Krismas Kuan Aizawl

Internal Audit Team in audit a hong nei ua, Auditorte Guwahati a kipan ahi uhi. Ka company ua sem Ms Aneng, Dr. Lamkhanpau lawinu in Mizo X-mas la leh Gospel album bangzah hiam hon ngaihtuah sak inla auditorte hon pawsak in chi'n hon thukhaka, office naute va sawl dingin lah a leisiam kei kha ding uh ka chisima, auditorte pawtsanna lemchang chi in keimah va pai mai ding chi'n sunma lam in office nusia in Music CD lei dingin ka va pawt khia hi.

pic source: http://lawrkhawm.com/

Krismas dek chiangin Aizawl ah "Krismas Bazar" Aizawl khosung leh mun tuamtuam apan hong paikhawm mi atam thei mahmah a, motor toh abang lou teng toh kiphu nuaihnuaih mai sek hi. Tukum Congress sorkalin mipi khualna chi'n bazar kaite thovenna dingin Dec 21 apan Dec 24 tan Zodin Square leh Chanmari kikal No Vehicle Zone in a puang ua, hiai munte kal ah kuama'n motor a  zatlouh ding a chi uhi. Chanmari a Hrangbana College kong ah Traffic Policete a duty ua Zarkawt lam zuan motor lutsak lou hih tuak uhi.

Kava pawt leh Zarkawt phei main road khong ah motor khat leng ana omkei taktaka :), mipi bel a phulin a phul khe mai hi. Nupi, papi, nungak, tangval, naupang mi chiteng muh ding a om ahipen mai. Nungak nalh mohlou pipi bang leng a om tham hi, va chih din lah papi a kihih manin a chih ut huai chiah kei. Nupi khenkhat senga maiteh leh anteh tuamtuam paw kawikawi a mi dawr khonga luta zuak bang a om hi. A khente  lah lamlian a tutphah a tuin nilum a awi ua, naupang khenkhat lah tricycle a tuangin lamlian ah lungmuang takin a tai ziahziah mai uhi. Aizawl ngeina chu a bang kei khop mai. A batpen hi a ka theih chu nidanga singtanga pawltak awllen laia nasep ding om khollou a kuapeuh holiday mood a om a kholai khonga nisalum awia a om neinai khong toh ka teh pen mai.

Kholai omdan gen ding a tam mahmah ding. Hilele ki genseng man di le ahi keia, camera bang tawikha in lim kila leh lim khat lel in le thil tampi genchiang mai leh kilawm kasa hi. Lah ka tawikha si kei a. Millenium Center pelin Civil Hospital geia City Bus Stand phakma lamkhanga Purple dawr ah ka va lut a, Mizo Music VDO - Krismas Album khat leh Gospel Collection nih ka keia. A mun a test ding ka chih leh a testna ding a neikei ua, huchi'n ka lei top maia, a hoih na ngial diam ah. Office a paikik in Auditorte ka pia hi.

Akhai! a beithei kei kha di. Hiaizah gelh mai ni.