Nin Paih

Thu hou chikchik a i ngaih leh i ngaihsak khollouhte le a poimoh om hiveh aw. Gamdang lah mukhalou i hih chiang in India gam mah gen ni hang. Nin/botloh hi India gamsung a kholai nuamlousak leh thanghuaisaktu poimoh pen ahi phial maithei. Vaigam mun khenkhat lamlian kiang khonga nin a paihna uh uih vungvung zozen gei a paikha in a nupite uh, a numeite u’n a saree ua a nak uh hum tenten zozen a huaimun paipelh sawm,  taithoh phial a kintak a apai khong uh i muh khak chiang in hehpih bang huai dek sim uh abang hi. Alehlam ah lah nou nin paih mah lah hiven chin chihsim in a om hi.

Nin i paihte a tamzaw i nekna nung, i meh neng, anteh malna, theihawng leh a gah muat, i laisia, i puansia, numeite ni’n chih khong ahi tangpi dinga;  polythene khong, mobile, computers sia chihte leh hospital nin khong lou ah damdawi  lauhuai (chemical, toxic) chihte tamlou in ei ninte recycle hiam leihoihna ding a zattheih ding hiam khong ahi maithei. Huailam pen thutuam hitaleh i ninte ei nin mah ahi a, sorkal hiam khotang hiam in a paihna ding bawl sawmvei mahleh ei a nin neite’n a paihna ding mun a i va paih tuankei leh khosung leh inkim siangthou i nei ngeikei ding hi. Hiai ah insung siangthou i neihtheihna ding in sorkal in vengsung lampite buan nawilou, leivui khulou ding a hon bawlsak ding bel i ngiat ding ahi. I khosung, i inkim siangthou leh nipi lamchiang in i insung bang ah le thou khong tawmdeuh in damtheihhuai deuh kha ding hi. A bawlzou ding in le i huang sunga ekbuk gina bawl khollou, vokbuk toh a hong hihlai chiang in insung gimnam bang hong tuam mahmah vungvung in thoupite kipahna ah i lut kha nak hi.

Hiaite eimah in i bawlhoih theih vek ahi. Sorkal a kingakna ding chi le ahikei ding hi. Sorkal mohpuak bel a nin kholna/paihna ding mun ahiam nin khonkhawm ding a motor’  veng teng a sawl  ahiam ahi dinga, huchia a donkhawmte uh bang chi in a subei ua chih lam zaw sorkal mohpuakna chi mai ni. Khatvei Silchar a ka omkhakna gei, lamnawl  ah ni’n a kipai sek a, kei ngei inle ka va paikha hi. Bang chikhiam a kipan in Bengali pau a kigelh lai ana kitak a, ni’n a kipai nawnkei hi. Nikhat huai gei a sammet sak a ka tutleh ka gei a puankhui leh dawr tuamtuam a tute hong kikou in a taikhe souhsouh mawk ua, ka va et uleh Autorickshaw a tuang mi khat a hon man ua, huai nin paihna mun a a ninpaihsa polythene tuamtuam omte a lakik sak ua, huai khitin vawlou in a taimangsak uhi. Huai kim ate’n huaimun a nin  paih nawnlouh ding chihthu a bawl khitnung ua a pailaite a kimkiang a mipite mah in delh, man in a nin paihte lakik sak ana hi maimah uhi. Huai nin paihpa in chu huaimun a va paih nawn ding in a gintak huai hetkei hi. [Silchar a veng teng a huchi zaw ahi zenzen kei]

I gennop  bel eimah in i veng, i kimkiang teng a sianthou ding i deih, i ngaih poimoh leh pan i lak ngai ahi. i ninte a paihna ding mun ah i paih a ngai dia, a paihna ding mun a omkei leh sorkal i noh hiam ahihkeileh a khotang ahiam a i ngaihtuah ngai ding hi. Huchia a paihlouhna ding a paikha a om lele dena Silcharte i gen bang a a kimkiang a mipite in pan i lak ding hi ding hi. Thildang ah leng ahi vek ding. Sapte'n le "God helps those who help themselves" chi uh hilou hia..