Pi Witty-te Khua Ah..

Pune a zinna ding lemchang sepna-te’n 2008 hiamin hon bawlsak mahle uh ka zin keia, tukum in lemchang dang khat a hon bawlsak nawn uh March 2011 a  hon hilh chiangun  Pathianin lem a sak nak leh tutung chu zinta ding chi’n lungsim in ka kisa khol pah hi. Zinna pen sepna lam toh kisai-a training himahleh huailam gen i sawm kei zaw dinga, ZOL khong leh eilam gimnam in gelh zaw le chidan i hi. Amun khong a theinuam a om zenzen lelah www.niapune.com ah ana en mai le uh i chi ding. 

Abul chih di a diam, Silchar ah pan suk le. Silchar apan ka tanunu toh Sumo a tuangsukin Shillong khomui in ka tung ua, inn ah zankhat ka giak in a zingin Guwahati a paisuk in zankhat ka giak nawn hi. Guwahati a pan-a Mumbai tan lawmpa khat toh leng ding in Mumbai  pana taxi a Pune pai ding ka chihdan uh hiven. Tulai Guwahati Airport a pan-a khualzinte theih dinga poimoh omzek hi-in ka theia, hiai lak kon gen kual zual ding. Indian Economic Reforms lohchinna kilatna khat ahi ngei dinga, kum bangzah hiam paita apanin India gam sung munteng ah lenna tuang ding mi apung nasa mahmah abang hi. Guwahati airport bangle nidanga lian lua i sak leh a neu lam, khualzinte dawl zoulou lam hihtuak simta hi. Lenna a boh leh a kipankhia tam ahihmanin  tulai-in Guwahati Airport a lun in a rush thei mahmah hi. Hiai apan a khualzin dingte kuanbaih sawm ngeingei ding chi ahi.

 

Security Check ah a buaihuai diak hi. Lenna pai ding teng security check a hih khawm neinoi vek mai ua, a nokin hun tam ala mahmah sek hi. A huai kawmkal ah a check tute bang ki strict sakin hun a ren hetkei ua, i sakhau a sum i kuah nangawn hon lakkhiak sak sek uhi. Lehlam ah amau lah ana uh diktat tak, ginomtak leh hoihtaka sem a kichi thei zel ding ua, va pawng mohsak theih ahi kei zel. Huai kia hilou kuate hiamin amau sepna airport a kipankhia lenna bang ana hijack zenzen leh a moh amau puak ding ahihna omzel hi. 

Rush lua ahih thei in koule 2:30 pm flight himahleh sun dak 12 ma in Guwahati ka nusia ua,  Airport ka tun takun Security a lutding line guulpi kivial kawi ngeingawi  banga sau-in Airport sungteng ana dim mai hi. Check-in ngal in security lutna line a nunungpen ah ka ki vual phei pah uhi. Ka Boarding card tawi uh mu ahi ua, check-in na apan hon delh uh ahia  Spicejet nungakte’n hon vil pah ua, “Lenna bohkhin, a line bullam deuh ah hong kihen un” hong chipah uhi. “Ee.. Huchi thei ding maw” chia ka paikhiak ngal uleh midang muhdia kisuanglah deuh uh a diam ah nungak dang khat hong pai nawn in, “Na omna mah uah ana omlai phot un” hon chih nawn chiangin ka ki line na mun mah uah kava lutkik ngal uhi. 

Airport lutchilna gei-a line kual saupi ka paikhit un Security omna lam ka naih deuh simta ua, hilele lutna ding a gamla lai mahmah hi. Ka na etvel danin Spicejet nungak hong vakkualte’n a gukin amau pasengerte a hong samkhe zeuhzeuh uh hi in ka theia, kou lah a hong sam nawnta kei uhi. Atawpa khat ka boarding card kana lah cheuh leh ka gei naichik, ki kiss phakna ding a hong dingin, “Huai ah security nai deuh lamah va ki hengu mai un” a hon chi a, koule line apan taikhe pah in ka lawmpa a koilai hiam a direct-a a va kihen sawm leh kuama’n ana awnlou uh hihtuak hi. Kei bel khuambul ah ka ding phota, awl-a naupang deuh khat ma a ka kihenlut leh kuama’n bangmah a genkei vanglak uhi. Huchi in lawmpa le awlin ka ma ah hong ki henlut teita hi.

Hiai ah a kinialnuamte hiam a ngaihtuah peihte a ding khat henlut zual le. I tangval tung lai khonga khovel a thil diklou i muhte ki pomtheilou, diktatlouhna i muhte  ki ngaitheilou, khovel bawlhoih dingdan khong ki ngaihtuah, i bawl hoih zoh kei lele ei chu diktat taka om himhim ding i chih geugaute khong toh tulai khovel hong ki tuak nawnlou bang sim mawk hi. A lenna service lamte le helpless, security apan a thoveng baiha a huna pai theihlouh tawpa le a baih theipen a pai dingdan ngaihtuah a kipei vitvit mai uh hihtuak hi. Amau customer service leh amau airline record a dinga a huntaka departure chih bang le thil poimoh mahmah, a tup lianpi uh khat hizel mawk ahihna ah huchidan a panla uh hi ding hi. Tulai khovel a thil tenga diktatna mah chih geugau di hia ahihkeileh i ngaihdan khong khek zawk ding chih ngaihtuah tham ching khat a hong suak abang hi. 

Huai a ka ki henlut nung un le khau a zanna uh kawi thum hiam ngut a kawi lut ngailai ahihmanin naichik ah om mahle ung lutna ding gamla lai mawk hi. Huchi in nitaklam dak nih bang hong ging dekpahta hi. A line a om a kuapeuh in security check dan system hoihlou chi a phunphun kawmin atawpin ka lutthei khong uhi. Mobile phone khong x-ray na ah a bawm awng kidaihlou ngakzek a ngaih manin lawmpa ana pai masa a, lenna sunga lutsuak ngal hih tuak hi. Security ka clear nunga a sunglam ka zonbawl chiangin ka mukeia, zun va tha-in boarding paina dinga honna ngak Spicejet te bus ah ka tuanga lenna sung ka lut leh lawmpa ana tukhin ka mu hi. Ka tutkhit sawtlou in pilot pu, mikangte, hong dakkhia in a min khong hon gen masa in thil omdan puanna hichi’n hon nei hi:

“Tuni kei heu-in Guwahati apan Agartala, Kolkata, Mumbai pai ding i hi ua, a hun chingta mahleh i lawm khenkhat security a hong tham lai uh ahihmanin leh amau taisan a pai lah i utkeia, i na ngak lai ding ua, na hon theihsiamna uh ka hon ngen hi. I kim phet chiang un i pai ding ua, ka thu don dan un Agartala ah khua a hoiha bangmah haksatna omlouin dakkal kimkhat in Agartala  i tung ding uh”.

 

Dak 3 in ka kipankhe zou ua, a chih bang un dakkal kimkhat in Agartala ka tung uhi. Agartala a kum dingte kum, a hong lut dingte hong lut khit chiangun Kolkata lam zuanin ka lengkhe nawn ua, a puandan un minute 30 mah a tung ding chih himahleh dakkal khat khong nungin ka boh thei pan uhi. Kolkata airport ana awng geihlouh ziaka huaihkhua a timepass hon neihpih man uh ahi. Kolkata apan Mumbai dakkal 3 val a lut nawn hi in ka thei (a hun zah ka na chiamteh kei a).

Pi Witty-te Khua Ah.. II

Union heutute thusiamna in Mumbai a ka office-te uh Guest House book kholh louhin ka tangzou ua, huai ah zan dak 10 lamin ka kinga fel uhi. Ei lam a dingin zan sawtsimta mahleh, huailam ah kuama’n sawt sa nailou abat banah, tulai’ India gam-a zan’ nasem pawl bang tamta ahih chiangin zansawtta chia kisuanlahhuai khollou chi in nitak ann nekkhit in Pi Witty ka phone hi. Dak 11 khong chu ahita dingin ka gingta, amah le a gendanin ana lum nai deklou ahih tuak hi. Paite pau a le khenkhatin paukawi a chih uh Lamzang aw diktaka pi Witty hong pau kaukau i zak leh nuam in Mumbai a om hihlam le a ki theikei dek phial hi. Keuhpu in hon hazat ding thei thou mah leng a zing chianga Pune ka pai dingdan, huaia kimuh dingdan khong ka gen ua, siaka le Delhi a pai nailou, Pune a  omlai ahih dan leh Sauliim, Lamka a ka muh apan inlama omta kasak um le Mumbai a omlai ahih ka theih beh hi. Phalbi laia nau nei dia inlama va pai hilel ahihdan leh Um nu in ZOL taka Pi Witty a sapnou na a “UI” bang chi zozen sek ahih khong ka theih beh nalai hi. 

Pi Witty kianga Um mobile number la a ka call leh zan sawt deuhta a diam ah,  a “U Thang” in hon na dawnga, kua ka hiam chih hon dot chiangin  ken le ZOL taka phualva ka chih leh hon theipah a “Ihmu khinta hiveh aw. Kon phawng diam” a chi a. A lakloh lai ua va phone kha ka hi zenhouh de aw peuh ka chisim thak a. Gen di poimoh lua omle hilou, ihmu khin va phawn zozen pen hi hial dah heh chi-in “Zing chia’h ko’n phone mai ding. Phawng dah in” ka chi hi. A zingchiang a (a dak zah chu genlou ding) ka phone chiangin Um in pickup mahleh a aw ihmutsuah chi lawlai ahihmanin “Bang chi e, thou nailou lai na maw Um?” ka chihleh “Holiday chia thou hak i voi” a chi a, “Huchi ahihleh awlin kihou thak ni” chi in phone ka koih nawn pah hi. Mumbai a phone i gen takin chu keikahi toh le ka ki phone lou tuan kei uhi. 

Mumbai apan Pune dakkal thum khong lel lut ahihleh kinoh loua lunch khit sunnung a  pai ding ka chihdan uh himahleh vuah a nak zuk ziakin ka chihsang un ka paikhe hak zaw  uhi. Ka omna uh Cooperage Road (hia kea thei chiang kei), a pana Pune Taxi ka sap dek u leh a hong pickup man uh extra 500 bang ngai ding a chihman un Dadar a Pune paina munpi lam meter taxi in ka delhtou ua, 117 chauh hon la uhi. Vuah bang lah hong zu tam deuhdeuha, Counter-te a taxi ka dawp chiang un telephone a ka dawpte sang ua sangzaw a gen vek ua, a tawpin “AC le hithou ven, bus in pai suk ni” ka kichita uhi. Counter khat ah bus seat no. 5 leh 6 ka la ua, minute 15 sunga hong tung mai ding a chih uh ka na ngakta uhi. Huchia ka ngak uleh a counter a tu-te lah koilam tung a ding uam a mang vengveng maimah uhi. 

Vah zuk ziak mah ahi diam zun bang a hong suak dek sim abanga, a thakna ding counter kikal munawngte i melh chiangin vaipathian lem a om deuh veka, huai a va thak hial ding kisuanglah deuh ka diam ah atawpin pan dukan khat kiangah “Hiai naia toilet omlou hia?” chia ka dot leh “Huai ah saklam ah va pai le chin” hon chi a, vuah nuai a ka va pai leh zunthak theihna ding mun ka mukei hi. Ka kiknawn chiangin Counter ate hong pai ua, “Huai ah lamgei ah na bus uh a kidohta, va pai un” hon chi uhi. Lawmpa toh ka van tuak uh la in vuah nuai ah ka diang phei ua, gari tamlua ahihmanin lampi ka kan thei zok kei uhi. Lamkan khin bus a ka lutdek chiang un nupi, naupang hon bus kongkhak ah ana taang netnot ua, lutthei zoklou in ki kawt mahmahta hi. Atawpa lutkhin, seat number 5 leh 6 ka zon u leh a Bus Conductor hi awmtak khatin “Seat number 15 malam a awng a omkei”  a hon chi maimah a, huchi ahihleh chia a nunglam a ka pai u leh Lusei nungak seat a piak uh tanglou thou khat ana om tei hi. Bus pawlam a amah hong kha tangval khat toh a kihou ging uh ka zak apan a seat lak tanglou ahih ka thei a  “A nunglam a tut ding himai. Pai ou” chi’n ka sam a, lawmpa toh kou a last line ah ka tu ua, nungaknu pen kou ma geih ah vai nungak khat toh a tu hi. 

Nungaknu toh ka kihou uleh Pune a hotel a sem, Mumbai a Singapore Airlines-te airhostess lakna interview a hong tel, dotna khatna a ke ngal ana hi hi. Dotna khatna vaipau-a amah a ki introduce ding chih aman ahihtheih lam ana hikhalou se ahihmanin pawna mahmah a vaipau bang zilsawm hial dan in a kigen hi. Hiainu pen kum bangzah hiam paita a Aizawl a Gulshan Kumar (ahi hia kha?) toh MNF sorkal in Mizoram’ tuailai tampi India gamthuk lama sepna zonsak ding chia a lakte uh laka ana telkha dan ahi a. Aizawl a in bangzah hiam a training sak khit chiang ua vaigama nasep ding hoihtak muhsak ding chi a nungak leh tangval hunkhop a piikhiak uh hiven, vaigam a tun chiang ua a chiam bang ua nasep ding hoih muhsak lou a, ginalou chikchik, koi hiama security guard khong semsak uh chi a gen-le-sak leh phunna om vengvung ngei khat ahi. 

Huchibang ahihna ah Gulshan Kumar leh Mizoram sorkal nasa taka demna om ahihmanin a sepna khong uah a nuamlou leh haksatna a om hiam chia ka dotleh omlou ahihdan a gen hi. “Numeite a dingin bangmah haksatna a omkei. Accomodation hoihtak hon pia ua, a hoih lua. Pasalte ahihleh accommodation a pe kei ua, a loh ua vaigam a inn hon luah chiang un inluahman  tam ahih chiangin a kidaihkei a, huaiziak ahi pen” a chi hi. Haksa a sak zawk chu a seppih vaite “phakar” thei lua uh leh a sepna uh hotel management in standard maintain utlua kisa a, a vil nakluat zozen pen uh ahi zaw hi. 

Atangpi a genin ei Zosuante’ hi mi/pute mai-et khong kisiamlou banah communication leh mihing deal dan lam khong haksa kisa deuh abanga, atangpi mah a genin Mizoram lamte a siam deuha i neih uh hi lai ding hi. I nna ginom taka sep ringot a i sawm chiangin India gam ah a na hun khollou in bangmah recognition hiam pahtak hiam kiloh khollou sek abang hi. Vaite khongin bel pute maipha mah zongzou in, zah leh kamsiam taka houpih bang siamin leh pute muha nna hoihtaka sem dana oma, a muhlouh kal ua lah seplouh theihdan lampi zong siam mahmah zel, huchia a ma uh vang toutou leh lohching tou zel tadih lai uhi. Nungaknu’n le ginomtak leh tawmngai taka nasep sanga pute hoihtaka zah leh bia dana kilangte mah in pahtakna ngah zaw uh ahihdan khong haksa leh nuamlou a sakpen ana hi zaw hi.

[ aban ka gelh august 2011 a aizawl ka zinlai a ka laptop hong kisia, windows ka load thak leh ka mangsak kha a ]