LAI GELH DING

GAM LEH nam khantouhna ding, i gam bawlhoihna ding, khotang hoihna ding chih khongin i vei leh awlmohte kuapeuh in i gelh souhsouh hi. Thugelh bangchituk in hoih in simnop mahmah lele pulpit a Pasianthu gensiam mahmah khatin thu gen a, a ngaikhete’n le nuamsa mahmah uh, himahleh a taka zui khuk om tuanlou chih bangin a i laigelhte in a taka nasem tuanlou a a phattuamna gen ding omlou a diam chih theih dek ton om hi. Huchi dinmun ah laigelhte’n gelhgelh lai ding a ding uam chih theih dek mawk hi.

 

Laigelh i chih zenzen, a simtute’n a simlai ua simnop asak ua, ana phattuampih ban uah gelhtute inle a gelhfuh u leh lungkimna a neihban uah gelhsiamna uh miteng in a theihloh un a minthan loh thei uhi. Huai phetlou in a sihnung dong un a min uh mang nawnlou ding khopin a laigelh un a khang akhang in na sem tou thei zomah hi. Shakespeare te khongin lai nasa takin ana gelh kei le uh tuni in i khovel bang a chi de aw chih khong ngaihtuah maimai le. Laigelhsiamte' a mau damsunga a sumtang a nasa taka lawkpihlou bangle a sihnung khong ua a tta atute un lawkpih mahmah chih bang a om thei lai tham ding chi phet le. I baibul bang le laibu danin en zual le, kum bangzah mi ana zoua, gam la ahia, mailam ah bangtan huchia paitou lai ding ahia chih khong ki suut bunlou hi.,Laigelh thei leh a gelhna ding hun neite’n hoihtak leh uluk takin a tamseem hon gelh toutou le uh a hoih ding.

Nidangin eilak ah laigelhte in laibu a bawl zoh kei uleh a phoukhiakna ding SSPP Magazine, YPA Magazine, Vengsung Magazine chih khong bak a om kei sim hi. Tuni in bel huchi ahi nawn zenzen kei a, lampi a tam mahmahta. Laibu i bawlzoh keia, Magazine khong, newspapers khonga i suah theih kei lele a phoukhiakna ding website khong a dimin a om a, mimal inle blog khong a bawl theih a, a koihna ding, a suahna ding a lungkham huai het kei. A awlsam in a baihlam mahmahta.

Gelh ding leng a tam mahmah. Eipawl laigelhte atangpi in Pasianthu, khotang vai,  khantouhna ding, politics chih khong ahi deuh abang.  Subject i gelh ngeilouh, nidanga i ngaihtuah ngeilouh gelh ding a dimin dim lai hi. Subject ei laka mi gelh sasa khong i gelhnop lele gelhdan tuam, idea tuam deuh zanga gelhdan chih khong le a hih dingdan a tam mahmah ding. Love story hoihtak ei social setting/background zanga gelh chih bang le om nai manglou hilou maw. Play/drama khong leh poetry lam bang le a gelh ki tawm mahmah lai hi. I MIL khong ua zat dia a gelhtawm zokte uh chihlouh a dang bangzah a ki gelh dia?

Gelh ding tam lua, gelh bei zoh ngei ding hilou hi. A gelhthei liai in laigelh kisiak in a gelh in gelh ni. I pau, i ham, i lai khong kepbit mai hilou a thansak i utleh  mi simnop ding lai gelh tam ding ahi mai.

Tuni chu laigelh dia chialpina hon bawl ek mawk dan ka'ih chu. :)