Saitual leh Champhai lampi
katna Keifang khua a kipan gamla lou ah lamkawi
ngeingawi khat a om a, huai kha nuthoi kawi a chi uh uh hi in ka thei hi.
Huaitak ka tunkuan un lamgei a singpi dawr kihong thak khat ah singpi dawn ding
in ka khawl uhi. Dawr ngak, nungak melhoihtak leh kamsiamtak ana om a, puanak vom
silh in a chi bang a nou kiuhkeuh in a mit khong tui sim gilgial abang hi.
Huaikawm a nungak vun huchituk a ngou leh nou ngiingei om thei mawk di a diam
chihsim in a oma, facebook khong a tulai nungakte’n melhoihna damdawi nesek uh
a chih lamlam bang uh phawk in a om mawk
hi. Abang abang hileh a lim laksak himhim ding chia ka lak leh lawinu’n “internet ah a dah dawn ani a” a chih azak
ziak khong a diam ah gintak sang in a phur mahmah vanglak hi.
Nuthoi Kawi. Hiai minu kianga a khangzek ua lamkawi kha nuthoi kawi
himahlou hiam chia ka kan leh “Amak
taktak ahi. A hong pai peuh in hiai hon dong gige mawk uh. Ke’n lah thei hetlou.”
chi’n hon dawng hi. Lampi aki siallai a koi
lailai tawnsak ding chih survey bawldia va kuante sappa kha nuthoi khat in ana kithuahpih
thei, ana zolzou lua ahih chianga huainu deihdan a lamlian in Keifang tawnkha
dia hon bawl chiang ua huchi tuk a lampi a hong kawi ngaita ahihman a, huaimun
kha nuthoi kawi kichi mai chihdan ahi. Himahleh Aizawl lam tunnung a ka
theihdan a dikna hiam chih chetna ding a mi khenkhat kianga ka hon kan chiang
in Nuthoi Kawi pen huai mun hilou a
Aizawl apan i pai chianga Seling phakma, Seling khokhang a kawi pen hizaw dan
in a gen ua, koi dikzaw a diam thei nawnlou in ka kanchian kha nawn kei hi.
Bangteng hileh nuthawi khat in a khua ua ding a nahoih khat sem chu hi peuhmah a,
mahni khua puah utna leh a khanding a deihna lungsim a put pen thupi hi.
Nuthoi nu lungsim puchiat le
Manipur singtang bang ah le i khuate taisan a Lamka zang delh souhsouh lou a, i
hihtheihdan chiat a i khua i hon puah chiat chiang in i khua khangtou, tenna
tak leh khonuam i suah mai ding hi. Khua chiat puah a hong khantouh chiat chiang in i gam hong nuam
in i gam khangtou hong hi zel mai ding hi. Nuthawi nu apan zillai la in hausate
apan kho mipi teng in i khua puahnopna lungsim taktak nei chiat hile sorkal fund tuamtuamte bang kho
puahna a kizang ziahziah mai ding hia chih bang ngaihtuahna ah a hong lut tou
hi.
Aizawl tun chianga mi khat
present ding insung van khat leinuam ka hihman un, huai nungaknu hotel kong a
ka omlai un Delhi a om lawmpa Khup Simte, CRPF lam a DIG sappa ka phoneta hi.
Sappa pen High School leh College tan ah ki hah thuah mahmah himahle ung, sepna
ka neih khit nung un contact ka loss kha ua, unau melhaih a i buailai un Imphal
ah a munpi uah (CRPF) tomkha ka va mukha zual chihlouh ka ki mukha nawnkei uhi.
Aizawl ka zinma lam pek uh, Manipur election deklai ahiam, nikhat Mualveng
hausapu in hon phone zenzen a ka phone number sappa ana pia ahihdan a hon hilh
a, huai apan in phone/SMS in ka ki contact kha nawn uhi. Amah ka phone nasan pen
Aizawl a CRPFte’n Canteen a neih khak u leh insung van present ding lei theih
dan a om kha diam chih ahi. Himahleh Aizawl ah canteen lian ana neikei ua,
Zemabawk ah neuchik khat a om a, insungvan a liandeuh ka lungsim a omte ana
omkei hi.
Nungaknu Hotel apan a paikhe
nawn in khol khollou in ka tai ziahziah nawn ua, Tuirial dung a nitak meh dia nga
lei malam ding ka chih u leh bangmah ana omkei mawka, ka leita kei uhi. Tuirial
lui apan a amat uh nga khutpek tantan ding khong a sau a om sek a, huaite lim
mahmah in amau “tuivai nga” houh
chile a genkha pen diam ah. A man bel tam mahmah zel. Mizoram ah bel mehman, sa
man, nga man chihte a tam himhim a, Aizawl ka tuntung un kiginni bazaar kava
kai chiang un mehman tamsa in bangmah ka lei ngamkei sek uhi. Bangmah leilou a
kik hial dia lah inn a mehdi omlou hizel, meh omlou a lah kine ut samlou
ahihman in a tawp chiang utlou pipi in banghiam khat bel lei teitei a ngai sek
hi. Anphui lom neuchik khong teng 10/- chi uh, lom 3 teng 20/- bang a i dek leh
a zuakte bang in “Na sumchil lua, la suk
mai awh” peuh hon chih u leh lak thanop
huai nawn hetlou, va laklouh ding lah hi nawnlou bang sim zel. J Ka u in “Kha nih, kha thum khong hong omle u chin, na
lei ngam mai ding uh” a hon chisek a, i omsawt leh zaw kilei ngam a bang
mah ve.
Tuirial apan lamsia leh leivui
khu lak ah ka taitou noknok ua, gari bang huaidan lampi a taina dia a bawl uh
zaw hi khollou ding hiven chihsim peuh in a om hi. Huchi in Aizawl nitaklam
anhuanhun khong in ka tungta uhi.
No comments:
Post a Comment