Alobo, Chi Mai Ni

Tuzing Assam Tribune newspaper ah Assam sorkal in zingchiang (09.03.2012) Holi ziak a suti a puang ahihdan a hong ki gelh ka simkha hi. Kamrup District sung a office teng, financial institution te tel in a suti ding uh chih ahi a, Negotiable Instruments Act nuai a puang uh ahih leh hihlouh a kigelh chiang kei hi. Zing annek khit in mi phone in ka dong zeka, ka dotten NI Act nuai-a a kipuan leh puanlouh a  thei chiang tuan kei uhi. Suti ahileh inlam a taitouh mai  ding, weekend ki zang ngal thei dia inn a ni li bang ki om thei ding chih ahih chianga. Kan chian a NI Act nuai a le suti hi dan a ka theih chiang in kisa zok in inlam ah ka paita hi.

Sun dak 12 ginma deuh a kipan khia, lampi ah gari ana tam kei vanglak a, nitaklam dak 2 lak khong in Shillong lut mah leng Polo a Garo Bazar a singtang meh limchi a omkhak leh chi in huailam ka tawnkual a, inn ka tunin dak 3 bang a gingta hi. Inn a singpi khong  dawn khit in TV etlouhna le sawtta, Assembly election  result bang le ki ngaihsak kha ngeilou, koihiam a lawmte/seppihte toh houlim khak a hon gen chiang ua i va kuptheihlouh luat chiang a hong zumhuai sim bang sek ahihman in tuni chu news en ding chi in TV ka on a, remote apan news channel ka zonna lam ah North East Doordarshan ah Alobo Naga and The band a lasa pa Alobo Naga ana interview na uh ka mekkhe kha hi.  Music theilou, siamlou himahleng lunglut ka hi diam ah, news lam enlou in huai interview ka en zawta hi.

Interview ka et khak atawpna lam hitaleh a kilawm hi. Naupang chik himahleh (a size neu ahi zaw diam zaw thei khang) ka gintak sang in a paudan khong a siam phian vanglak kasa hi. International channel khong-a a kilat khak theihna uh  ziak dotna a dawnna ah mi copy hiam a omsa khong va hihpen siam mahmah lele a siam tamlua ahihman in kuaman hon ngaihsak lou, amau bel amau hihna mah paipih a, huai kawm a North East (Naga) element khong a hel chiang ua huai kha a omsa toh kibatlouhna nei a mi’n ana recognise ua, international channel khong a  kilangpha uh hi ding a akoih dan khong a gen hi. Painted Dreams la ah a thunon a a kikou dan khong Naga  element a hel uh pen a tuamna hi ding a chi hi. Amau music genre pen Modern Progressive Rock hi a, kuahiam director khat hiam in genre dang sa ding in va kun leh huai lam a kihei mawklou a amau genre mah a ginom taka pang a, huai a a om ngeilou (originality) omsak ding leh creative ding  poimoh zaw a sak dan a gen hi. Tua i la gen ah leng Naga music dan in pai le uh kuaman ne khollou ding, western music a amau genre a pai si, huai kawm a Naga music henlut in huai kha a lohchinna uh ahi chinuam dan hih tuak hi.

Eilam ah leng tulai in music siam leh band i tamta. Zosuan sung ah en le adiakin Kawlgam leh Mizoram bang ah siamna niam tuanlou hi. Facebook group khenkhat ah Korean band, sappau khong siam manglou khong international level a theihphak khong a om theih u leh bang dia ei Zosuante le huchi theilou tuan ding, a talent omlou lah hilou a chi in music lam a kipete chouna ding leh houlimna ding ka vokkhe kha zek hi. Alobo Naga in a houlimna uah North East ah folk music tuamtuam tampi om ahihman a kipahhuai asak dan leh huaite kum nih bang ana suita ahihdan khong a gen a, NE a band hoih taktak leh musician hoih taktak omthou ahihman in tu a kipan kum nga sung khong in international level a theihphak hong om ding a abeiseih dan khong a gen hi. State government khong in panpih deuh leh a phatuam ding in a gingta hiam chih dotna a dawnna ah album bawlna ding khong leh bangbang hiam a sum a panpihna sang in music lam a kipete government in a promote na lam a apanpih theih u leh phatuam zaw ding a a gintak dan khong a gen hi. Ahi ngut a, amau le promoter a hoihneih ziak ua tua dinmun tung uh leng ahihna om maithei ngut hi.

Zosuan music lam a uk leh kizangte in le lungsim zang in local tunes/music leh amau creative idea khong hon henlut in hong hahpan semsem le uh, tuni a khovel lah neuta ahih chiang in khovel theihphak music siam/lasiam i neilah het kei ding. Music a nekzong a hausa thei ding i omlou tuan kei ding. Chihtakna toh kuhkal takin hong pang le uhen aw. Talent neilou i hi kei. A siamlou i hi kei. Facility neilou i hi nawn kei.