KAWLGAM

Zomite Kawlgam leh Vaigam khong ah i om i chi mai sek hi. Hiai ah Kawlgam i chih Burma i chihna ahi a, Vaigam i chih India i chihna ahi chih i thei chiat hi. Hiai i zatdan ah ngaihtuah ngai zek om maithei hi. India a omte in Kawlgam a chih chiang un a poikei a, huchimah bangin Burma a omte in Vaigam a chih chiangun bangmah a poina a om kei hi.

India a om Zomite’n India gam pen Vaigam chi khollou uhi. Kawlgam Zomite in bel Burma genna in Kawlgam chih mah zang mai sek uhi. Hiai Kawlgam a chih mai uhi zatdan hoihpen a diam chih ngaihtuah ngai om leh kilawm hi. Kawlgam i chih chiangin ngaihtuahna ah bang a hong lut a? Kawlte gam, Zomite hiam Chinte  hiam, Karente hiam gam hilou a Kawlte gam chihna ngaihtuahna ah a hong lut thei hi. Kawlgam i chihchih chiangin Chin State (Zogam) Burma gam sunga om pen leng Kawlte piakbawla Kawlte gam ahi i chihna a hong bang thei dek hi. Ki neitu sakloua, mi piakbawla ki daang koihna kammal hileh kilawm hi. Kawlgam chih zangzang le i lungsim ah, khangsawnte lungsim ah ei gam hilou ahi chih a chii tuhtuh i hihna a om thei diam?

Mailam a Zogam a tuam mawngmawng nei ding, kawlte nuaia omlou a suakta gam hi ding chih lamen a tua Burma gammi dana le kikoih lou zozen a, Kawlgam chih zang i hih lebel thutuam. Zogam hong pian ding lametna toh zang hi ding i hih manin. Huchi ahihkei leh i gam mi va piakbawl kha i hih ding lauhhuai abang thei hi.