LIANSEN’ NGAIH, EH!

Kha bangzah hiam paita in 2010 kum Malaysia a  Zomi National Day (a banner ua a kitak dan) lopna a lasakna youtube ah ka maikhe kha a, net speed hoih gige lou online a ngaih buaihuai chia ban download a ka ngaih leh khat Liansen in Gam Leh Minam  Tawi Sang Ve Ni, a sak ana hi a. Tangvalnou khat, Biak Tung toh tu zihziah kawma unplugged music a asak uh ahi hi. Hiai la a sakdan tuam hiauhiau in Lengtongte’ (Lia Leh Taangte Lengtong-II a) sak valval sangin hoihzaw sa in hon hip sim pah abang mawk hi.

 Lengtong te sak

La a hoih khollou i chih le a sate’n a saksiam ua a zutmam siam u leh hong hoih mai abang hi.  S.Chingnu in a album Senchil Tongsan a “Mimbang Pianna Vangkhua” chih la a sak hiauhiau bang nak hoih mahmah napi a phuaktu (hi dinga ka gintak) Howard Chin Khen Mang in 1960’s a radio Burma Broadcasting Service, Rangoon a akhum bang a hun laia hoih hikha mahleh tuni a ngaih in huchi  hoih lawtellou bang hi. Mizoram lasiamte’n a laluite uh tulai music toh hoihtaka a hon sak chiang un hoih thei lua hi.  I lasiamte’n lathak hoih taktak a phuah, a sak ban u’ah laluite a tamtheipen zon khawma hoihtaka sak hon sawm le uh.

 Gam leh Minam chih la hoihtaka k’on ngaih chiangin ka tangvalnou lai,  Dorcas Team album masa Topa Phat Ni a release tung lai ua, huai album a Liansen lasakte ka na haichilh pih sim lam tak ka phawk a, tate khongin Westlife, Korean bands khong hon haichilh sim chiang ua khemkhem i sak sim khong ei hun a le ana ki huchi thei mah ahi chih bang hon phawksak hi. Rosanglian pen India lam Zorock hileh Burma lam Zorock chih theih phial dinga ka gintak Go Lian in a album masa Nong Leibat a Nunlui leh Sanlui chih la-a a zawlluinu ngai lah hizen pi, sanlui ngai ka hikei, nunlui ngai ka hi zaw chia a sak hianhian bang phawk huai dek zozen. 

Nunlui Leh Sanlui

# Singdang englou guallai sawl bang hei in

Va bang lengkhawm uh lungtuak in, simthu i lel

Thangvan sanga zawl Ching Ngambawm zilin

Sinlai kaidang lou ding simthu i chiam

## Kum kha leh nite hong ki khelkhel in

Kumkhen zangvai vate hong khuang khuangta e ngaih

Zangvai vanlia sinlai kaidang sak hiam, na min

Thei bang lou leng kei an sanlui

                Lungzuang huiva bang ka maumau a

                Deihsial lawkta bang ka tautau hang

                Sanlui ngai in sawl bang ka vullou

                Nunlui sial sawl bang in ka vul

### Zanchiang zalmang pha manin maw sanlui

Na tullou zong khaubang chiah aw, na zua saulim

Luaichiang ah sung gilkial luankhi gial bang kia e

Na vontawi luankhi va nul aw.

Mihing in hunlui ngaih vungvung hun om ahi ngei ding, hunlui ngaia lungleng thei diak bang le om hih tuak hi. Huchia lunglengtheite’n la bang phuaksiam deuh uh a de aw chihsim in a om hi. Aizawla ukil khat, mi diktat mahmah dana minthang K.L. Liana in thil diklou asakte khong local news a agelh gelh leh Mizoram judiciary state sorkal nuai a om chihmah tak sorkar in Lunglei ah transfer daih uh achi uhi.  Lunglei a akisuan ma khong in a adiaka khapi hoihtaka a hong tan chiang bangin a lunglen thu khong teng mah Aizawl newspaper ah a gelh sek  hi. Ahihhangin laphuah siamlou a diam, a laphuah lam ki thei khollou  hi. Zosuante lak ah Mizoramte lungleng  deuh uh ahia, a gen siam uh ahia a thu hi’in a la ah hitaleh lunglen nak gen deuh uh abang. Zawllui ngaih ziaka lungleng hituanlou a khotang lunglen chih bang le a gen tam uh. A ki-it, aki-ngai teng lah kiteng kimlou ahihmanin khovel ah nunlui leh sanlui  ngai a lungleng  tampi om dan hih tuak hi. Lehlam ah, huchi bang khong a om ziaka tangthu hoih taktak leh la hoih taktak khong hong piangkhia le ahi zel hi.

Nunlui leh Sanlui la i gen hangin Liansen pen kei a dingin sanlui va chih theih ding vual hilou hi. Go Lian banga sanlui ngai dan in non na koih kha maimah di uah! Himahleh, kon chi di, huai lai in a aw a hoih leh unique banah a lasakte kaihdan a koilai hiam khong a hon hih euh na khong omte tuam deuh leh CIAL deuh bik in mi bun deuh hi in ka theia, ka ngai chim theikei hi. A aw i zak chiang in ngaih leh khum sa in amah Liansen bang ngaihhuai zou hial hileh kilawm hi. Tulai dana music VDO, TV khonga la ngaih kawma a sate i muhtheih dan hilou, a mel le mulou pi, a aw zaka ngaih(zawng) chih omthei mah a diam ah… A mel mulou chile. 1980 laka a unau ua (Dorcas Team) Lamka a a hongzin lai ua Lamka fileld geia Convention biakin a nitak khat a lasak uh lawmpa Dongkhoson te lawi toh kava gal-et kha ua, biakin sung a tutna omlou ahihmanin la a sak chiang ua muhtheihna ding tohlet khonga taikual a ki en ahihmanin a mel uh le hoihtakin a kimuthei keia, a kuapen Liansen hiam chihle ka thei tum kei. A boss deuh nana na Cing San chu a ki thei mai a.

Ka lawmpa Dongkhoson min ka loh leh tunai zeka hon na paisanta ahi chih fb group khat ah ka simkha a, poi kasa in ka lungleng mahmah hi. Pawl sawm zoh nungin contact nei nawnkei mahle ung High School kailai a ka kithuah dan uh, Chapel Lane a gang Piangzathangte in khang lam ka luahlai ua ka inneinu un “phim leh khau bang” hon chih zozen in ka kithuahtheih dan uh genchiang mai ding. Kaihlam khosuak, apa Pa Nekkhopau, VLW in Chapel Lane a inn ana lama huai a teng, kei sanga Lamka a kum khat a senior zaw himahleh Lamka khosung mi lawm pawlh ding nei khollou khat ana hi diam ah, ahihkeileh Kaihlam leh Mualkui kho-kinai ahihna a ki ngaina deuh ka hi di uam, ka ki thuah thei mahmah ua, school kaikhawm, vengkhat a teng khawm ka hihna uah zan a ihmut kal chihlouh  kithuah den ka hi sim mai uhi. Lawmpa toh hunlui gen ding tampi a om ding. Nungak lam ah keisanga ana advance zaw ahihna ah a nungakte ka va heel lai khong uh, Lamka lam apan kuamahin music album bawl nailou ahihmana kawlgam lam apan agape album thak khong a hong pawt chianga a inkongpa phamsa Pu Goihzathang a lei dinga va convince ka sawm dante khong uh, anu siam gat ding design graph paper a ka bawllaite khong uh leh thil dang tampi gen ding om mahleh huaite va gen vek theih ahi kei dinga, ka lawmpa ka phawk leh ka sun mana kon genlut mai ahi. A sihni bangin le ka phone number khong thei le uh pa Pau te nupa leh a zi Nianggou in hon hilh nuam sam ding un kana gingta hi. A kuapeuh pai ni nei chiat ding i hihmanin lawmpa ana pai masa ahi maia, hiai ah mangpha ka khak mai ding. Mangpha maw Lawm.  Songkhan Paul toh chu kimuta ding nei ve ua maw... 

Lawmpa thu i gen leh a mood a hong tuam deka, i thugen ah lutkik sawmta ni. Dorcas Teamte album i gen pen ah la dangte sangin Lian Sen lasak  Sian Vontawi leh Ithuai Ei Lawm chih gel hoih kasa diak hi. Hiai late kua phuah ahiam theilou ka hihmanin a thei di aka gintak, fb a Na Ci Se Hia group a ka muhkhak, Sower Sisters te laka Kim Deih Mang ka dot leh aman le na theilou in “Ka nu Sen-te lasak lai kei suak nailo. Ka nu Sen hong dong ning maw” a hon chi a. Anu Sen le Malysia a om ahihdan khong leh facebook khong zanglou ahihdan khong le ka thei hi.  A laphuaktu dot ding ah Kim Deih Mang mah a ka kingak a ngai hi. A lathu gelh khe sin ni.

SIAN VONTAWI  pen kua phuah a diam ah, Eklejiasti 11 na a pansan a tuailai thahat lai hun a Pathian na sep ding chih lampang ahi. Apa phuah khong a diam peuh ka chi mawkmawk a. Laphuahsiamte’n hi a utut uh la in a phuak thei mai ua, amau ngaihtuahna a hong kipan hilou, laisiangthou a utna munmun khong uh pansan bangin le la ngaih leh kilawm tak bang a bawlkhe thei thei mai sek uhi.

Sian vontawi lia leh tang, banzal ziatsuan kilenin

Tuailai zaitha i neihlai Sianmang a ding nasem ni

Khosung huging a daihma, ansuk gingte kizak lai

Thasial ken hunhoih lai Sianmang a ding nasem ni

                Khangnou thahat i hih lai, Toupa a ding semkei leng

                Lungkham mei bang hong kaai ni chiang

                Nuntakna nuamsa kei ing, Tuailai nite ngai zen sing

                Na chihma, hun hoihlai, thasial ken, Sianmang a ding na sem ni

Leitung hinna pakpalh bang tomnou khit chiang hong vul ding

Pheiphung suankha i om ma Sianmang a ding na semni

Hun le ni’n mual a liam ma, Sepna nite a tan lai

Thasial ken, hun hoih lai, Sianmang a ding na sem ni

Ahi nguta, mihing a dingin tuailai thahat lai hi hun hoih pen leh hun manpha pen ahi. Tuailai hun zangsiamte a hinkhua uh nuamsa ahi mai ua. Pathian in le hiai hun in hon deiha, Pathian nasep kia hilou in khovel, eimah a dinga le nasep hun hoihpen ahi. India gam a sorkal office-te khong en le, nasemte a tamzaw tuailai hi nawnlou a upa lam ahi mai ding. Huchibang office ah nna a pai hat kei in a buaihuai mahmah hi. Sorkar in retirement kum khong bang le su tawm henla, sepaihte pension hun dan khongin hih mai-in kum tengin tuailai thahatte recruitment bawl ziahziah leh productive zaw ding hi. A productive zawk leh pensioner tam lele pension piakzohlouh chih omlou ding hi. Hileh, tuailai sepna muthakte a thahat lai ban uah a lungsim uh le siangthou lai ahihmanin a hoihlam a makaih a nasep sak theih ding ahih chiangin corruption i chihchih khong ule hong tawm zaw lai ding hi. Huchi hileh Anna Hazare bang le ngailou ding pi hikha ding hi. 

Liansen lasak a nihna, ITHUAI EI LAWM  pen Jesu in mihingte a itluat mana a van munnuam nuse zena hong paia a hong tatna theilou mi tampite awlmohna la a chih theih ding. Hiai le a phuaktu ka thei kei.

1. Sihna khuk lamzuan ding ka tate ka itluat man

Ka van mun nuam nusia’n ka tatkhiatsa

Ka it mi tampite khongaih huai

Sihna hanmual a liamta hi

Ulenau tampi te sihna gam sung ah

Zatam mual liamta en vaw lawm

Va kha khia ni, Amau hinna ithuai ei lawm

2. Toupan tua tangthu gen ding hongs awl napi in

Banghang in gupna thu genkhia lou ding

Topa’ it mite khongaih huai

Sihna hanmual a liamta hi

3. Lamet neilou mi kiang Toupa min va thangsak ni

Toupa leh a gam a ding kipia ni

Jesu sisan in deidan nei lou

Vantung inn ah hong chiah kim un chi

Hiai la pen zaw a paid missionary/evangelist deuhte gen di'a koih ding chih din lah “.. pai un la thilsiam tengteng kiangah Tanchin Hoih hilh un..” chih in hon huam kha zel abang a. Toupa leh a gam a dinga kipiak a tangthu hoih gengen ding i mohpuakna ahi chihna ahi pen mai ding.

 College kailai 1983/1984 laka Shillong a ka mess zopna uh (annekna) Hmarte, ICI saptuam hive un, Dorcas Team-te toh saptuam kibang ana hihkha uh ahihtuak a, gintaklouhpi in i album gen pen ana nei uhi. National Panasonic tape hiam khat a nei ua, sound box lianpi nih toh thuah a hon play chiang un a ging bang nuam kisa mahmah hi. Amau kianga  anne a tamzaw Paite a kihih manin ann i va nek chiangin Khasi veng ah ngaih huntawk takin Dorcas Team te la ki play seka, nuam kisa thei mahmah hi. A music lah sapte a toh kibang mai ahihna ah khotualte (Khasite) inveng a teng a ana zaphate bang in le hoihsa mahmah ding ua gintak sim in a om hi. Liansen sakte bang a hong hih chiang a chu, nuam himai! Huailai in lasak siam kasak leh a aw CIAL kasak dan khong amah Liansen bang hilh ka ut mahmah a, lai khak ding ka chih chiangin lah a address di ki theilou zel hi. Dot ding lah kuamah kithei tuanlou zel. Himahleh address ding a Tedim, Burma chi top mai kizang leh tungthou ding a gintakna khat ka nei hi. A lai ding bangle gelh hi in ka kithei hi. A aw ana ngaizawng sim a lai khak nuam le houh a ki hi zaw diam ah. 

Ka ngaihtuah kik chiangin khak ka hi hia khaklou chih ka chiang nawnkei a, khak hial lou hi in ka ki thei hi. Tulai khong hileh zaw  internet apan ki contact dan om kha ding hiven. 

[Silchar, October 2011]