KIHOUNA LAM LEH EITE

I Laisiangthou in lei, mei toh na teh hial in zatsiam ding ahihdan nasa takin gena, i pupate bang in lah kamsiam in siallei a sang a na chi zozen zel uhi. Taksan louh vual ahi kei. Mihing i pau chiangin awbawm apan ging i bawl pen i lei in gennei dingin na gingsak zel hi a chi uh. Huai ging pen kampau i chi thei ding. Kampau pen mihing khat-le-khat kitheihsiamna ding, ngaihtuahna leh omdan (kammal zat mai ding ka thei kei, feeling cihna a ka zat ahi) kihilh, kitheihtuahna dinga a kihouna (communication) poimoh mahmah ahih manin ngaih poimoh a siam leng sawm ding a kiphamoh ana hi law ngut hi.

Mihing khat-le-khat kihoutheihlouhna, kingeihlouhna i chihte kampau zat pilvanlouh leh kihoudan siamlouh ziak khong le ahi thei tham hi. Kamtawm ziak hiam ngaihtuahlou a pau ziak khongin le mihing kitheihsiamlouhna leh kingeihlouhna piang thei hi. I kampau in a pautu hong deng kik a hon sukbuai thei hun a om hi. I pau (dialect) bang le tulai khovel a zat dinga poimohte kidaihlou, a hun leh a muna zat ding lem geihgeih kichinglou a relationship fuh sak zou lou leng hikha thei hi. Sapte khong in I LOVE YOU chih nungak leh tangval kal kia a zanglou in inkuan sung, nu/pa  leh ta, ta leh nu/pa, unau kal khong ah hahzat in a ki itna uh taklang in relationship hoih nei thei uhi. Ei lak ah bel nungak leh tangval kingaite zat ding kia a koihna tan a om abang. Inkuan sung khong ah va zang dek lele a kammal ding lem hetlou hileh kilawm maimah hi.

Tua i gente in relationship hoihtak neihna dingin kihou siam, kampau zat siam ban ah i pau mahmah leng a ki ningchin a poimoh chih a taklang thei ding. Kampau zat, kihouna lam gen suk belbual mai ding i hi a, gelhchianglouhte a simtute’n ana simsiam uh kul mai kha ding hi  Abang-abang  hileh anuai a kihouna hou chikchikte en sin phot ni.

Kihouna masapen Aizawl apan Silchar lam manoh a pai mi khatin Sihphir khua, lamgei dawr  a kuva va leisawm dan ahi.

  Koi maw na kuva uh cheng sawm man hon pe dih ua.

  Agah khehsa neilou hive ung aw Pu.

  Hon kheh tawm mai ve ua leh.

  Lampai lai na hi ua, na ngak sawt law kha ding ua hon ngak dah mai un. Tutung chu hon

  theisiam unla, na hong pai nawn chiang un na hong leisak ding un aw.

  Awle. Mundang ah kana lei mai ding uh chu.

  Ahihleh tluang takin na pai un aw.

  Hi hen aw.

Sihphir apan a tai zel ua, Zanlawn kiang lak a lampi kawchik tak, lamkawi munkhat ah motor dang khat toh ki maituah thut uhi. Motor brake man tuaka khol man uh ahihmanin kiphukha lou deuh uhi. Hattai sim kisa tuak uh hiven, a lungsim uah nang le na hattai deuh a eive kichi tuak in a ki en ua, gen ding thei zaw sam a om kei uhi.

Huchih lai takin khat in:  “Koi a pai ding na hi ua?” chin a donga.

Khatpen in “Silchar a pai ding hive ung aw” ci in a motor uh back zek tuaka kipelin mangpha kikhak kawmin kikhenta uhi. 

Kihouna masapen ah dawr ngaknu in “Kuva ka nei kei uh” chih tana dawng lel in kichaisak thei napi, a theihngeilouh himahleh a leidekpa  mi poimoh mahmah danin a houpih a, Pu bang chi zozen hi. Huai kia hilou in lamsau pai ding ahihman ua, a kuva kheh uh ngaksak leh aman zekai sak kha ding chi in a leidektupa a ngaih poimohna a kampau ah langsak hi. Huai kia hilou in ama a ding leng khualin a pai nawn khak chiang ua lei sak dingin ngen zaw  lai hi. Huaitan a hunsak louin a paina ua lamzang taka pai ding a deihsakna vai khak nalai hi. Kuva leidek pan a pai khak nawn chiangin a lem leh va leisak ngei dingin a gintak huai hi. Aziak, dawr ngaknu in amah ngai poimoh mahmah dan a pau ahihman ahi.

Kihouna a nihna pen ah vai lungsim pua a ‘Nang mohzaw na hi’ chi a kingoh a kinak ek theih dinmun ahi tham hi. Na hattai lua ahiam, lamkawi ah horn na meek kei chi a kingohtuah theih ahihban ah khatin khat muniam zaw a  mohsa dana gari hek pilvang dinga vaikhak theih dinmun ahi nawn hi. A lungsim ua huailam ngaihtuah thou mahle uh a takin huaidan a kihou louin, koi a pai ding chia kidongin, kinuihsan kawmin hoihtakin ki mangpha mai zaw uhi. Theihngeilouh toh kinak a heh leh lungsim nuamlou a om sangin hoih zaw tham hi.

Mi toh kitheisiam leh kilemtaka omna dingin i ki hou chiangin kampau hoihtak a zat a ngai chih i thei tek hi. Huai dingin a kihou, mihingte a sung lam apan le a dik a ngaihna a om nawn hi. Angaihna om hiphet louin a poimoh pen hi zaw lai kha ding hi. Tungnung zaw a  kikoiha chapou leh kideihkhop takin mi houpih le i houpihdan ah kilang khe pah in i houpihte in na theipah uhi. Kingainiam law zozen hiam zum lua hiam in i gen ding a kilawmte genthei kei zel le i houpihte’n thei law mahmah zel in hon simmoh thei uhi. Kei ka dik a nang na dikkei hiam kei ka fel a nang na gina kei chih lungput  toh mi houpih le i houpihten nak theih law zel uhi. Huchi khonga kihouna ah relationship hoih ngeilou in kingeihlouhna leh kinakna khong piang zaw hi.

Kampau hoihtaka zattheihna dingin mihing sunglam apan a dik a ngaih banah kamsiam, gendan siam leng kul tham hi. Khoneu, mun neuchik a khangkhia a mi tuamtuam/tampi  toh interaction neikhaloute in mimal a kitheihsiamna hau zaw mahle uh kampau lam ah khopi a khangliante sangin bah zaw deuh kha thei uhi. Zosuante lak bangah le atangpi a etin mihng tam deuhna, khopi lian deuh omna Mizoram a khangkhete leh mundang mi tawm deuhna a khangkhete kampau a zatsiam dan leh kihoudan kikhe deuh bang hi. Mizoram ah thubuai, labuai nei a genkhawm ki houlem theilou ding dinmun ahih a kampau gum deuh khong a kizatkhum khak chiang un leng kampha in le hon houkei uh chi in vui thei lai uhi. Mihing tamdeuhna ah a pau mah leng kiching leh kidaih deuh in relationship hoihna dinga zat ding kampau kilawm tamzaw in kihoudan leng lem zaw tangpi hi. 

Vaite’n nang chihna ding kammal AAP leh TU/TUM chih khong a neih teltul man un vaipau i zat leh a changin a buaihuai ton a om hi. Ei pau ah bel NANG chih ahi mai a, a lian a neu, ki musit, ki zah chia a kaihkawi theih ding omlou in tang mahmah hi. I society ah anniam, ansang omlou chihna leng ahi pah hi. Ahihhang in tulai khovel a relationship a fuh zawkna zattheih ding i pau a ki ningching lou, phuahbeh ngai bel a om ding in a ginhuai hi. I gam a govt. office hiam mission office hiam eipau mah zattheihnate i tungate bang chi sap i diam ah ka thei khol kei. Kuahiam eipau a pau mah, SIR va chihchih bang le nuam kisa chiahlou a batna om ahihmanin. Mizoramte’n bel PU chi mai in pai ziahziah thei lel hi.

Pu i gen leh, vaigam/kawlgam khonga na i sepna ah i tungate houpihna ah SIR, SIR, SIR mah chi tam zou le ma vang zaw ding hi. Mel kimu a kihou chiang hiam, phone a kihou chiang hiamin Yes chih taang bangin SIR zang zou zaw le, i tungate ego kap fuh kha zaw in  relationship hoihzaw thei ding hi. Omdan leh maipha zon khong i siamlouh kia hilou in Sir chih bang haksa sak a sa kenkon a om khak nilouh theih khat hi vial in chin. Sir chih haksa sak kia hilouin, nasepna a haksatna i neih ahiam, i sephoih ahiam, entitlement I muh ding ngoihngoih khong le  va gengen nuam khollou pawl ki hi sim mawk hi. Eimi tengteng a siamkei chi i hikei, a siam mahmah leng I om tham ding. Atangpi a bah deuh I batna gen i hi zaw.

Tulai khovel a i mavan zawk semna ding leh khosuahna dingin a tamzawte’n tua i gen verbal communication lam kia hilou in, non verbal communication leh body language ah leng zil ding tampi ki nei dingin a ginhuai. Vaite khongin a muk, a mit, a lu, a mai, a khut etc uh zangin paulou in thu bangzah a gen thei ding uam?