Khokhal lai, March khatawp kuan hi hiven. A khua uh, Chiangkot a pan Lamka zin ding in PaKang phalvak in kipan khia hi. Hiai khuate kikal khe a pai in tuailaite leh papi hatdeuhte kia nikhat in tungsuak zou uhi. Lamkal a zintun haksa chi’a giahlouh sawm a van giklua deihlou chi in antun genlouh a tuithawl leng a paw kei hi. A kawlzal kuah in a khut ah tem tawi lel in pai hi. Kipan baih ahihman in khosung nupi belte thou lel ua, nungak fel khat leh nih in leng sumtawng a ansuk panta uhi. Nitak a aki houna bang un Chingbem te inkong lam a tawt phei leh a lawmnu’n sumtawng a ansu dia kisa kawm in ana ngak a, chibai kibuk leh mangpha kikhak in a kihen uhi.
Amah kia a pai chih mahtak, khomual tan bang hatpai sim pah zatzat zozen hi. Khomual pelh nung in gamlak bang dai vikvik sim in a thei a, vasa hamging khong loungal thawm zak ding a om mang kei. Hong pai zel a sun-annek hun khong in a hong gim piansim pah hi. Daitui bang a siang kilkel a kho-ul amai leh a khut khong ah hong takkhe keuhkeuh zozen a, a nungzang leh lenuai khong a kawt demdum hi. A pai kawm in a lungphu detdet leh ama nakging bang a za thei hi. Thawmhau kisa sim, a paina ding a gal ngaihtuah chiang in mual zatam kantan a pai ding huphulh sim in gamla teituai bang a sa a, a lungsim suangtuahna in nunglam hon nga mahleh amau inn tunglou in a lawmnu Chingbem te inlam a tung zaw hi. Nitak a ki houna khong uh, zingkal a khelah tak a akikhen dan khong uh a ngaihtuahna in nungkaih vei sak in a lampai bang telh nawn kei mahleh pasal toupi va kik nawn hial ding hi sa lou in, mailam a nawt teitei hi. Mual leh kuam bangzah hiam a hon pelh chiang in a sing a lou bang hong kidangta ahih man in huchi pi a nunglam ngaihtuah nawnlou in a lampai hong lamzang in hon telh deuhta hi.
Vuah lah zu nailou ahihman in tuaiki, huihu,singthupi leh singkung dangte sel panpan in singkung a nahpate leh leizul a loupate hing hoih nailou a, singgah kiakte pou nailou hi. Lou halna meikhu in van tuam vom ngeingui sim lai napi, ni sa mahmah tentan zel hi. Lampi a luite lah tui luang nawnlou in mun khatkhat ah tui tamlou vung lel in a daina deuhte ah ngavok leh nga dangte’n suang kawm bel mahle uh tui nisa in sal lum a nuamsa nawnlou uh ahi ngei dia, avangkim in suangnuai ah ngate hong kipek ging phatphat uhi. Lamsau pai ding hikei leh “khut vuak ale ngasa tampi mattheih ding hiven” a chi lungsim a, a neulai-a a khozang ua Luipi a makha (gu) vasu a, nga tampipi amat phengphung laite khong uh leh luita a tui tamlou a vungnate a alawmte toh tuithang kam a, luivazem dangtak tui dawn ding a hong pai mat ding aki lamet mahmah lai khong uh a phawk zozen hi.
Khokhal lai chih mahtak lampi a taam keia, daitui pal nuaunuau ding leh vot paih ding a om kei. A mual a kuam tawn in a hong pai zel a, louhalna mei khahsuah in gam a katna nung, nahpa keu teng kangtum leh lei (soil) in keu leh vom thuah, loupa leh singsawlte kang keu gemgam khong a mu hi. Akhen chiang in zulei lehpenglamsakamkei in lampi khong ana kan zauh sek ua, lamgei singkung ah thankik lusan dangtak adiam akam bang ana ka heihai hi. Lampi a suaklu tang pulh peuh tawm a anek leh ana min hoih lawta ahi dinga, thuk le thuk lou in khum zozen bang asa hi. A dang hong taksim chiang in a tuithawl puaklouh peuh kisik in tui luan ging biahbiahna lui tuah khak a zodamtui vot ngii-ngei dawn ding a lunggulh mahmah hi. Sakhi hawk khong a hon zak zomah leh sakhi in suaklu a nek khit-a atui dawn khum dan sahang hilh, sahang in a dawn chiang a lah ana khum dek suailou a, heh kisa a sakhi mai a mek gawm sak maimah peuh a ngaihtuah khe thepthup hi.
Mihing lungsim hat leh kin, dai kaih khum theih le hilou a utna na a leng ziahziah mai ahi ngei ding a. Nunglam a om i sak laitak a malam peuh a ana tung man, thu khat ngaihtuah i sak lai a la peuh ana sa man zel khat mah ahi diam ah, PaKang’ lungsim ah la khat ngaih deuh mai in a hong gingkhe tageet hi. Khua khal a tui duh a dangtak leh sakhi hawk khong a zak ziak le hi kha mai ding.
No comments:
Post a Comment