BOARDING CARD OMLOU MAWK!

Fel thou i ki sak leh ki fel zoulou deuh hi ding hi veh aw. Tuni 25.2.2012 Indigo Flight No.6E 321 a Mumbai apan Guwahati leng ding, departure ticket a agelh dan ua 8:15 am hiven, huai delh in ka tunna apan zingnawngpi in MERU taxi ah ka kipankhia hi. Huai lam a zing dak 7 khong a khua vak pan hiven, khovak ma a diangkhia ka hi hi. Bangkim a fel a, a hun in Airport ka tung hi. Zin ding chinga airport a hihngeina teng ka hih khit in Boarding Card hon pia ua, sawng khatna Gate Number A6 a lut ding ahih hon hilh ua, Boarding Card ah le huai a kigelh hi. 

Huchi ahihleh chi in a tung lam ka deuhtou pah a, a tung lam ah Gate Number A1 apan A12 tan ana om dan in ka mu a; huai a lut dingte security check na mun 10 apha diam, (ka na sim kha kei)  a na om a, mi leng ana tamsim naihnaih hi. A saklam nawl ah numeite a ahi deuh a, a khanglam nawl ah “Laptop tawiloute hiai lam ah hong pai un” chin security lamte’n mi ana sam zungzung uhi. Laptop tawi ka hih chiang in a khanglam nawl gei ah ka ki vual teia, ka ma a ding pa'n gamla sim a ka omlai ua pan in a van sung apan a laptop a lakkhiak pah ka muh chiang in “Huchi di ahihleh" chin, kei le tuang tunga tuchil zen in ka laptop ka suah khia hi. Grape kiman deuh chia naupangte puak dia kg nih ka lei ka suitcase neuchik sung a ka guan leh a kigak sim mahmah a, a siat ding lah lauh huai, va pawng hen di le hi chiah lou, pilvan deuh ngai chia tuzen a pang ka hi hi.

Ka ma a pan a khut khat a suitcase kai in a khut lehlam lenuai ah a laptop a zep a, ken le ama hihdan a hih kichi, ka khut taklam a ka suitcase a kaihna dokkhia a kai, veilam a laptop zakzeh, khut a polyethene a nahtang gap nih, bisleri tui  khai toh ka thuah leh khut kidaihlou deuh chu ahipen di chu. Ka hun a hong tun chiang in ka laptop leh mobile a koihna ding bawm sung a koih in a bawm kalhna chabi ka tawi hi. A khonung in Jacket leng hon suah sak nawn ua, van check na khawl sung ah ka van dangte toh a tholh lut hanhan uhi. Huchih chiang in kei pen security check na lam ah ka paita a, a mun ka tun leh ka khut ah ka Boarding Card ana omta kei maimah hi. A koi a nuse kha ka zenhouh diam ah.. 

Lenna sung a nek ding a free a muh ding omkei mahleh, tui bel a free a dawn theih ngal ahih chiang in, breakfast lah ki ne manlou ahihna ah security khit chiang a lut ding ngak kawma nahtang ne a tui dawn ding chia nahtang gap nih leh bisleri 500 ml ka tawi ahi a. Ka khaina polyethene bang a hong kek nemnom zomah a, ka om nengnung kha sim hi. Boarding Card tawilou a Security ma a va din zetzat dan lah omlou, security apan hong paikhe khinsa ka Jacket ngen a,  a sakhau ka check leh Boarding Card ana om tuan kei hi. Ka khut a lah omlou, ka T-shirt pocket, ka khekol pocket teng dap mah leng a om tuan kei hi. Koi a hon na kibuksan ahi peuhmah diam ah. Dena laptop ka lakkhiak lai a, koihkhe kha ka hi ding chi in, laptop ka lakkhiak na mun khong, mi khe nuai a ka gel-et leh muh ding a om tuan kei hi. Security check dia van tolhlutna dohkan tung khong ah ana om henhan khak leh chia huai lak khong i va etchiang in le lah ana om tuan kei zel hi.

Huchi a ka dakdak nalam ah tangval uniform silh vak lehleh khat ka mu a, a kiang ah, "Ëxcuse Me. Are you from Indigo?” ka chih leh “Yes. Any problem?”hon chi a. Thil omdan ka hilh leh “Na suitcase sung khong a om ahi diam” hon chi a, “Hi maithei” ka chihleh security sung lam a va gen in ka suitcase hon domkhia a, huai ah le ana om tuan kei hi. Huchia va zonzon a hun beisak sak sang in chin “Can you make arrangement for a new Boarding Card?” ka chih leh, “Wait. You stay rght here” chi in hon taisan hi. A bang chia ka Boarding Card koi a mang thei mawk ding a de aw chia gingta theilou in, ka khekol sakhau, ka T-Shirt sakhau, ka jacket sakhau,  ka bag sung leh check theihna teng ka na check thakthak hang in muhkhiak ka nei tuan kei hi. 

Minute nga khong khit nung in tangvalpa a hong tungkik a, Boarding Card thak hong pia hi. Huaitak in laptop leh mobile phone a koihna ding bawm  sung a koih nawn in, chabi ka kalh khum thap hi. Ka boarding card thak, nahtang gap nih leh bisleri tui khut a tawi in security ah ka lutta hi. Security check tupan a sung lam a liquid tawi phallouh ahi hon chi pah a, lenna sunga tawi ding ka chih hi kei veh aw... Hiai a angakna a dawn ding ka chih ahi ka chih leh 100 ml chauh na tawi thei ding. Dawn kiam in hon chi a, security te mai a tui bang dawn zozen phot a ngai a, hon check khit in jacket la in ka silh masa pen a, huaikhit in ka suitcase ka la hi. Laptop leh mobile ka koihna bawm a ka kalhna a chabi ka na tawikha kei geet a, a polam ka va et leh ana om dengdang vanglak a, ka la pah hi.

Laptop leh mobile koihna bawm ka va naih a, a tung lam glass, ki mu pailet thei ahihman in Dell laptop a rong kei a toh kibang ka muh masak penpen ka chabi tawi a ka hon dek leh a kihong thei hetkei hi. Nihvei bang ka lohsap nung in vai tangval khat hong pai in ama chabi a hong hon leh  kihong geih mai hi. Hon nuihsan kawm in “See the number” a hon chi a, ka etleh kei chabi a number kigelh 002 ana hi a, a khang ah laptop bawm khat a om a, huai number 002 kigelh hiven ka hong leh kihong pah in asung ate ka lakhe ngal hi. Ki che fuhlou sim ahih chiang a, ngaihtuahna le pai ziahziah khollou khat a om ahi ngei dia, huai chabi a number a om lam bang ka na thei mawngmawng kei hi. 

Zingkal ki thoubaih lua, ihmut lah ki khamlou deuh le ahi dia, airport khong a vaite a tam luat vengvung na ua ki haihot gawp khat ahi diam, fellou ki chi utlou in huai khong ka ngoh sukta maimai aka. :)