm in delhpah a ava muh leh agin sang in na se zaw hi.Luigei a a samzang koih bulhnawn leh dam ding chih ngaihtuah in ala ding in va kuanpah hi. Himahleh tui ana khang a samjang na taimang khin ahihman muzoulou hi. Tupi heipi a asing asuang teng kal lumlet mah leh a muzouta kei. Khupching lah ani ani a kiam hiai hiai ahihman atawp in hong sita hi.Ngambawm lungkham segawp tongkhong lasak:

Khupching ka ngaih aw sen a ka ngaih aw

Khupching ka ngaih kulsin tang ta e

Ka siallum pan tang kawlhei liang a bat

Ching sesul sabang ka zuimoh e

Atui suk inluang damdiai in luang e

Ching aw vaibang na tham na hi e

Khupching hong sih hial chiang in Ngambawm lungzing mah mah a, moh kisa, a kisuanlah toh a khasiat toh inna ki kulkhum in sigal in zong va pailou hi. Khupching kha in khelah lua a, Ngambawm amuhlouh chiang in kikhangsak a hankuang ah a luang kitazoulou hi.Sivuidekte beidong in "Ngambawm kilatlouh ziak hin teh, va sam un" chi in ava sam ta uhi. Ngambawm hongpai ngei a Khupching luang kiang ah "Ching aw,kineusak mai in,hichi ding mah hi hang, khase lou in pai mai in" a chih leh siluang hong neu hiai hiai in hankuang sung ah hong kita hi. Vui ding a hong kisak uleh hankhuk ah hong kita kei leu-leu hi.Ngambawm in "Ching aw,kineusak mai in,hichi ding mah hi hang, khase lou in pai mai in" hon chih nawn leh a luang hong neu hiai hiai nawn in hankhuk ah a vuithei khong uhi. A vui zoh un Ngambawm in Khupching han tung ah zouzam apawi hi.

Hun hongpai zel a,Khupching nu'n atanu leh Ngambawm a halman a atanu suun loh hial ahihdan khong ngaihtuah tuah ahi ding a Ngambawm a bawlsiat le a tung a athilhihdante hong kisikta hi. Ngambawm tuh Khupching nau Sialching a ding a zol hon tumta hi. Khupching nute loulai a mawngsing lianpi sim leh mal sun aka zei-zoi alek in mual bang khup hial khat a pou hi.Khupching nun hiai mawng sing Ngambawm khiaksak a Sialching toh kithuahsak ding a lunggelta hi. Huaidia Ngambawm chialding in apa nanglom khat toh kuan a,a bawldan uh kisuanglah in ava gen ngamkei hi. A huchihna lam in a nanglom lemkhin in a hong kiikta. Anu hong kipan nawn a, akhausum peh toh a kuan hi. Aman zong gen ngamlou in akhausum tawi apehzoh tak in paikik hi. Huaikhit in ava kuan awn a, va genngam khong khong hi. Ngambawm inle na niallou in na mangpah vanglak hi. Inn a tun in Sialching a sam a" zingchian Ngambawm sing khiakna ah na va zui dia, loulai khong ah na kipuk khem khem dia, ahong phot chiang in na na kawi zel ding" chi'n thuhilh hi. Zingkhua hong vak a sunan meh limtak bawl in Sialching posak in loukuan din Ngambawm va tawnsak hi.Ngambawm gawsem leh thau pua,heipi liangbat in Sialching loulam ah zuita hi.

Lou hong tung ua Ngambawm in mawngsing hon kheta hi.A kakhat sunma a sual a, huaizoh in a kathuam a nahpa phah a tu in gawsem hon mut hi. A lungsim mitkha a Khupching kia mu in,anu deihsaklouh dan leh tu a Sialching a dia azawldante angaihtuah chiang Khupching loungal midang a om thei kei.

Ka silhpuan tang aw ka kaihdial tang aw

Ka sialching toh laitawi ton ve aw

Silhpuansia non chi kaihdial sia non chi

Nang Sialching toh laitawi tonlou leng

Ching aw na malnuan na tun lungmawl in

Pamlou sang singsawl khian ei sawl e

Ka semgua pan tang kawlhei liangbat ing

Tulsing lel a khua va thil ing e

A u lah ngai ing anau lah ngai ing A milai pen ka ngaih tung nung hi

Ching aw na laukhan naubang hong nui in

Melmuh ding in thilmun hong leng aw:

Ching aw na laukha mel mu nuam ing e

Khattang koi a sawlbang na hei hiam

Lungzuang tak a gawsem tum a la hongsak chiang in Khupching kha omtheilou in musi in hong leng a; Ngambawm tung ah hong kilam diai diaita hi. Khupching kha muhtheih a hong len chiang in Ngambawm in a khelah mah mah a, ni bang tum ngeikei leh a chi hial hi.

Thilmum hong leng e Ching aw na laukha

Khaubang chiahna leibang lel mawng e

Ching aw na laukha tangbang i kholh nin

Tung sunni vaibang thamsawt hen aw

Sun-an nek hun in Ngambawm anne ding in singkung pan kum suk a abul a Sialching na kipuk khembawl,a pheingou dawk hen mu hi.Ngambawm in aphot kawm in: "Mita mi nau hichi ding in kilawm kei" chihsan lel hi. Sun an nekzoh in sing hiang hon khe nawn a, agim chiang in a ka thuam a gawmsem la in la asa zel hi. Khupching kha hong kilak nawn zel a, huchin a kithuah thuah uhi. Nitum dekkuan in singhiang langkhat a keh ou nawn hi. Pai hong hunta a alungsim in Sialching pen Khupching hi zaw leh chi'n a saam saam hi.

Muikhua zingta e seinou tam gual aw

Tunsiang sihkhum bang zuanta ni e

Ching aw na laukha tangbang ka kholh nin

Tung sunni vaibang thamsawt hen aw

Ka tem apai a kuahleng chibuang ing

Zawlching kama ah pai leh ching e

Ka tembang mi tem a om ve diam aw

Zawlching bang minau a om ve diam

Vabang hong leng aw damtui tanggual aw

Sialbang lian leng hei nawnlou ding hi

Ka siallum pan ing na kawlchiang pan ing

Ching sesul sa bang ka zui moh e

Hantung a azouzam suan hang pakta a,Ngambawm in Khupching muhlouh/lohlouh ding in pammaih sa lua hi. Huai pakte amuh chiang in Khupching melmu bang in akingai hi.

Ka buktual zang a zouzam ka suan in

San in pal ven ngaih in lou moh e

Vual in lou thei ka sinlai ah damtui ata e

Hantung a zouzam pak ana kilou veu,kualoh hiam chih theinuam in Ngambawm in zankhat atang hi. Zanlai in sangak khat in honglou a,Ngambawm in man a "Bang dia ka zouzam pak na lou veu na hia?" chia a dot leh"Ka pi Khupching hon sawl ka hi.Ama adia ka lohsek ahi" chin a dawng hi.Huaiphet in "Napi Khupching koi a om hiam? Na gen masiah kon khah kei ding" chin dong a. Sangak in Khupching misi khua a om ahih,a lampi ken leh kawlse lak ngen ahihdan, Ngambawm ahoh theihlouh dingdan ahilh vek hi. Huaitak in"Huchi ahihleh pai inla paklou dia na hong kuannawn chiang in lamtawn in akmul hon bawt in" chi'n Ngambawm in sangak a paisakta. A chihbang in sangak hong kuannawn takin lamtawn in akmul hong bawta, ( sangak in ak amat chiang a amul a boh sek kipatna ahi a ki chi) huaite akmulte zui in Ngambawm misikhua a hoh din a kuanta hi. Ken leh kawllak ah khaugui peuh ah akiluai kai zel a, a tawpin Khupchingte khua va tung hi. Misikhua a inte telhawng khong a kilam ahi a, Nambawm in inka khong asik chiang in a chim zua zua geuh hi. Khupching in Ngambawm na ngai mah-mah lai a, hoihtak in na bawl hi. Nitak hong hi a, HAM a giahna ding a etleh Ngambawm in saguh tampi mua, a khente paikhia in akhente biching ah siat hi. Zingkal in saguhte mi hongsuak ua,mai hon phiat souh souh uhi. Ngambawm in misi khuate hindan lamdang hon sapanta.

Nikhat misi khuaten ngabet hon saw ua, Khupching in Ngambawm leng va kuan ding in sawl hi. Luilam zuanlou in tangdung khong ah apai ua, mauteh peuh abawm uah aguang guang uhi. Ngambawm in lamdang sa in a bom tophah ding mauteh tamlou la zek hi.In hong tun ua Khupching in : "Nga n'on man uhia ?" chia a dot leh Ngambawm in "Bang nga i man dia, tangdung khong a nga ki beng mai mah" chihsan hi. Khupching in bawmtaw a et leh mauteh bang zah hiam amu a, "Nga n'on paw tawk ve le. Koi k'on em pah di" chi a mei a hon em leh ngasa bang in a puaksia sia ngut hi. Ngambawm in a em chiang in lah mauteh keu mah bang in a kangtum vut-vut mai hi.Misi khua ate a ding in mauteh pen ngasa ahi mai.

Nikhat sabeng din a kuan nawn leu leu ua,lunggam leh tangngol khong aman ua,a zawng laih laih uhi. Amau a ding in huaite tuh vompi leh sahang ahi uh. Sa ahuan ua,khindang ah a hou ua,salute kong biang leh bang ah ataak uhi. A tawp in Khupching in "Ki it kingai mah mah lehang leng omkhawm thei nai mah mah lou hihang. Inlam ah va paiphot inla, na voktal na gou dia, asa na nek zoh chiang in lupna tungzawn biching ah teipi leh siat in la, anuai zawn ah lum in "chi a thuhilh in Ngambawm a paisakta hi. Ngaibawn apai a, Khupching gen bang in a hih a, lupna tung a alup tak in Khupching kha musi a va leng in teipi a bohkhia a, a dip asun pailet a,Ngambawm si ta hi. A sihphet in akha uh lengkhawm in misi khua a tungpah uhi. Telhawng a inn kilamte Ngambawm in thupi a sa lua a "Hiai inte kua lam ahia?' achi'n a dong a "Tuma a na hong a non lamsak ahi vele, manghilhta natel maw?' chin Khupching in nuikawm in adawng hi. Huchi in leitung a ki it kingaI MAH MAH le uleng deih bang a omkhawm thei ngeilou tuh misi khua ah nuamsa takin tawpni neilou in a omkhawmta uhi.

www.vaphual.net ah anuai abangin:

Cing Khup Leh Ngam Bawm – An Eternal Love Story

Posted by Carey Suante on September 30, 2009 · Leave a Comment

CING KHUP LEH NGAM BAWM’ TANGTHU

Nidang lai-in a ki thutuak mahmah lawmta nih om uh a, lo peuh a kilawm thei zel uh hi. Ni khat ni ciangin  anihun pasal a nei tuak uhi. Lamdangtakin a gilnat uleh a sung vua nau tat a ki tuak  hi. Amau zong lamdangsa-in kikum uh a, “Lawm aw, i naute numei tuak a hih uh leh kizawl sakin, pasal tuak ahih uh leh zong ki zawl sak ni. Numei leh pasal ahih uleh ki tengsak ni”ci-i’n a kiciam uhi. Nau hong neihtuak ciangun khat numei, khat pasal hong hi a a pasal Ngam Bawmphuakin a numei Cing Khup a phuak uhi.

 A nau neih nungun zong lawmtate’ kikingaihna beituan lo-in lo khawng aki lawm den lai uhi. Lamdang takin naungek tegel a gilkial hun u leh a kah hun bang a kituak thei zel hi. Nauluai khat a asial khawm ciangun kah uh dai a, asial tuam ciangun a kapzel uhi. Asa uh aki sukkhak peuh leh ciing uh a kep zong ngai kullo hi. Khangto zelin hong tual taithei ta uh a, kimawl khawmin kithuah den uhi. Ataksa uh akhan’ tawh kizui-in aki ngaihna uh zong khang a, nungak tangval hong hih ciangun, a nute bangin nasep silbawlna-ah kilawmin singnuai gammualah akithuah den uhi.

Nikhat, Ngam Bawm’ pa sabetna-ah tuahsia-in hong si a, Ngam Bawm tagah suak hi. Apa’ sihnungin zawng hiaihiai uh a, puansilh nikten kisia in gentheitakin Ngam Bawm anu tawh khosa uh hi; Hi mah leh Cing Khup leh Ngam Bawm kingaihna bel kiamtuan lo-in khang zaw hi. Tua ciangin Cing Khup’ nu a lung kia-in, Cing Khup a tai thei zel hi. Anun a taitai ciangin Cing Khup in Ngam Bawm a itna lian sem-sem a; atawpna ciangin Cing Khup’ nu-le-pate in khaw dangah a pemkhiak pih uhi.Himahleh itna in gamla leh nai theilo-in Ngam Bawm azu aham thuakin singnuai gammual tawnin Cing Khup heel-in va kuan den hi. Lampi a thelnah lak khawngah a khawl ciangin singkung peuhah kahin la asa zel hi.

 “Amual in hong hal kamkei mual in hal
Hal zolo e zawlching ngai ing e,
A tui in hal ciautui in hong hal
Halzo lo e zawlcing ngai ing e”

Vang kingaihna hangin nikhat melmuh loh zong a kum kivei bang ahihmanin Cing Khup leh Ngam Bawm om zolo tuak uh a, apasal zaw Ngam Bawm Cing Khupte’ innah ava lengla hi.

 Cing Khup nu’n “Hong hawh nawn dah mai in Cing Khup’ gentheih ding deih ke’ng” ci-in zawn ko gawp hi. Ngam Bawm ciah a, Cing Khup’ nu’n “Ngam Bawm tagah genthei ahih lam theilo na hiam? Sit huai sa in, tawpsan in” ci a atai Ngam Bawm in na za sim hi. Tua bang thu a zak ciangin Ngam Bawm lungliap leh duangvul-in a hehtha peuh suakin Cing Khup nu’ a ci na mai leh cih bang khawng peuh ngaihsunin a khasiatna la a sa hi:

 Cing Khup nu’ tongsuah siahkun a ka ngaih
Cing Khup tawh laitawi ton lo aw e
Ka luankhi’n tuibang hong tuum hi e,
Cing Khup na tun in na tun lungmawl in sanggah lua hong ci,

 Sanggah muantu- ah va bual leng e
Laukha selo aw omlai tang thei leng
Na tun sungnek in neinuam ing e.

 Cing Khup’ nun nak kham lua ahih manin dainawl peuhah aki thuah uh hong kul ta a; atawpna ciangin amaugel’ ki-itna khuakim-khua pamah a thangin mite in hehpih mahmah uh a, a ki ten theih ding uh a deih sak mahmah uh hi. Gamlak khawngah vakin la sa-in kumkhen hun kikhekte, huihkhi laang leh vasa hamte’n a lungzuan uh phawngin sing leh lopa banga ki hekkhawm ding bang a lunggulh uhi.

 Cing Khup leh Ngam Bawm liangvai lua sang e
Gamah tangnah silhpuan in nei e
Cing Khup leh Ngam Bawm liangvailua sang e
Puanbang pom nan leibang lel ve vua,

Cinglhim khimin zing hong zialkhawm hen aw
Banzal naangbang hong henkhawm hen aw
Cing Khup ka ngaihmanin tuanglam i tungah
Khawkhang phaikhin sem e vuang ngel-ngel

A singzing nuai-ah tangnah lam nuai-ah
Zawlcing sialbang giahpih nuam inge,
Thangvan ging dimdim laikhun thawn cia,
Puanbang pomnan leibang lel ve vua

 Cing Khup leh Ngam Bawm in a lungsim uh ngaihsunsunin,a tawpna ciangin Cing Khup in:”Ka nu leh ka pa va hopih him him ning in,bang agen uh hiam?” ci-in zahtak maizum zong khual zo nawnlo-in a itna uh atangtun sak nadingin Ngam Bawm in Cing Khup’ nu leh pa ava hopih hi. Cing Khup’ nu’n na ko gawp kik a hihmanin zum leh dai teng thuakin khasia-in hong ciah kika:

 Ka tun va dong aw Ka zua va dong aw
Khuakhal tuibang kei hong la ve aw,
Na tun va biange Na zua va biange
Khuakhal tuibang lakna nailo e,

 Tua bangin a zawn a ngauna uh tawh a nun a koko ciangin Ngam Bawm in nuamsa nawnlo banah a lungkia-in a inn vuah a hawh nuam nawn kei hi. Tua bang a a kum nawn loh uh ciangin Cing Khup a leng leng mahmah hi. Ni khat ni ciangin Cing Khup a ci hong na a, a thoih thoih hangin a dam tuan kei hi. Atawpna ciangin beidong kisa-in anu-le-pan, “Cing Khup a dam sak thei a om leh, nu hi leh kizawl sak ding, pa hi leh kiteng sak ding” ci-in a gen uh hi. Ngam Bawm in tua thu a zak phetin ava hawh pah vingveng a, Cing Khup in amel amuh lian tak ciangin hong halh hiai hiai a hong damsiang ta hi.

 A damsiang ciangin Cing Khup’ nu-le-pa’n a tanu uh Ngam Bawm tawh aki tengsak nuam tuan kei hi., Ngam Bawm hehlua-in, Cing Khup’ nu agawt danin ki nei-in Cing Khup’ lu zaang a samzang khat botkhia-in Ngazam luipangah suang a delh sak hi. Tua ciangin Cing Khup a cina-in hong gim semsem a, a ni ni-in gim hiai hiai hi. Cing Khup gim semsem cih Ngam Bawm in a theih ciangin va delh pah vingveng a, ava muh leh a upmawhna sangin na gim zaw hi.Luigei a a samzang koih bulh kik leh dam ding cih ngaihsunin ala dingin va kuanpah hi. Himahleh tui na khang a a samzang na taimang khin ahihmanin mu zolo hi. Tupi heipi tawh asing asuang teng kalin lumlet mah leh a mu zo tuan kei hi. Cing Khup lah ani ani-in kiam hiai hiai ahihmanin atawpna ciangin hong si ta hi. Ngam Bawm dah luan ahih manin la a sasa hi.

 Cing Khup ka ngaih aw sen a ka ngaih aw
Khupching ka ngaih kulsin tang ta e,

Ka siallum pan tang kawlhei liang a bat
Cing sesul sabang ka zuimawhe,

Atui sukin luang damdiai- in luange
Cing aw vaibang na tham na hie,

Cing Khup hong sih hial ciangin Ngam Bawm lungzuang mahmah a, mawh kisa, a  a kisuan lah tawh a khasiat tawh innah ki kulkhumin sigalin zong va pailo hi. Cing Khup’ kha in khenglah lua a, Ngam Bawm a muhloh chiangin kikhangsak a hankuangah a luang kita zolo hi. Sivui dingte beidongin “Ngam Bawm a omloh man hin teh, va sam un” ci-in ava sam uhi. Ngam Bawm hongpai ngei a Cing Khup’ luang kiangah “Cing aw, kineusak mai in, hici ding mah hi hang, khase lo-in pai mai in” a cih leh siluang hong neu hiaihiai-in hankuang sungah hong ta hi. Vui ding a hong kisak uleh hankhukah hong kita kei leu-leu hi.Ngam Bawm in “Cing aw,kineusak mai in, hi hi ding mah hi hang, khase lo-in pai mai in” honh cih kik leh a luang hong neu hiai hiai kik-in hankhukah a vuithei uhi. A vui zawhun Ngam Bawm in Cing Khup’ han tungah zozam a va suan hi.

 Hun hongpai zel a, Cing Khup’ nu’n atanu leh Ngam Bawm gawm ding hong sawm hi. Ngam Bawm a bawlsiat le a tung a athilhihdante hong kisikta hi. Ngam Bawm pen Cing Khup’ nau Sialcing a ding a zol sawm uh hi. Cing Khup nute’ lolai a mawngsing lianpi sim leh mal sun aka zei-zai ahiang in mual bang khum hial khat a po hi. Cing Khup’ nun tua mawng sing Ngam Bawm khiasak a Sialcing tawh kithuahsak ding a lunggel hi. Tua dingin Ngam Bawm cialding sawmin  naanglom khat tawh kuan a, a bawldan uh kisuangtakin ava gen ngamkei hi. A tua cih na lamin a nanglom lem khinin a hong ciah kik hi. Anu hong kipan kik a, a khausum peh tawh a kuan hi. Aman zong gen ngamlo-in akhausum tawi apehzawh ciangin hong ciah kik hi. Tua khit ciangin ava kuan kik leuleu a, a tawpna-ah a va gen hi. Ngam Bawm in zong na nial samlo-in na mang pah vanglak hi. Inn a tun ciangin Sialcing sam a” zing ciangin Ngam Bawm sing khiatna-ah na va zui dinga, lolai khawngah na kipuk khem khem sak dinga, ahong phot ciangin na na kawi zel ding” ci-in thuhilh sim uh hi. Zingkhua hong vakin sun-an meh limtak bawlin Sialcing puasak  uh a, lokuan dingin Ngam Bawm va zawnsak hi.Ngam Bawm gawsem leh thau pua kawm, heipi liangbatin Sialcing’ lolamah a zui hi.

 Lo hong tung uh a, Ngam Bawm in mawngsing hon khia  hi. A kaa khat sun ma  hih khop a, tua zawhin a kathuamah nahteh phahin tu a gawsem a tum hi. A lungsim mitkha-ah Cing Khup kia mu-in,anu’ deihsak loh dan leh, tu a Sialcing a dia azoldante angaihsut ciangin Cing Khup longal midang a om thei kei hi.

 Ka silhpuan tang aw ka kaihdial tang aw
Ka sialcing tawh laitawi ton ve aw

Silhpuansia nong ci kaihdial sia nong cih
Nang Sialcing tawh laitawi tawn lo leng,

Cing aw na malnuan na tun lungmawl in
Pamlo sang singsawl khian ei sawl e

Ka semgua pan tang kawlhei liangbat ing
Tulsing lel a khua va thil inge,

A u lah ngai ing anau lah ngai ing A milai pen ka ngaih tung nung hi

Cing aw na laukhan’ naubang hong nui in
Melmuh dingin thilmun hong leng aw:

Cing aw na laukha mel mu nuam inge
Khattang koi-ah sawlbang na hei hiam

Lungzuang tak a gawsem tum a la hong sak ciangin Cing Khup’ kha omthei lo-in musi-in hong leng a; Ngam Bawm’ tungah hong lam diai diai hi. Cing Khup’ kha muhtheih a hong len ciangin Ngam Bawm in khelah mahmah a, ni bang tum ngeikei leh a ci hial hi.

 Thilmum hong leng e Cing aw na laukha
Khaubang ciahna leibang lel maw’nge,

Cing aw na laukha tangbang i kholh nin
Tung sunni vaibang thamsawt hen aw,

 Sun-an nek hunin Ngam Bawm anne dingin singkung pan kum suk a, a bulah Sialcing na kipuk khembawlin pheingou dawk henhanin a lum hi. Ngam Bawm in aphot kawmin: “Mita mi nau hi ci dingin kilawm kei” cihsan lel hi. Sun an nekzawhin sing hiang hong khia kik a, agim ciangin a ka thuam a gawmsem la-in la asa zel hi. Cing Khup’ kha hong kilak kik zel a, tua bangin a kithuah thuah uhi. Nitum dekkuanin singhiang lang khat a kkhia kik hi. Ciah hong hun ta a, a lungsimin Sialcing pen Cing Khup hi zaw leh ci-in a samsam hi.

 Muikhua zingta e seinou tam gual aw
Tunsiang sihkhum bang zuanta ni e,

Cing aw na laukha tangbang ka kholh nin
Tung sunni vaibang thamsawt hen aw

Ka tem apai a kuah leng ci buang ing
Zawlcing kama-ah pai leh cinge,

Ka tembang mi tem a om ve diam aw
Zawlcing bang mi’ nau a om ve diam,

Vabang hong leng aw damtui tanggual aw
Sialbang lian leng hei nawnlo ding hi

Ka siallum pan ing na kawlciang pan ing
Cing sesul sa bang ka zui mawhe,

 Hantung a azozam suan zong hong pak ta a, Ngam Bawm in Cing Khup’ muhloh /lawh loh dingin pammaih sa lua hi. Tua pakte amuh ciang in Cing Khup’ melmu bangin aki ngaihsun hi.

 Ka buktual zang a zozam ka suan in
San in pal ven ngaih in lo mawh e,
Vual in lo thei ka sinlai- ah damtui ata e,

 Hantung a zozam pak ana kilo thei zel hi. Kua lawh hiam cih theinuamin Ngam Bawm in zankhat apang hi. Zanlai takin sangak khat in hong lou a, Ngam Bawm in thakhatin manin “Bang dia ka zozam pak na lo na hia?” ci-in a dot leh, “Ka pi Cing Khup’ hong sawl hi. Ama adia ka lawhsak hi” ci-in a dawng hi.

 Tua phetin “Na pi Cing Khup koi-ah om a hiam? Na gen masiah kong khah kei ding hi,” ci-in dong a. Sangak in Cing Khup misi khua-ah om hi, a lampi ken leh kawlse lak ngen ahi hi,” ci-in Ngam Bawm ahawh theihloh ding dan a hilh vek hi.

 Tua ciangin, “Tua bang ahih leh pai inla paklo dinga nong kuan kik ciangin lam tawntungah akmul hong bot in” ci-in Ngam Bawm in sangak a pai sak hi. A cih bangin sangak hong kuan kik ciangin lam tawntungah akmul hong bawta, (sangak in ak amat ciang a amul a bawh sek kipatna ahi hi kici hi).

 Tua akmulte zui-in Ngam Bawm misi khua a hawh dinngin a kuan hi. Ken leh kawllakah khaugui peuhah luai-in, a tawpna-ah Cing Khupte’ khua a va tung hi. Misi khua a innte telhawng khawng a kilam hi a, Nambawm in innkaa khawng asik ciangin a cim zuazua geuh hi. Cing Khup in Ngam Bawm na ngai mah-mah lai a, hoihtakin na bawl hi. Nitak hong hi a, HAM a giahna ding a et leh Ngam Bawm in saguh tampi mu a, a khente paikhia-in akhente bicingah siat hi. Zingkal in saguhte mi hong suak uh a, mai hon phiat sauhsauh uhi. Ngam Bawm in misi khuate hindan lamdang a sa mahmah hi.

 Nikhat misi khua te’n ngabet hong sawm uh a, Cing Khup in Ngam Bawm zong va kuan dingin sawl hi. Luilam zuanlo-in tangdung khawngah pai uh a, mauteh peuh abawm vuah aguang guang uhi. Ngam Bawm in lamdang sa-in a bawm tawphah ding mauteh tamlo tawm khat a koih niangnuamg hi. Inn hong tun ciangun Cing Khup in : “Nga nong man uhia ?” ci-in a dot leh Ngam Bawm in “Bang nga i man dia, taang dung khawngah nga ki beng hi ven” cihsan hi. Cing Khup in bawmtaw a et leh mauteh bang zah hiam khat mu a, “Nga tawm nong pua mah ve leh, Koi hong em pah dih ning” ci-in mei a honh em leh ngasa bangin a puak hi. Ngam Bawm in a em ciangin lah mauteh keu mah bangin a kangtum vut-vut mai hi. Misi khua ate’ a dingin mauteh pen ngasa ahi mai hi.

Nikhat sabeng dingin a kuan kik leuleu uh hi. Lunggam leh tangngol khawng peuh man uh a,a zawng luailuai uhi. Amau a dingin tuate pen vompi leh sahang ahi hi. Sa huan uh a,khindangah a hang uh hi,salute kong biang leh bangah a suang uhi.

A tawpna ciangin Cing Khup in “Ki-it kingai mahmah ta lehang, omkhawm thei nai mahmah lo hi hang. Inlamah va paiphot inla, na voktal va go in, asa na nek zawh ciangin lupna tung bichingah teipi leh siat inla, anuai sanah lum in “ci-in a hilh khit ciangin Ngam Bawm a paisak hi. Ngam Bawm zong ciah pah  a, Cing Khup’ gen bangin a hih pah takpi hi. Lupna tung a alup laitakin Cing Khup’ kha musi-in va lengin teipi va bot khia aa, a dip sun letin, Ngam Bawm si hi. A sihphetin akha uh ki gawmkhawmin misi khua a tung pah uhi.

 Telhawng a inn kilamte Ngam Bawm in thupi sa lua a, “Hiai innte kua lam ahia? Ci-in a dot ciangin Cing Khup in, “Tuma nong pai lai a nangma nong lamsak a vele, manghilh khin ta na hi maw?’ ci-in Cing Khup in nuikawmin a dawng hi. Tua bangin leitungah ki it kingai mahmah ta le uh deih bangin a omkhawm thei ngeilo uh hi mah ta leh, misi khua-ah bel nuamsa takin tawpni neilo-in a omkhawm thei ta uh hi.